കള്ളപ്പണം വെളുപ്പിക്കാന്‍ സഹകരണ ബാങ്കുകള്‍ കൂട്ട് നിന്നതായി ആദായ നികുതി വകുപ്പ്. എന്നാല്‍ അങ്ങനൊന്നും നടന്നിട്ടില്ലെന്ന് റിസര്‍വ് ബാങ്കിന്റെ റിപ്പോര്‍ട്ട്. അനവധി സഹകരണ ബാങ്കു ഇടപാടുകളില്‍ ക്രമക്കേടു നടന്നുവെന്നും നീക്കിയിരിപ്പു പണത്തിന്റെ കണക്കുകളില്‍ കള്ളത്തരമുണ്ടെന്നും ആദായനികുതി വകുപ്പ് റിസര്‍വ് ബാങ്കിനെ അറിയിച്ചു. അതിനു മുന്‍പേ തിരിമറികള്‍ നടന്നതായി വിവരമില്ലെന്ന് റിസര്‍വ് ബാങ്ക് വിവരാവകാശ രേഖയിലൂടെ വെളിപ്പെടുത്തിയിരുന്നു.

നോട്ട് അസാധുവാക്കി ഒരാഴ്ച കഴിഞ്ഞപ്പോള്‍ അസാധു നോട്ട് സ്വീകരിക്കുന്നതില്‍ നിന്ന് റിസര്‍വ് ബാങ്ക് സഹകരണ ബാങ്കുകളെ വിലക്കിയിരുന്നു. സഹകരണ ബാങ്ക് വിഷയത്തില്‍ ധനമന്ത്രാലയമോ റിസര്‍വ് ബാങ്കോ ഒളിച്ചുകളിക്കുന്നുണ്ടെന്ന് പുറത്തുവന്ന വിവരങ്ങളിലെ പൊരുത്തക്കേടില്‍ നിന്ന് വ്യക്തം.

രാജ്യത്തെ ഒട്ടേറെ സഹകരണ ബാങ്കുകളുടെ കണക്കില്‍ പൊരുത്തക്കേടുണ്ടെന്നും പഴയ നോട്ടുകള്‍ മാറുന്നതിന്റെ മറവില്‍ കോടിക്കണക്കിനു രൂപയുടെ കള്ളപ്പണം വെളുപ്പിച്ചതായി കണ്ടെത്തിയെന്നും അറിയിച്ചു റിസര്‍വ് ബാങ്കിന് ആദായനികുതി വകുപ്പ് കത്തയച്ചു. മുംബൈയിലെയും പുനയിലെയും രണ്ടു ബാങ്കുകളിലെ ക്രമക്കേട് കത്തില്‍ ചൂണ്ടിക്കാട്ടിയിട്ടുണ്ട്. 113 കോടിയുടെ പഴയനോട്ടുകള്‍ കിട്ടിയെന്ന പെരുപ്പിച്ച കണക്കാണ് ഈ ബാങ്കുകള്‍ നല്‍കിയത്. 

242 കോടിയുടെ പഴയനോട്ടുകള്‍ കിട്ടിയെന്നായിരുന്നു ആര്‍.ബി.ഐയ്ക്കു പുനെ ബാങ്ക് റിപ്പോര്‍ട്ട് ചെയ്തത്. യഥാര്‍ഥത്തില്‍ 141 കോടിയുടെ കറന്‍സിയാണുണ്ടായിരുന്നത്. 2016 ഡിസംബര്‍ 23 നു റിസര്‍വ് ബാങ്കിനു നല്‍കിയ കണക്കില്‍ 101.07 കോടി അധികമായി ഈ സഹകരണബാങ്ക് കാണിച്ചു. ഇതുപോലെ മുംബൈ ബാങ്ക് 11.89 കോടിയുടെ കള്ളപ്പണം മാറ്റിയെടുത്തതായി ആദായനികുതി വകുപ്പ് കത്തില്‍ ചൂണ്ടിക്കാട്ടിയിട്ടുണ്ട്. 

രാജസ്ഥാനിലെ ആള്‍വാര്‍ ടൗണിെല ഒരു ബാങ്ക് വായ്പയുടെ മറവില്‍ വന്‍തോതില്‍ കള്ളപ്പണം വെളുപ്പിച്ചതായും കത്തിലുണ്ട്. കൃത്യമായ മേല്‍വിലാസമില്ലാത്ത 90 വ്യക്തികള്‍ക്കു ഡയറക്ടര്‍മാര്‍ വഴിവിട്ട് എട്ടുകോടിയുടെ വായ്പ നല്‍കിയാണു ക്രമക്കേട് കാട്ടിയത്. ഇത്തരം നിരവധി അനുഭവമുണ്ടായിട്ടുണ്ടെന്നാണ് ആദായനികുതി വകുപ്പ് പറയുന്നത്. 

പഴയനോട്ട് മാറാവുന്ന അവസാന ദിനമായ കഴിഞ്ഞ ഡിസംബര്‍ 30 കഴിഞ്ഞും വന്‍തോതില്‍ പഴയനോട്ട് വാങ്ങി പുതിയനോട്ടുകള്‍ മാറിക്കൊടുത്തിട്ടുണ്ടെന്നും ഇത്തരം ക്രമക്കേട് നടത്താനുള്ള സാധ്യതയെക്കുറിച്ച് റിസര്‍വ് ബാങ്കിനെ നേരത്തേ അറിയിച്ചിരുന്നെന്നും ആദായനികുതി ഉദ്യോഗസ്ഥര്‍ പറഞ്ഞു. ഈ നീക്കം മുന്നില്‍ക്കണ്ട് കഴിഞ്ഞ ഡിസംബര്‍ 30 വരെ ലഭിച്ച പഴയ നോട്ടുകള്‍ ആര്‍.ബി.ഐയുടെ നോട്ട് ചെസ്റ്റില്‍ പിറ്റേദിവസം നിക്ഷേപിക്കണമെന്നും മാസാവസാന ദിവസത്തെ കറന്‍സി നീക്കിയിരിപ്പില്‍ പഴയ നോട്ട് ഉള്‍പ്പെടുത്തരുതെന്നും എല്ലാ ബാങ്കുകള്‍ക്കും നിര്‍ദേശം നല്‍കിയിരുന്നു. 

നവംബര്‍ എട്ടിനു നോട്ട് അസാധുവാക്കി പ്രധാനമന്ത്രി പ്രഖ്യാപനം നടത്തിയതു വന്‍ തോതില്‍ കള്ളപ്പണം വെളുപ്പിക്കാനുള്ള അവസരമായി സഹകരണബാങ്കുകള്‍ വിനിയോഗിച്ചെന്നും ആദായനികുതി വകുപ്പിന്റെ കത്തിലുണ്ട്.ഭനിരവധി സഹകരണ ബാങ്കുകള്‍ നോട്ട് അസാധുവാക്കിയ അവസരം ദുരുപയോഗിച്ചുവെന്ന് റിസര്‍വ് ബാങ്കിനു പുറമെ ധനമന്ത്രാലയത്തിനും അയച്ചിട്ടുള്ള കത്തില്‍ വിശദീകരിച്ചു. ബന്ധപ്പെട്ട ബാങ്കുകള്‍ക്ക് നോട്ടീസ് നല്‍കിയിട്ടുണ്ട്. വിശദമായ അന്വേഷണം നടത്തിവരുന്നു