വണ്ണം കൂടിയപ്പോള് പണി പോയി... അമിതഭാരം കാരണം എയര് ഇന്ത്യ ജോലിക്കാരെ വിമാനത്തില് നിന്നും വിമാനത്താവളത്തിലേക്ക് മാറ്റി
ചില ജോലികള്ക്ക് പൊക്കവും ഭാരവും നിശ്ചയിച്ചിരിക്കുന്നതില് കൂടുതല് ആയാല് ഇന്റര്വ്യൂം ടെസ്റ്റും പാസ്സായാലും ആ ജോലിയില് പ്രവേശിക്കാന് കഴിയില്ല. എന്നാല് ജോലിക്കു കേറുന്ന സമയത്ത് കമ്പനി പറഞ്ഞ അളവാണെങ്കിലും അതിനു ശേഷം ഭാരം കൂടിയാല് ജോലിയില് തുടരുന്നത് പ്രശ്നമില്ല. എന്നാല് എയര്ഹോസ്റ്റസുമാരുടെ സ്ഥിതി അതല്ല. അനുവദനീയമായ ബോഡി മാസ് ഇന്റക്സിനേക്കാള് കൂടുതലാണെങ്കില് പണി പോകുമെന്നതില് ഒരു സംശയവുമില്ല. എയര് ഇന്ത്യയുടെ ജീവനക്കാര്ക്കാണ് ഇപ്പോള് അമിത ഭാരം ഭീഷണിയായിരിക്കുന്നത്.
അനുവദനീയമായ അളവിനേക്കാളും ഭാരം വര്ധിച്ച ജീവനക്കാരെ എയര് ഇന്ത്യ വിമാനത്തിലെ ജോലിയില് നിന്നും വിമാനത്താവളത്തിലെ ജോലിയിലേക്കു മാറ്റിയിരിക്കുകയാണ്. ഇതോടെ ഇവരുടെ ശമ്പളത്തിനും വ്യത്യാസം ഉണ്ടാകും. ഗ്രൗണ്ട് ജോലിയിലേക്ക് മാറുന്നതോടെ ഫ്ളൈയിങ് അലവന്സായി മാസം ലഭിക്കുന്ന 35000രൂപ മുതല് 50000വരെ ഇവര്ക്കു നഷ്ടമാകും.
തടിപെട്ടെന്ന് കുറയ്ക്കാന് കഴിഞ്ഞില്ലെങ്കില് സ്ഥിരമായി വിമാനത്താവളത്തിലെ ജോലിയില് തന്നെ നിര്ത്തുമെന്നും ഇവര്ക്ക് മുന്നറിയിപ്പും നല്കിയിട്ടുണ്ട്. ഇത്തരത്തില് വിമാനത്താവളത്തിലേക്ക് മാറ്റപ്പെട്ടത് ഭൂരിപക്ഷവും എയര്ഹോസ്റ്റസുമാരാണ്.
അനുവദനീയമായ ബോഡി മാസ് ഇന്റക്സിനേക്കാള് കൂടുതലാണ് ഇവരുടേതെന്നും നേരത്തെ ഇവരോട് തടികുറയ്ക്കാന് ആവശ്യപ്പെട്ട് ഡെഡ്ലൈന് നല്കിയിരുന്നതായും എയര് ഇന്ത്യയിലെ മുതിര്ന്ന ഉദ്യോഗസ്ഥര് അറിയിക്കുന്നു.
ഇപ്പോള് ആറു മാസത്തേക്ക് താല്ക്കാലികമായാണ് ക്യാബിന് ക്രൂ അംഗങ്ങളെ ഗ്രൗണ്ട് ഡ്യൂട്ടിക്ക് നിയോഗിച്ചിട്ടുള്ളത്. 18മാസത്തിനുള്ളില് അനുവദനീയമായ ബോഡി മാസ് ഇന്റക്സില് എത്തിയില്ലെങ്കില് സ്ഥിരമായി പുറത്താക്കുമെന്നും മുന്നറിയിപ്പു നല്കിയിട്ടുണ്ട്. 2014 ലാണ് സിവില് വ്യോമയാന ഡയറക്ടറേറ്റ് ജനറല് എയര് ലൈന് മേഖലയിലെ ജീവനക്കാരുടെ ബോഡി മാസ്സ് ഇന്റക്സ് പുറത്തുവിട്ടത്. നിശ്ചിത ശരീരഭാരത്തിലുമധികം ഭാരമുള്ള ജീവനക്കാര് താല്ക്കാലികമായി ഫ്ളൈറ്റ് സര്വീസിന് യോഗ്യരല്ലെന്നും സിവില് വ്യോമയാന ഡയറക്ടറേറ്റ് ജനറലിന്റെ മാനദണ്ഡങ്ങളില് പറയുന്നുണ്ട്.
https://www.facebook.com/Malayalivartha
