അനധികൃത സ്വത്ത് സമ്പാദനക്കേസില്‍ ശിക്ഷിക്കപ്പെട്ട് പരപ്പന അഗ്രഹാര ജയിലില്‍ കഴിയുന്ന വി.കെ ശശികലയുടെ തൊട്ടടുത്ത സെല്ലിലുള്ളത് കുപ്രസിദ്ധ കുറ്റവാളി സയനൈഡ് മല്ലിക. ജീവപര്യന്തം ശിക്ഷ അനുഭവിക്കുന്ന മല്ലിക മാത്രമാണ് ജയിലില്‍ ശശികലയോട് സംസാരിക്കാന്‍ ശ്രമിച്ചത്. എന്നാല്‍ മല്ലികയോട് ചിരിച്ചുകൊണ്ട് ഒഴിഞ്ഞുമാറുകയാണ് ശശികല ചെയ്തത്.

ആറു പേരെ കൊലപ്പെടുത്തിയ കെ.ഡി കെംപണ്ണ എന്ന മല്ലിക പോലീസ് പിടിയിലാവുന്നത് 2007 ഡിസംബര്‍ 31 നാണ്. തമിഴ്‌നാട്ടില്‍ ഒന്നും കര്‍ണാടകത്തില്‍ അഞ്ചും കൊലകളാണ് മല്ലിക നടത്തിയത്. ക്ഷേത്രപരിസരങ്ങളില്‍ തമ്പടിച്ച് പണക്കാരായ സ്ത്രീകളുമായി ചങ്ങാത്തം സ്ഥാപിച്ചായിരുന്നു ഇവരുടെ പ്രവര്‍ത്തനം. ബന്ധം സ്ഥാപിച്ചശേഷം പൂജയ്ക്ക് എന്ന പേരില്‍ ദൂരസ്ഥലങ്ങളിലേക്ക് കൊണ്ടുപോയശേഷം സയനൈഡ് കലര്‍ത്തിയ ഭക്ഷണം നല്‍കി കൊന്നശേഷം സ്വര്‍ണാഭരണങ്ങള്‍ കവരുകയായിരുന്നു ഇവരുടെ രീതി.