ഹൃദയത്തെ മരവിപ്പിക്കുന്ന അനേകം വാര്‍ത്തകള്‍ നാം കേള്‍ക്കുന്നുണ്ട്. എന്നാല്‍ ചില മനുഷ്യത്വരഹിതമായ പ്രവൃത്തികള്‍ കണ്ടാല്‍ ചിലപ്പോഴെങ്കിലും ഒന്നു ഇരുന്ന് ചിന്തിച്ചു പോകും. ഇവിടെ നിറഗര്‍ഭിണിയായ യുവതിയുമായി ആശുപത്രിയിലേക്ക് പോകുകയായിരുന്നയാളെ മറ്റൊരു യുവതി തടയുകയും യുവാവിനെ പിന്നാലെ നടത്തിക്കുകയും ഒടുവില്‍ താക്കോല്‍ വലിച്ചെറിയുന്നതുമായ വീഡിയോ വൈറലാകുകയാണ്.

മനുഷ്യത്വം എന്താണെന്നറിയാത്തതിന്റെ സുചന നല്‍കുന്നതാണ് ഈ സംഭവം. ഗസിയാബാദിനും മോഡി നഗറിനും ഇടയില്‍ എന്‍എച്ച്8 ല്‍ നടന്ന ഒരു അപകടവും അതിനെ തുടര്‍ന്നുള്ള സംഭവവുമാണ് വീഡിയോയില്‍ പ്രതിപാദിക്കുന്നത്. നിറ ഗര്‍ഭിണിയായ ഭാര്യയുമായി യുവാവ് ആശുപത്രിയിലേക്ക് പോകുന്നതിനിടയില്‍ ഇയാളുടെ വാഹനം യുവതി വന്ന ഓഡിയുമായി തട്ടി. യുവതി കാര്‍ നിര്‍ത്തി ഇറങ്ങിവന്ന യുവാവിന്റെ കാര്‍ തടയുകയും പോകാന്‍ അനുവദിക്കാതെ താക്കോല്‍ കൊണ്ടുപോകുകയും ചെയ്തു. നിസ്സഹായയായ യുവതി കാറിനുള്ളില്‍ വേദന കൊണ്ടു പുളയുന്നതും ഇവരുടെ മകന്‍ വിഷമത്തോടെ നില്‍ക്കുന്നതും കാണാം.

താക്കോലിന് വേണ്ടി ഭര്‍ത്താവും യാചിച്ചെങ്കിലും യുവതി കൊടുക്കാന്‍ കൂട്ടാക്കിയില്ല. മറ്റുള്ളവരും യുവതിയോട് ആവശ്യപ്പെട്ടിട്ടും അവര്‍ വഴങ്ങിയതേയില്ല. ആരു പറഞ്ഞിട്ടും യുവതി കേള്‍ക്കാത്ത മട്ടായി. സംഭവത്തില്‍ പോലീസ് ഇടപെടിട്ടു പോലും രക്ഷയുണ്ടായില്ല.

ഒടുവില്‍ നാട്ടുകാരെല്ലാം കൂടി യുവതിക്ക് നേരെ തിരിഞ്ഞതോടെ സംഗതി പന്തിയല്ലെന്ന് തിരിച്ചറിഞ്ഞ യുവതി താക്കോല്‍ തിരിച്ചു കൊടുക്കാന്‍ തയ്യാറായി. അപ്പോഴും യുവാവിന്റെ കയ്യില്‍ കൊടുക്കാന്‍ കൂട്ടാക്കാതെ യുവതി അത് വലിച്ചെറിഞ്ഞു.