ലോകത്തെ ഏറ്റവും ഡിജിറ്റല്‍വല്‍കൃത സമ്പദ്‌വ്യവസ്ഥയുടെ വാതില്‍പ്പടിയിലാണ് ഇന്ത്യയെന്ന് പ്രധാനമന്ത്രി നരേന്ദ്ര മോദി. വൈബ്രന്റ് ഗുജറാത്ത് ആഗോള സമ്മേളനം ഉദ്ഘാടനം ചെയ്തു സംസാരിക്കുകയായിരുന്നു അദ്ദേഹം. ആഗോളതലത്തില്‍ സമ്പദ്‌വ്യവസ്ഥകളില്‍ ഉലച്ചില്‍ത്തട്ടിയപ്പോഴും നമ്മള്‍ ശക്തമായ വളര്‍ച്ചയാണ് കാണിക്കുന്നത്. ആഗോള സമ്പദ്‌വ്യവസ്ഥയില്‍ ഇന്ത്യ തിളങ്ങുന്ന സ്ഥാനമാണ് അലങ്കരിക്കുന്നത്. ജനസംഖ്യയിലും ജനാധിപത്യത്തിലും ആവശ്യങ്ങളിലുമാണ് ഇന്ത്യയുടെ കരുത്ത്. ചിലര്‍ പറയും ജനാധിപത്യത്തില്‍ കാര്യക്ഷമമായ ഭരണനിര്‍വഹണം നടക്കില്ലെന്ന്. പക്ഷേ, കഴിഞ്ഞ രണ്ടര വര്‍ഷമായി കാര്യങ്ങള്‍ കൃത്യതയോടെ നടക്കുന്നതു നമ്മള്‍ കാണുന്നുണ്ട്, അദ്ദേഹം വ്യക്തമാക്കി.

മഹാത്മാ ഗാന്ധിയുടെയും സര്‍ദാര്‍ വല്ലഭായ് പട്ടേലിന്റെയും നാടാണ് ഗുജറാത്ത്. ഇന്ന് അത് ഇന്ത്യയുടെ വ്യവസായത്തിന്റെ ആത്മാവിനെ പ്രതിനിധീകരിക്കുന്നു. കഴിഞ്ഞ രണ്ടര വര്‍ഷമായി മികച്ച ഭരണനിര്‍വഹണമാണ് ഉണ്ടാകുന്നത്. സംസ്ഥാനങ്ങള്‍ തമ്മില്‍ ആരോഗ്യപരമായ മല്‍സരം കാഴ്ചവയ്ക്കുന്നു.

നമ്മുടെ സമ്പദ്‌വ്യവസ്ഥയിലും നയങ്ങളിലും ക്യത്യമായ വ്യതിയാനം കൊണ്ടുവരിക എന്നതാണ് നമ്മുടെ ദൗത്യം. ഇക്കാര്യത്തില്‍ ഡിജിറ്റല്‍ സാങ്കേതിക വിദ്യയ്ക്കു വ്യക്തമായ പങ്കുണ്ട്. ഇ – ഗവേര്‍ണന്‍സ് ആണ് എളുപ്പവും ഫലപ്രദവുമായ ഭരണനിര്‍വഹണം. യുവജനങ്ങള്‍ നയിക്കുന്ന വികസനമായിരിക്കണം വരേണ്ടത്. തൊഴില്‍ ദാതാക്കളെയാവണം സൃഷ്ടിക്കേണ്ടത്, തൊഴില്‍ കാത്തിരിക്കുന്നവരെയാകരുത്. ഇന്ത്യ ഇതുവരെ കൈവശം വച്ച എല്ലാ ബ്രാന്‍ഡുകളെക്കാളും വലിയ ബ്രാന്‍ഡ് ആണ് മേക്ക് ഇന്‍ ഇന്ത്യ എന്നത്. ഇന്ത്യയെ നിക്ഷേപ രാജ്യമാക്കി മാറ്റുന്നതില്‍ മേക്ക് ഇന്‍ ഇന്ത്യ പ്രധാന പങ്കു വഹിക്കുന്നു.

നടപടിക്രമങ്ങള്‍ ലളിതമാക്കി വ്യവസായങ്ങള്‍ ഇന്ത്യയില്‍ സ്ഥാപിച്ച് വളരാനുള്ള സാഹചര്യമൊരുക്കണം. ലോകത്തെ ആറാമത്തെ വലിയ ഉല്‍പ്പാദക രാജ്യമാണ് ഇന്ത്യയിപ്പോള്‍. നേരത്തേ ഒന്‍പതാം സ്ഥാനമായിരുന്നു. ഊര്‍ജസ്വലമായ യുവത്വമുള്ള രാജ്യമാണ് നമ്മുടേത്. അച്ചടക്കമുള്ള, സമര്‍പ്പണമുള്ള, കഴിവുള്ള യുവജനങ്ങള്‍ ആഗോളതലത്തില്‍ സമാനതകളില്ലാത്ത തൊഴില്‍ സമൂഹമാണ്. ഇംഗ്ലിഷ് സംസാരിക്കുന്ന രണ്ടാമത്തെ വലിയ രാജ്യമാണ് ഇന്ത്യ. പ്രകൃതിയും നമ്മോട് കരുണ കാണിക്കുന്നു. മൂന്നു വിളകള്‍ ഉല്‍പ്പാദിപ്പിക്കാവുന്ന സാഹചര്യമാണുള്ളത്. പ്രോഫിറ്റ് ഇന്‍ഡക്‌സില്‍ ഇന്ത്യ ഒന്നാം സ്ഥാനത്താണ്. നമ്മുടെ വിനോദ വ്യവസായം ലോക വ്യാപകമായി അലയൊലികള്‍ സൃഷ്ടിക്കുന്നു.