വിവാഹ നിശ്ചയത്തിന് മൂന്ന് ദിവസം മുന്‍പ് യുവതിയും പ്രായമായ മാതാപിതാക്കളും ആത്മഹത്യ ചെയ്ത നിലയില്‍ കണ്ടെത്തി. തമിഴ്‌നാട് ഈറോഡിലെ ചിന്നയംപാളയം ഗ്രാമത്തിലെ കൃതിക(31), അച്ഛന്‍ മനോഹരന്‍(60) അമ്മ രാധാമണി(55) എന്നിവരാണ് വ്യാഴാഴ്ച രാത്രി വീട്ടില്‍ വിഷം കഴിച്ച് ആത്മഹത്യ ചെയ്തത നിലയില്‍ കണ്ടെത്തിയത്.

ഈറോഡിലെ ഒരു സ്വകാര്യ ബാങ്കില്‍ മാനേജറായ കൃതികയുടെ വിവാഹനിശ്ചയ ചടങ്ങ് ഫെബ്രുവരി 6 തിങ്കളാഴ്ച നടത്താന്‍ തീരുമാനിച്ചതായിരുന്നു. ഇതിന്റെ ഭാഗമായി ബന്ധുക്കളെ ക്ഷണിക്കലും മറ്റു ഒരുക്കങ്ങളുമെല്ലാം പൂര്‍ത്തിയാക്കുകയും ചെയ്തിരുന്നു. കേരളത്തില്‍ നിന്നുള്ള യുവാവാണ് വിവാഹം ചെയ്യാനിരുന്നത്.ഇതിനിടയിലാണ് കൃതികയും മാതാപിതാക്കളും ആത്മഹത്യ ചെയ്തതിരിക്കുന്നത്. ഫെബ്രുവരി 2 വ്യാഴാഴ്ചയാണ് മൂവരും വിഷം കഴിച്ച് ആത്മഹത്യ ചെയ്തത്.

എന്നാല്‍ മരണം സംഭവിച്ച് മണിക്കൂറുകള്‍ക്ക് ശേഷമാണ് സംഭവം പുറത്തറിയുന്നത്. രാവിലെ പാലുമായി വന്നയാള്‍ എത്ര വിളിച്ചിട്ടും വാതില്‍ തുറക്കാതിരുന്നപ്പോഴാണ് ബന്ധുക്കളെ വിവരം അറിയിച്ചത്. തുടര്‍ന്ന് വാതില്‍ ചവിട്ടിപ്പൊളിച്ച് അകത്ത് കടന്ന ബന്ധുക്കളും അയല്‍വാസികളുമാണ് മൂവരെയും മരിച്ച നിലയില്‍ കണ്ടെത്തിയത്. സംഭവ സ്ഥലത്ത് നിന്നും കൃതികയുടെ അച്ഛന്‍ എഴുതിയതെന്ന് കരുതുന്ന മൂന്ന് കുറിപ്പുകള്‍ കണ്ടെടുത്തിട്ടുണ്ട്. പുറത്ത് പറയാന്‍ കഴിയാത്ത മാനസിക പ്രയാസവും ചില വിഭ്രാന്തികളുമാണ് തങ്ങളെ ആത്മഹത്യയിലേക്ക് നയിച്ചതെന്നാണ് ഒരു കുറിപ്പില്‍ മനോഹരന്‍ എഴുതിയിരിക്കുന്നത്.

മരണാനന്തര ചടങ്ങുകള്‍ക്കായി ആവശ്യമുള്ള പണം ഒരു ബാഗിലായി സൂക്ഷിച്ചിട്ടുണ്ടെന്നും, അത് ഉപയോഗിക്കണമെന്നും ഒരു കുറിപ്പില്‍ മനോഹരന്‍ സൂചിപ്പിച്ചിട്ടുണ്ട്. യുവതിയുടെയും മാതാപിതാക്കളുടെയും ആത്മഹത്യ സംബന്ധിച്ച് കൂടുതല്‍ വിവരങ്ങള്‍ ശേഖിച്ചു വരികയാമെന്നും, സംഭവത്തില്‍ കൂടുതല്‍ അന്വേഷണം നടത്തുമെന്നും പോലീസ് അറിയിച്ചു.