ജെല്ലിക്കെട്ട് തമിഴ്നാട്ടില് കത്തിപ്പടരുന്നു: നിയന്ത്രിച്ചില്ലെങ്കില് വലിയ വിലകൊടുക്കേണ്ടി വരുമെന്ന് ഇന്റലിജന്സ് റിപ്പോര്ട്ട്: വിദ്യാര്ഥി പ്രക്ഷോഭം ചെന്നൈയിലേക്ക്
ജെല്ലിക്കെട്ട് വിഷയം തമിഴ്നാടിനെ പിടിച്ചുലക്കുന്നു. ജെല്ലിക്കെട്ട് നിരോധനം നീക്കണമെന്ന് ആവശ്യപ്പെട്ടുള്ള സമരം തമിഴ്നാട്ടില് വിദ്യാര്ഥി പ്രക്ഷോഭമായി മാറുന്നു. ചെന്നൈ മറീന ബീച്ചില് ഒരു കൂട്ടം വിദ്യാര്ഥികള് ഇന്നലെ തുടക്കമിട്ട സമരത്തില് ഇതിനോടകം ആയിരങ്ങള് അണിനിരന്നു കഴിഞ്ഞു. അനുകൂല തീരുമാനം വരെ സമരമെന്ന മുദ്രാവാക്യവുമായി തുടരുന്ന സമരത്തില് അണിചേരാന് സംസ്ഥാനത്തിന്റെ വിവിധ ഭാഗങ്ങളില് യുവതീയുവാക്കള് ചെന്നൈയിലേക്ക് എത്തികൊണ്ടിരിക്കുന്നു.
പ്രതിഷേധങ്ങള് അക്രമത്തിന് വഴിമാറുമെന്ന് ഭരണകൂടം ഭയക്കുന്നു. വിഷയം കൊഴുപ്പിച്ച് താരങ്ങളും. ജെല്ലിക്കെട്ട് നിരോധിച്ച സുപ്രീംകോടതി വിധിക്കെതിരേ തമിഴ്നാട്ടിലെമ്പാടും പ്രതിഷേധങ്ങള് തുടരുകയാണ്. ചെന്നൈ മറീനാബീച്ചില് ഇന്നലെ നടന്ന പ്രതിഷേധത്തില് ഐടി പ്രൊഫഷണലുകളും വിദ്യാര്ഥികളുമടക്കം മൂവായിരത്തോളം പേരാണ് ഒത്തുകൂടിയത്. വിഷയത്തില് ജനവികാരത്തിനൊപ്പം നില്ക്കുന്ന നിലപാടാണ് രാഷ്ട്രീയ, സിനിമാ രംഗത്തുനിന്നുള്ള പ്രമുഖര് സ്വീകരിച്ചത്. എം.കെ.സ്റ്റാലിനും കമല്ഹാസനുമടക്കമുള്ളവര് ജെല്ലിക്കെട്ടിന്റെ സാംസ്കാരിക പ്രാധാന്യത്തെക്കുറിച്ച് പറഞ്ഞ് രംഗത്തെത്തിയിരുന്നു. കോടതിവിധി നടപ്പാക്കാനുള്ള പൊലീസിന്റെ പരിശ്രമം വിഫലമാക്കി തമിഴ്നാടിന്റെ പലഭാഗത്തും പൊങ്കല് ആഘോഷങ്ങളുടെ ഭാഗമായി ജെല്ലിക്കെട്ട് നടക്കുകയും ചെയ്തു.
പരീക്ഷയ്ക്ക് ആരെങ്കിലും കോപ്പിയടിച്ചെന്ന് കരുതി പരീക്ഷ തന്നെ നിരോധിക്കുമോ എന്നാണ് ഇതേക്കുറിച്ച് ചോദിച്ചപ്പോള് സൂര്യ പ്രതികരിച്ചത്. എസ്3യുടെ പ്രചരണാര്ഥം തിരുവനന്തപുരത്തെത്തിയതായിരുന്നു സൂര്യ. സംസ്കാരം, ചരിത്രം, അസ്തിത്വം എന്നിവയാല് ഒരുമിച്ചുചേര്ന്ന് ചെറുപ്പക്കാര് ഒരു വിഷയത്തില് പ്രതികരിക്കുന്നത് കാണുന്നതില് ഏറെ സന്തോഷമെന്ന് സൂര്യ നേരത്തേ പ്രതികരിച്ചിരുന്നു. ജെല്ലിക്കെട്ടിന്റെ നിരോധനത്തിനായി രംഗത്തിറങ്ങിയിരിക്കുന്ന പെറ്റ പോലെയുള്ള സംഘടനകള്ക്ക് ജനമനസിലുള്ള അംഗീകാരം നഷ്ടപ്പെട്ടിരിക്കുന്നുവെന്നും സൂര്യ പറഞ്ഞിരുന്നു. പരമ്പരാഗത വിനോദമായ ജെല്ലിക്കെട്ട് തിരിച്ചെത്തണമെന്നാണ് തന്റെ അഭിപ്രായമെന്ന് പറഞ്ഞ് വിക്രമും രംഗത്തെത്തി. ഇപ്പോഴത്തെ ജനകീയപ്രതിഷേധങ്ങള് വിജയത്തിലെത്തുമെന്ന പ്രതീക്ഷയും അദ്ദേഹം പങ്കുവെച്ചു. ജെല്ലിക്കെട്ട് നിരോധനത്തിനെതിരേ പ്രതിഷേധശബ്ദമുയര്ത്തിയ ഓരോ തമിഴന്റെയുംപേരില് അഭിമാനിക്കുന്നുവെന്നായിരുന്നു ധനുഷിന്റെ ട്വീറ്റ്.
ഇപ്പോഴിതാ ജെല്ലിക്കെട്ട് വിഷയത്തില് ഒരേ അഭിപ്രായം പ്രകടിപ്പിച്ച് രംഗത്തെത്തിയിരിക്കുകയാണ് കോളിവുഡിലെ പ്രമുഖരായ വിജയ്, വിക്രം, സൂര്യ എന്നിവര്. തമിഴ് സംസ്കാരത്തിന്റെ ഒഴിച്ചുകൂടാനാവാത്ത ഭാഗമാണ് ജെല്ലിക്കെട്ടെന്നും അത് നിരോധിക്കാനുള്ള നീക്കത്തിനെതിരേ ശബ്ദമുയര്ത്തുന്ന യുവാക്കള്ക്ക് അഭിനന്ദനങ്ങളെന്നും വിജയ് പറഞ്ഞു. ഫേസ്ബുക്ക് വീഡിയോയിലൂടെയായിരുന്നു വിജയ്യുടെ പ്രതികരണം.
https://www.facebook.com/Malayalivartha
