തിരഞ്ഞെടുപ്പില്‍ മല്‍സരിക്കുന്ന സ്ഥാനാര്‍ഥികള്‍ക്കു പണം പിന്‍വലിക്കുന്നതിനുള്ള പരിധി വര്‍ധിപ്പിച്ചുനല്‍കണമെന്ന തിരഞ്ഞെടുപ്പു കമ്മിഷന്റെ നിര്‍ദ്ദേശം റിസര്‍വ് ബാങ്ക് തള്ളി. ആഴ്ചതോറും പിന്‍വലിക്കാനുള്ള തുകയുടെ പരിധി സ്ഥാനാര്‍ഥികളുടെ കാര്യത്തില്‍ 24,000 എന്നതു രണ്ടു ലക്ഷമാക്കണമെന്നായിരുന്നു കമ്മിഷന്റെ അഭ്യര്‍ഥന. എന്നാല്‍ ഇപ്പോഴത്തെ സാഹചര്യത്തില്‍ ഇതു പ്രായോഗികമല്ലെന്നു പറഞ്ഞു നിര്‍ദേശം ആര്‍ബിഐ കയ്യോടെ തള്ളി. ഇപ്പോഴത്തെ നിയന്ത്രണം സ്ഥാനാര്‍ഥികളുടെ പ്രചാരണത്തെ ബാധിക്കുമെന്നു ചൂണ്ടിക്കാട്ടിയാണു കമ്മിഷന്‍ ആര്‍ബിഐയെ സമീപിച്ചത്.
തങ്ങളുടെ ആവശ്യം തികഞ്ഞ ലാഘവത്തോടെ തള്ളിയ ആര്‍ബിഐ നടപടി തിരഞ്ഞെടുപ്പു കമ്മിഷനെ ചൊടിപ്പിച്ചിട്ടുണ്ട്. പ്രശ്‌നത്തിന്റെ ഗൗരവാവസ്ഥ റിസര്‍വ് ബാങ്കിനു ബോധ്യപ്പെട്ടിട്ടില്ലെന്നും സുഗമമായ തിരഞ്ഞെടുപ്പു നടത്താന്‍ തങ്ങള്‍ക്കു ഭരണഘടനാപരമായ ബാധ്യതയുണ്ടെന്ന കാര്യം മറക്കരുതെന്നും കമ്മിഷന്‍ റിസര്‍വ് ബാങ്ക് ഗവര്‍ണര്‍ ഉര്‍ജിത് പട്ടേലിനു വീണ്ടും നല്‍കിയ കത്തില്‍ ചൂണ്ടിക്കാട്ടി.

ഇക്കാര്യം ഗവര്‍ണര്‍ പുനഃപരിശോധിക്കണമെന്നു കമ്മിഷന്‍ ആവശ്യപ്പെട്ടു. തിരഞ്ഞെടുപ്പ് അക്കൗണ്ട് തുറക്കുന്ന സ്ഥാനാര്‍ഥി റിട്ടേണിങ് ഓഫിസറുടെ കത്തു നല്‍കിയാല്‍ മാത്രം ഇത്തരമൊരു ആനുകൂല്യം നല്‍കണമെന്നാണു കമ്മിഷന്‍ കത്തില്‍ ആവശ്യപ്പെട്ടത്.