റിപ്പബ്ലിക് ദിന ആശങ്കകള് നിലനില്ക്കെ സൈനികവേഷം ധരിച്ച ഏഴു ഭീകരര് പഞ്ചാബില്; കനത്ത ജാഗ്രതാ നിര്ദ്ദേശം
ജനുവരി 26 ന് ഭീകരാക്രമണത്തിനു സാധ്യതയുണ്ടെന്ന ആശങ്ക നിലനില്ക്കെ സൈനിക വേഷത്തില് ഭീകരരെ കണ്ടതായി റിപ്പോര്ട്ടുകള്. പഞ്ചാബിലെ അമൃത്സറില് ചക്രി, ഗുര്ദാസ്പുര് സൈനികപോസ്റ്റുകള്ക്കു സമീപം ഏഴു ഭീകരരെ കണ്ടതായാണ് വിവരം. ഇന്ത്യന് സൈന്യത്തിലെ ക്യാപ്റ്റന്, സുബേദാര് വേഷത്തിലായിരുന്നു ഇവര് എന്നാണ് ലഭിക്കുന്ന വിവരം. ശത്രുരാജ്യത്തുനിന്ന് നുഴഞ്ഞുകയറിയവരാകാം ഇതെന്നു രഹസ്യാന്വേഷണ വിഭാഗം മുന്നറിയിപ്പു നല്കി.
ലഭിച്ച വിവരങ്ങളുടെ അടിസ്ഥാനത്തില് ന്യൂഡല്ഹി വിമാനത്താവളം, മെട്രോ സ്റ്റേഷനുകള് തുടങ്ങിയ ഇടങ്ങളില് സുരക്ഷ ശക്തമാക്കി. തിരഞ്ഞെടുപ്പ് അടുത്തിരിക്കെ പഞ്ചാബില് ഭീകരരെ കണ്ടെന്ന റിപ്പോര്ട്ടുകള് ആശങ്കയ്ക്കിടയാക്കിയിട്ടുണ്ട്. നിയമസഭാ തിരഞ്ഞെടുപ്പ് ഡ്യൂട്ടിയിലുള്ളവര്ക്കും കരുതിയിരിക്കാന് നിര്ദേശം നല്കിയിട്ടുണ്ട്. റിപ്പബ്ലിക് ദിനത്തില് ചാവേറാക്രമണമടക്കമുള്ള ഭീകരാക്രമണത്തിനു സാധ്യതയുള്ളതായി ഇന്റലിജന്സ് നേരത്തെ മുന്നറിയിപ്പു നല്കിയിരുന്നു. ജീവജാലങ്ങളെ ഉപയോഗിച്ച് ആക്രമണം നടത്തിയേക്കുമെന്നായിരുന്നു റിപ്പോര്ട്ട്.
https://www.facebook.com/Malayalivartha
