സുനന്ദ പുഷ്കര് മരിച്ചിട്ട് മൂന്നു വര്ഷം; ഇപ്പോഴും മരണത്തിന്റെ ചുരുളഴിക്കാന് കഴിയാതെ പോലിസ്
എല്ലാവരും കൈവിട്ട അന്വേഷണം പാതിവഴിയില്. സുനന്ദ പുഷ്കരിന്റെ ആത്മഹത്യനടന്നിട്ട് മൂന്നു വര്ഷങ്ങള്.മുന് കേന്ദ്ര മന്ത്രിയും കോണ്ഗ്രസ് എം..പിയുമായ ശശി തരൂരിന്റെ ഭാര്യ സുനന്ദാ പുഷ്കര് ദുരൂഹസാഹചര്യത്തില് മരിച്ചിട്ട് നാളേക്കു മൂന്നു വര്ഷം തികയുമ്പോഴും അന്വേഷണം എങ്ങുമെത്തിയില്ല.കൊട്ടിഘോഷിച്ചു നടന്ന ശശി തരൂര് സുനന്ദ വിവാഹത്തിനു ശേഷം ഏതാനം വര്ഷങ്ങള്ക്കു അകം ആണ് ബിസ്സിനെസ്സ് മാഗ്നെറ്റ് കൂടിയായിരുന്ന സുനന്ദയുടെ ദുരൂഹമരണം.
കേസ് തുടക്കത്തില് അന്വേഷിച്ച ഡല്ഹി പോലീസ് സംഘത്തിലെ ഉദ്യോഗസ്ഥരെ ഉള്പ്പെടുത്തി പ്രത്യേക അന്വേഷണ സംഘം (എസ്.ഐ.ടി) ഉണ്ടാക്കിയതാണ് കേസ് നടപടിയിലെ അവസാന പുരോഗതി.അന്തിമ റിപ്പോര്ട്ട് ഉടന് ഡല്ഹി പോലീസ് കമ്മിഷണര്ക്കു കൈമാറുമെന്നാണ് സൂചന. ഡല്ഹി പോലീസിനെ ഏറ്റവുമധികം കുഴക്കിയ കേസ് എങ്ങുമെത്താത്ത സാഹചര്യത്തില് അന്വേഷണം അവസാനിപ്പിക്കാനും നീക്കം നടക്കുന്നു. മാരക വിഷം ഉള്ളില്ച്ചെന്നതാണ് മരണകാരണമെന്ന് ആന്തരികാവയവങ്ങളുടെ പരിശോധനയില് വ്യക്തമായിരുന്നു. തുടര്ന്ന് കഴിഞ്ഞ വര്ഷമാദ്യം സംഭവത്തില് കൊലക്കുറ്റത്തിന് കേസ് രജിസ്റ്റര് ചെയ്തു. എഫ്.ഐ.ആറില് ആരുടെയും പേര് പരാമര്ശിച്ചിരുന്നില്ല. തരൂരിനെയും അടുത്ത സുഹൃത്തുക്കളെയും വീട്ടുജോലിക്കാരെയും സുനന്ദയുടെ മകനെയും പലതവണ ചോദ്യംചെയ്തു. ഏതാനും പേരെ നുണപരിശോധനയ്ക്കു വിധേയരാക്കി.
തരൂരിന്റെ സുഹൃത്തും പാക് മാധ്യമപ്രവര്ത്തകയുമായ മെഹര് തരാറിനെയും ചോദ്യംചെയ്തു. അമേരിക്കന് കുറ്റാന്വേഷണ ഏജന്സിയായ എഫ്.ബി.ഐയുടെ സഹായം വരെ തേടിയ കേസാണിത്. ഭീകരപ്രവര്ത്തന കേസുകളില് നേരത്തേ എഫ്.ബി.ഐയുടെ സഹായം തേടിയിട്ടുണ്ടെങ്കിലും കൊലക്കേസില് ഇതാദ്യമായിരുന്നു.
2014 ജനുവരി 17നു രാത്രിയാണ് ഡല്ഹിയിലെ പഞ്ചനക്ഷത്ര ഹോട്ടലായ ലീലാ പാലസില് സുനന്ദയെ മരിച്ചനിലയില് കണ്ടെത്തിയത്. 2010 ഓഗസ്റ്റിലാണ് കശ്മീരുകാരിയായ സുനന്ദയും അന്നു കേന്ദ്ര മന്ത്രിയായിരുന്ന ശശി തരൂരും വിവാഹിതരായത്. രണ്ടു പേരുടെയും മൂന്നാം വിവാഹമായിരുന്നു അത്.അന്വേഷണം എങ്ങുമെത്തിയില്ലെന്നതടക്കമുള്ള വിശദാംശങ്ങള് ഡല്ഹി പോലീസ് കേന്ദ്ര ആഭ്യന്തരമന്ത്രാലയത്തെ അറിയിച്ചിട്ടുണ്ട്.മരണത്തിലേക്കു നയിച്ച സാഹചര്യങ്ങള് കണ്ടെത്തുന്നതില് പരാജയപ്പെട്ടതിനാല് മരണകാരണം നിഗൂഢമായി തുടരുമെന്നാണ് പോലീസ് പറയുന്നത്. മാരകമായ രാസപദാര്ഥം ഉള്ളിലെത്തിയതാണ് മരണകാരണമെന്നു പോലീസ് സ്ഥിരീകരിച്ചിട്ടുണ്ട്. എന്നാല്, അത് സുനന്ദയുടെ ഉള്ളില് എങ്ങിനെയെത്തിയെന്നു കണ്ടെത്താനായില്ല. സ്വയം കഴിച്ചതാണോ, ബലംപ്രയോഗിച്ചു കഴിപ്പിച്ചതാണോ, കുത്തിവയ്പ്പിലൂടെ ശരീരത്തിലേക്കു കടത്തിവിട്ടതാണോ എന്നീ ചോദ്യങ്ങള്ക്കും ഉത്തരം കിട്ടിയില്ല.
https://www.facebook.com/Malayalivartha
