ഒഡീഷയില്‍ ബലാത്സംഗത്തിനിരയായ പെണ്‍കുട്ടികള്‍ നീതി ലഭിക്കാന്‍ യാത്ര ചെയ്യുന്നത് 1,200 കിലോമീറ്റര്‍. 11,15,18 വയസുള്ള മൂന്ന് പെണ്‍കുട്ടികളെ അവര്‍ ജോലി ചെയ്തിരുന്ന ചൂളയുടെ ഉടമസ്ഥന്‍ ബലാത്സംഗം ചെയ്തുവെന്നാണ് കേസ്. ഒഡീഷയിലെ ന്വാപുരയില്‍ നിന്നും ബാര്‍ഗയില്‍ നിന്നും 1,200 കിലോമീറ്റര്‍ യാത്ര ചെയ്താണ് മൂവരും വിചാരണയ്ക്കായി കോടതിയിലെത്തിയിരുന്നത്. 2014 മാര്‍ച്ചിലും ഏപ്രിലിലുമാണ് പീഡന പരമ്പര നടക്കുന്നത്. 40കാരനായ ലിംഗംപള്ളി കൃഷ്ണ എന്നയാളുടെ ചൂളയിലായിരുന്നു മൂന്നു പെണ്‍കുട്ടികളും മാതാപിതാക്കള്‍ക്കൊപ്പം പണിയെടുത്തിരുന്നത്. അവിടെ എത്തിയ കുട്ടികളെ കൃഷ്ണ പീഡിപ്പിച്ചത് ക്രൂരതയോടെയായിരുന്നു. പെണ്‍കുട്ടികളെ അടിച്ചിരുന്നതായും മൊബൈല്‍ ഫോണ്‍ തട്ടിയെടുത്തതായും പരാതിയുണ്ട്.

മുതലാളിക്കെതിരെ പരാതിയുമായി നീങ്ങാന്‍ തയ്യാറായ പെണ്‍കുട്ടികളുടെ മാതാപിതാക്കളെ പ്രതി ഭീഷണിപ്പെടുത്തി. ഒടുവില്‍ ഒഡീഷയിലുള്ള ബന്ധുക്കളെ വിളിച്ച് കുട്ടികള്‍ കാര്യങ്ങള്‍ പറഞ്ഞതിന് ശേഷമാണ് കുട്ടികളെ രക്ഷപ്പെടുത്താനായത്. ദിവസവേതനക്കാരായ ഇവര്‍ ജോലി പോലും ഒഴിവാക്കിയാണ് നീതിതേടി കോടതിയിലെത്തിയത്. എന്നാല്‍ സാങ്കേതിക പ്രശ്‌നങ്ങള്‍ ചൂണ്ടികാട്ടി കോടതി ഏപ്രിലിലേക്ക് വിചാരണ നീട്ടിവെച്ചു. ക്രോസ് വിസ്താരത്തിനായി വെള്ളിയാഴ്ചയാണ് മൂന്ന് പേരും കരീംനഗറിലെത്തിയത്. കോടതിനടപടികള്‍ക്കായി ചൊവ്വാഴ്ചയാണ് ഇവര്‍ മാതാപിതാക്കള്‍ക്കൊപ്പം ഒഡീഷയില്‍ നിന്ന് പുറപ്പെട്ടത്. ഭീഷണികള്‍ പോലും വകവെക്കാതെയാണ് പെണ്‍കുട്ടികള്‍ നീതിക്കായി പോരാടുന്നത്. രണ്ടാം തവണയാണ് പ്രതിഭാഗം വക്കീല്‍ വിചാരണ നീട്ടിവെക്കാന്‍ ആവശ്യപ്പെടുന്നത്. പെണ്‍കുട്ടികളുടെ സാക്ഷിവിസ്താരം ഒഡിയ ഭാഷയില്‍ നിന്ന് തെലുങ്കിലേക്ക് തര്‍ജമ ചെയ്യുന്നതിന് ദ്വിഭാഷിയെ നിയമിച്ചത് ചൂണ്ടിക്കാട്ടിയാണ് വിചാരണ തടസപ്പെടുത്തിയത്. ദ്വിഭാഷിയെ കോടതിനടപടിപ്രകാരം വിളിച്ചിട്ടില്ലെന്നാണ് അഭിഭാഷകന്റെ വാദം.

മൂന്ന് വര്‍ഷമായി വിചാരണ പോലും നടക്കാതെ കേസ് ഇഴഞ്ഞുനീങ്ങുകയാണ്. പ്രൊട്ടക്ഷന്‍ ഓഫ് ചില്‍ഡ്രന്‍ ഫ്രം സെക്ഷ്വല്‍ ഒഫന്‍സസ് ആക്ട് പ്രകാരം ഇത്തരം കേസുകളില്‍ വിചാരണ ഒരു വര്‍ഷത്തിനുള്ളില്‍ പൂര്‍ത്തിയാകണമെന്നാണ് നിയമം. 2014 സെപ്റ്റംബറില്‍ കേസില്‍ ഒരു ചാര്‍ജ്ഷീറ്റ് ഫയല്‍ ചെയ്‌തെങ്കിലും കഴിഞ്ഞ വര്‍ഷം ഏപ്രിലിലാണ് വിചാരണക്കുള്ള ആദ്യ തീയതി വന്നത്. എന്നാല്‍ പിന്നീട് നടപടിക്രമങ്ങളില്‍ കാലതാമസം വീണ്ടും വന്നുവെന്ന് സാമൂഹിക പ്രവര്‍ത്തകയായ ഉമി ഡാനിയല്‍ പറഞ്ഞു. കഴിഞ്ഞ വര്‍ഷം ഏപ്രിലിലും 1,200 കിലോമീറ്റര്‍ യാത്ര ചെയ്ത് പെണ്‍കുട്ടികള്‍ വിചാരണക്കായി എത്തിയപ്പോള്‍ അസുഖത്തിന്റെ പേര് പറഞ്ഞ് എതിര്‍ഭാഗം വിചാരണ മാറ്റിവെപ്പിച്ചു. പബ്ലിക് പ്രോസിക്യൂട്ടര്‍ പോലും കേസിന് അത്ര തയ്യാറെടുപ്പ് നടത്തിയിരുന്നില്ലെന്നും ഡാനിയല്‍ പറഞ്ഞു. 

കോടതിയിലെത്തുമ്പോള്‍ ആത്മവിശ്വാസം കുറഞ്ഞ അവസ്ഥയിലായിരുന്നു തങ്ങളെന്ന് മൂന്ന് കുട്ടികളിലൊരാള്‍ പറഞ്ഞു. ജഡ്ജി വിചാരണ നീട്ടിവെച്ചപ്പോള്‍ വല്ലാത്ത നിരാശ തോന്നിയെന്ന് കൂട്ടത്തില്‍ മുതിര്‍ന്ന പെണ്‍കുട്ടി പറഞ്ഞു. കരിംനഗറിലെത്താന്‍ ട്രെയിനിലും ബസിലും മാറികയറി യാത്ര ചെയ്തത് പേടിയോടെയായിരുന്നെന്ന് പെണ്‍കുട്ടികള്‍ പറഞ്ഞു. വിചാരണ അവസാനിച്ച് ചെങ്കല്‍ചൂള ഉടമസ്ഥന് ശിക്ഷ ലഭിക്കുമെന്നായിരുന്നു അവരുടെ പ്രതീക്ഷ. കരിംനഗറില്‍ സാമൂഹിക പ്രവര്‍ത്തക സുനിത കൃഷ്ണന്റെ എന്‍ജിഒയില്‍ പൊലീസ് സംരക്ഷണത്തിലാണ് കുട്ടികള്‍ താമസിക്കുന്നത്.