ജീവനക്കാരുടെ പ്രൊവിഡന്റ് ഫണ്ട് അക്കൗണ്ടില്‍ നിന്നുള്ള പണം പിന്‍വലിക്കാനുള്ള നടപടിക്രമം വളരെ ലളിതമാക്കുന്നു. വിവിധ ആവശ്യങ്ങള്‍ക്ക് പണം പിന്‍വലിക്കാന്‍ ഇനി മുതല്‍ ഒട്ടേറെ അപേക്ഷ ഫോറങ്ങള്‍ സമര്‍പ്പിക്കേണ്ട. അപേക്ഷയോടൊപ്പം പലവിധത്തിലുള്ള സാക്ഷ്യപത്രങ്ങളും ഹാജരാക്കേണ്ടതില്ല. പൊതുവായ ഒറ്റ അപേക്ഷഫോറം മതിയാകും. കൂടാതെ, അക്കൗണ്ടില്‍ നിന്ന് പണം പിന്‍വലിക്കുന്നതിന് യൂട്ടിലൈസേഷന്‍ സര്‍ട്ടിഫിക്കറ്റ് നല്‍കണമെന്ന വ്യവസ്ഥയും ഒഴിവാക്കി.
വിവിധ ആവശ്യങ്ങള്‍ക്കായി പണം പിന്‍വലിക്കുന്നതിനും അഡ്വാന്‍സ് കൈപ്പറ്റുന്നതിനും ആധാര്‍ മതിയാകും. ആധാര്‍ സമര്‍പ്പിച്ചുള്ള അപേക്ഷകള്‍ക്ക് തൊഴിലുടമയുടെ സാക്ഷ്യപത്രം ആവശ്യമില്ല. സ്വയം സാക്ഷ്യപ്പെടുത്തിയാല്‍ മതിയാകും. ആധാര്‍ ഇല്ലാത്തവയ്ക്ക് തൊഴിലുടമ സാക്ഷ്യപ്പെടുത്തേണ്ടിവരും. ആധാറും ബാങ്ക് അക്കൗണ്ട് വിശദാംശങ്ങളും യൂണിവേഴ്‌സല്‍ അക്കൗണ്ട് നമ്പറുമായി ബന്ധിപ്പിച്ചിരിക്കുന്ന തൊഴിലാളിക്ക് തൊഴിലുടമയുടെ സാക്ഷ്യപ്പെടുത്തലില്ലാതെ അപേക്ഷ നേരിട്ട് പ്രൊവിഡന്റ് ഫണ്ട് ഓര്‍ഗനൈസേഷനില്‍ സമര്‍പ്പിക്കാം. ഫോം നമ്പര്‍ 19(യുഎഎന്‍), 10സി (യുഎഎന്‍), 31 (യുഎഎന്‍) എന്നിവയ്ക്ക് പകരമാണ് സമഗ്രമായ ഒറ്റ അപേക്ഷഫോറം.
ഭവന വായ്പ, വീടുവയ്ക്കാന്‍ ഭൂമി വാങ്ങല്‍, ഭവന നിര്‍മ്മാണം, ഭവനം മോടിപിടിപ്പിക്കല്‍, ഭവനവായ്പയുടെ തിരിച്ചടവ് തുടങ്ങിയവയ്ക്ക് പണം പിന്‍വലിക്കുമ്പോള്‍ ഇനി പുതിയ സാക്ഷ്യപത്രം നല്‍കേണ്ട. വിവാഹത്തിനുള്ള അഡ്വാന്‍സ്, കുട്ടികളുടെ വിദ്യാഭ്യാസ ചെലവ് എന്നിവയ്ക്ക് അപേക്ഷിക്കുമ്പോള്‍ വിവാഹക്ഷണക്കത്തോ മറ്റ് രേഖകളോ നല്‍കേണ്ടതില്ല. അസാധാരണ സന്ദര്‍ഭങ്ങള്‍ പണം പിന്‍വലിക്കുന്നതിനുള്ള അപേക്ഷകള്‍ക്കും രേഖ വേണ്ട. വീട് അല്ലെങ്കില്‍ വസ്തുവിന് നാശനഷ്ടം സംഭവിച്ചുവെന്ന് സ്വയം സാക്ഷ്യപ്പെടുത്തിയാല്‍ മതിയാകും.