ഇതെന്ത് ഭാഷ ദൈവമേ. ഒരുനിമിഷത്തേക്ക് എല്ലാവരും പകച്ചു. ഹൈദരാബാദ് ഹൗസിലെ ചര്‍ച്ചകള്‍ക്കു ശേഷം അബൂദബി കിരീടാവകാശി ശൈഖ് മുഹമ്മദ് നടത്തിയ പ്രസ്താവനക്ക് തര്‍ജമ ഇല്ലാതെ പോയത് പ്രധാനമന്ത്രി നരേന്ദ്ര മോദിയേയും മന്ത്രിമാരെയും മാധ്യമപ്രവര്‍ത്തകരെയും കുഴക്കി.തര്‍ജമ നടത്തേണ്ടയാളെ സുരക്ഷ ഉദ്യോഗസ്ഥര്‍ തടഞ്ഞുവെച്ചതാണ് കാരണം.
പരിശോധന കഴിഞ്ഞ് തര്‍ജമക്കാരന്‍ എത്തിയപ്പോഴേക്കും ശൈഖ് മുഹമ്മദിന്റെ പ്രസ്താവനയും കഴിഞ്ഞു. മോദിയുടെ പ്രസ്താവനക്കു പിന്നാലെയാണ് ശൈഖ് മുഹമ്മദ് അറബിയില്‍ തന്റെ പ്രസ്താവന നടത്തിയത്. തര്‍ജമ കേള്‍ക്കാന്‍ ഇയര്‍ഫോണ്‍ എടുത്തുവെച്ച് ശ്രദ്ധിച്ച പ്രധാനമന്ത്രിയും ധനമന്ത്രി അരുണ്‍ ജെയ്റ്റ്‌ലി അടക്കമുള്ളവരും മൂന്നു മിനിറ്റ് നേരം കുഴങ്ങി.
ഭരണത്തലവന്മാരുമായുള്ള കൂടിക്കാഴ്ചക്ക് ഹൈദരാബാദ് ഹൗസാണ് മിക്കവാറും ഔദ്യോഗിക വേദി. ഇവിടെ തര്‍ജമക്ക് പ്രത്യേക ക്രമീകരണവുമുണ്ട്. എന്നാല്‍, ഇത്തവണ പ്രധാനമന്ത്രിക്കടക്കം തര്‍ജമ ലഭ്യമായില്ല. മോദി പതിവുപോലെ പ്രോംപ്ടറിന്റെ സഹായത്തോടെയാണ് ഇംഗ്‌ളീഷിലുള്ള പ്രസ്താവന നോക്കി വായിച്ചത്. ശൈഖ് മുഹമ്മദ് കടലാസില്‍ നോക്കി പ്രസ്താവന നടത്തി.