കാന്പൂരില് പണി നടന്നുകൊണ്ടിരുന്ന കെട്ടിടം തകര്ന്നുവീണ് ഏഴു പേര് മരിച്ചു, മുപ്പതോളം പേര് അവശിഷ്ടങ്ങള്ക്കിടയില് കുടുങ്ങിക്കിടക്കുന്നതായി സൂചന
കാന്പൂരില് പണി നടന്നുകൊണ്ടിരുന്ന കെട്ടിടം തകര്ന്നുവീണ് ഏഴു തൊഴിലാളികള് മരിച്ചു. നിരവധി പേര്ക്കു പരുക്കേറ്റു. ജാജ്മോയില് കാന്പുര് വികസന അതോറിറ്റി കോളനിയില് പണിതുകൊണ്ടിരുന്ന ഏഴുനില കെട്ടിടത്തിന്റെ മുകള്നിലകളാണ് ഇന്നലെ ഉച്ചയ്ക്കുശേഷം തകര്ന്നുവീണത്.
സമാജ്വാദി പാര്ട്ടിയുടെ പ്രാദേശിക നേതാവ് മഹ്താബ് ആലത്തിന്റെ ഉടമസ്ഥതയിലുള്ളതാണ് ഈ കെട്ടിടം. ഇയാള്ക്കും കെട്ടിടത്തിന്റെ കരാറുകാരനുമെതിരെ പൊലീസ് കേസ് റജിസ്റ്റര് ചെയ്തിട്ടുണ്ട്. ഇപ്പോഴും മുപ്പതോളം പേര് അവശിഷ്ടങ്ങള്ക്കിടയില് കുടുങ്ങിക്കിടക്കുന്നതായാണ് സൂചന.
അതിനാല് മരണസംഖ്യ ഇനിയും ഉയര്ന്നേക്കാം. ഇവരെ രക്ഷപ്പെടുത്താനായി വന്തോതിലുള്ള രക്ഷാപ്രവര്ത്തനം പുരോഗമിക്കുകയാണ്. സൈന്യവും ദേശീയ ദുരന്ത നിവാരണസേനയും പൊലീസും അഗ്നിശമന സേനയും ചേര്ന്നാണ് രക്ഷാപ്രവര്ത്തനം നടത്തുന്നത്. കെട്ടിടത്തിന്റെ നിര്മാണത്തിലെ ചില പ്രത്യേകതകള് കാരണം അവശിഷ്ടങ്ങള്ക്കിടയില് കുടുങ്ങിക്കിടക്കുന്നവരെ പുറത്തെടുക്കാന് സമയമെടുക്കുമെന്ന് ദേശീയ ദുരന്ത നിവാരണസേന വക്താവ് അറിയിച്ചു.
ബഹുനില കെട്ടിടത്തിന്റെ ആറാം നിലയില് പണി നടക്കുമ്പോഴാണ് സംഭവമെന്ന് പൊലീസ് വ്യക്തമാക്കി. കെട്ടിടം തകരാനിടയാക്കിയ കാരണം വ്യക്തമല്ല. അതേസമയം, നിര്മാണ പ്രവര്ത്തനങ്ങള്ക്കായി മോശം സാധനസാമഗ്രികള് ഉപയോഗിച്ചതാണ് അപകടത്തിന് കാരണമായതെന്നാണ് പ്രാഥമിക വിവരം.
https://www.facebook.com/Malayalivartha
