എംജി.ആര്.അനുയായികളും ശശികലയും
തമിഴ്നാട്ടിലെ രാഷ്ട്രീയ പോരാട്ടം ഒ.പനീര്സെല്വവും അണ്ണാ ഡിഎംകെ ജനറല് സെക്രട്ടറി ശശികലയും തമ്മിലാണെങ്കില് അണിയറയില് എംജിആര് അനുയായികളും മന്നാര്ഗുഡി സംഘവും തമ്മിലാണ് ഏറ്റുമുട്ടുന്നത്. എംജിആറിന്റെ കാലത്ത് അദ്ദേഹത്തിന്റെ വിശ്വസ്തരായിരുന്നവരാണ് ഇപ്പോള് പനീര്സെല്വത്തിനു പിന്നിലുള്ളത്. മറുപക്ഷത്തിന്റെ നിയന്ത്രണം ശശികലയുടെ കുടുംബാംഗങ്ങള്ക്കും പനീര്സെല്വത്തോടു താല്പര്യമില്ലാത്ത നേതാക്കള്ക്കുമാണ്.
അണ്ണാ ഡിഎംകെയുടെ രൂപീകരണസമയത്ത് എംജിആറിനുപോലും ഉപദേശങ്ങള് നല്കിയിട്ടുള്ള ഇ.മധുസൂദനനാണ് പനീര്സെല്വം പക്ഷത്തെ പ്രധാനി. പനീര്സെല്വത്തിനു പിന്തുണ പ്രഖ്യാപിച്ചതിനു പിന്നാലെ അദ്ദേഹത്തെ ശശികല പുറത്താക്കി.പാര്ട്ടി പ്രസീഡിയം ചെയര്മാനായിരുന്നു മധുസൂദനന്. മുന് നിയമസഭാ സ്പീക്കര് പി.എച്ച്.പാണ്ഡ്യന്, മുന് മന്ത്രിമാരായ കെ.പി.മുനുസാമി, നത്തം ആര്.വിശ്വനാഥന്, സി.പൊന്നയ്യന് എന്നിവരാണ് അവിടത്തെ രാഷ്ട്രീയ ആസൂത്രകര്. പാര്ട്ടിയില് അവഗണിക്കപ്പെട്ടവരാണ് ഇവരില് പലരും.
ശശികല പക്ഷത്തുനിന്ന് ആളുകളെ ആകര്ഷിക്കുന്നതിനു നേതൃത്വം കൊടുക്കുന്നതു മന്ത്രി കെ.പാണ്ഡ്യരാജനും രാജ്യസഭാംഗം വി.മൈത്രേയനുമാണ്. ആര്.നടരാജ് ഉള്പ്പെടെയുള്ള ചില എംഎല്എമാരുമായി പാണ്ഡ്യരാജന് ചര്ച്ച നടത്തി. ഗവര്ണറുമായുള്ള ചര്ച്ചകള് നടത്തുന്നതു മൈത്രേയനാണ്. കഴിഞ്ഞ ദിവസവും മൈത്രേയന് ഗവര്ണറെ കണ്ടിരുന്നു. പാര്ട്ടിയുടെ ജില്ലാ, പ്രാദേശിക നേതാക്കളുമായും പനീര്സെല്വം പക്ഷത്തെ നേതാക്കള് നിരന്തരം ബന്ധപ്പെടുന്നുണ്ട്.
ശശികല പക്ഷത്തു ലോക്സഭാ ഡപ്യൂട്ടി സ്പീക്കര് എം.തമ്ബിദുരൈയാണു പ്രധാന ആസൂത്രകന്. കെ.എ.സെങ്കോട്ടയ്യന്, എടപ്പാടി കെ.പളനിസാമി, ആര്.വൈദ്യലിംഗം എന്നിവരാണ് എംഎല്എമാരെ ഏകോപിപ്പിക്കുന്നത്. അണിയറയിലെ ചരടുവലികളില് പ്രധാനികള് ശശികലയുടെ കുടുംബാംഗങ്ങള്തന്നെയാണ്. മഹാബലിപുരം കൂവത്തൂര് റിസോര്ട്ടില് നിന്ന് എംഎല്എമാര് ചോര്ന്നുപോകാതിരിക്കാനുള്ള ചുമതല ശശികലയുടെ സഹോദരപുത്രന്മാരായ ടി.ടി.വി.ദിനകരന്, ഡോ. എസ്.വെങ്കടേഷ് എന്നിവര്ക്കാണെന്നാണു സൂചന. ശശികലയുടെ ഭര്ത്താവ് നടരാജന് ഡല്ഹിയില് ക്യാംപ് ചെയ്യുന്നുണ്ട്. എംഎല്എമാര് ഇനിയും കൊഴിയുകയാണെങ്കില് കോണ്ഗ്രസ് പിന്തുണ ഉറപ്പാക്കുകയാണു ലക്ഷ്യം.
അതേസമയം, കാവല് മുഖ്യമന്ത്രി ഒ.പനീര്സെല്വത്തിനെതിരെ വധഭീഷണി മുഴക്കിയെന്ന് ആരോപിച്ചു ശശികല പക്ഷത്തെ പ്രമുഖ നേതാവായ മുന് എംഎല്എ വി.പി.കലൈരാജനെതിരെ കേസെടുത്തു. പനീര്സെല്വത്തിനെതിരെ അദ്ദേഹം നടത്തിയ വിവാദ പ്രസ്താവനയെ തുടര്ന്നാണു കേസ്. അണ്ണാ ഡിഎംകെ സൗത്ത് ചെന്നൈ ജില്ലാ സെക്രട്ടറിയാണു കലൈരാജന്. തനിക്കെതിരെയുള്ള രാഷ്ട്രീയ പകപോക്കലാണു കേസെന്നു കലൈരാജന് ആരോപിച്ചു.
യുപി, കര്ണാടക കേസുകളിലെ വിധി മാതൃകയാക്കാന് ഗവര്ണര്ക്ക് ഉപദേശം. തമിഴ്നാട്ടിലെ സംഭവവികാസങ്ങളില് അറ്റോര്ണി ജനറല് മുകുള് റോഹത്ഗിയില്നിന്ന് ഗവര്ണര് വിദ്യാസാഗര് റാവുവിനു നിയമോപദേശം ലഭിച്ചു. 1998ല് സമാന സാഹചര്യം യുപിയിലുണ്ടായപ്പോള് സുപ്രീം കോടതി പുറപ്പെടുവിച്ച വിധി ചൂണ്ടിക്കാട്ടിക്കൊണ്ടുള്ളതാണ് നിയമോപദേശം.
തമിഴ്നാട്ടില് കാവല് മുഖ്യമന്ത്രി ഒ. പനീര്സെല്വവും അണ്ണാ ഡിഎംകെ ജനറല് സെക്രട്ടറി ശശികലയും ഒരേ പോലെ ഭൂരിപക്ഷത്തിനുള്ള അവകാശ വാദം ഉന്നയിക്കുകയാണ്. 98ല് യുപിയില് കല്യാണ് സിങ്ങും വിമത നേതാവ് ജഗദംബികാ പാലും ഇതുപോലെ ഭൂരിപക്ഷം അവകാശപ്പെട്ടിരുന്നു. അന്ന് മുഖ്യമന്ത്രി ആയിരുന്ന കല്യാണ് സിങ്ങിനെ ഗവര്ണര് രമേഷ് ഭണ്ഡാരി പുറത്താക്കി. തുടര്ന്ന് ജഗദംബികാ പാല് മുഖ്യമന്ത്രിയായി. എന്നാല് കല്യാണ്സിങ് ഇതിനെതിരെ അലഹാബാദ് ഹൈക്കോടതിയെ സമീപിച്ചു. നിയമസഭയില് ഭൂരിപക്ഷം തെളിയിക്കാനാണു കോടതി ഉത്തരവിട്ടത്. ഇതിനെതിരെ ജഗദംബികാ പാല് സുപ്രീംകോടതിയെ സമീപിച്ചു. ഹൈക്കോടതി ഉത്തരവ് ശരിവയ്ക്കുകയാണ് സുപ്രീംകോടതി ചെയ്തത്. തുടര്ന്ന് കല്യാണ് സിങ് നിയമസഭയില് ഭൂരിപക്ഷം തെളിയിച്ച് വീണ്ടും മുഖ്യമന്ത്രിയായി. ജഗദംബികാ പാല് മൂന്നു ദിവസം മാത്രമേ മുഖ്യമന്ത്രിയായിരുന്നുള്ളൂ.
കര്ണാടകയിലെ എസ്.ആര്.ബൊമ്മെ കേസില് സുപ്രീംകോടതിയുടെ ഒന്പതംഗ ഭരണഘടനാ ബെഞ്ച് പുറപ്പെടുവിച്ച വിധിയും സമാനമായ എല്ലാ സാഹചര്യത്തിലും അടിസ്ഥാനമായി സ്വീകരിക്കുന്നുണ്ട്. ഒരു സര്ക്കാരിന്റെ ഭൂരിപക്ഷം തെളിയിക്കേണ്ടത് നിയമസഭയ്ക്കുള്ളിലാണ് എന്നായിരുന്നു ആ വിധി.
https://www.facebook.com/Malayalivartha
