സൗജന്യ സേവനങ്ങള്‍ റിലയന്‍സ് ജിയോ തുടരുമെന്ന് പ്രഖ്യാപിച്ചതിന് പിന്നാലെ വിപണിയില്‍ പിടിച്ച് നില്‍ക്കാനുള്ള പുതു തന്ത്രങ്ങളുമായി മറ്റ് മൊബൈല്‍ സേവനദാതാക്കള്‍. എയര്‍ടെല്ലാണ് പുതിയ ഓഫറുമായി ഇപ്പോള്‍ രംഗത്തെത്തിയിരിക്കുന്നത്. 100 രൂപക്ക് ഒരു മാസത്തേക്ക് 10 ജിബി ഡാറ്റ നല്‍കുമെന്നാണ് എയര്‍ടെല്‍ അറിയിച്ചിരിക്കുന്നത്.

എയര്‍ടെല്ലിന്റെ പോസ്റ്റ്‌പെയ്ഡ് ഉപഭോക്താകള്‍ക്കാണ് ഓഫര്‍ ലഭ്യമാകുക. നിലവില്‍ 500 രൂപക്ക് 3 ജിബി ഡാറ്റയാണ് എയര്‍ടെല്‍ നല്‍കുന്നത്. ഇതിനൊപ്പം 100 രൂപ കൂടി നല്‍കിയാല്‍ 13 ജിബി ഡാറ്റ ലഭിക്കും.

303 രൂപക്ക് 30 ജിബി ഡാറ്റയാണ് ജിയോ നല്‍കുന്നത്. ഈ ഓഫര്‍ പ്രകാരം കോളുകളും മെസേജുകളും പരിപൂര്‍ണ സൗജന്യമാണ്. കഴിഞ്ഞ വര്‍ഷം സെപ്തംബറിലായിരുന്നു ജിയോ ഇന്ത്യയില്‍ സേവനമാരംഭിച്ചത്. പരിപൂര്‍ണ സൗജന്യ സേവനങ്ങളായിരുന്നു ജിയോ നല്‍കിയത്. ഈ വര്‍ഷം മാര്‍ച്ചില്‍ സൗജന്യ സേവനം അവസാനിക്കാനിരിക്കെയാണ് പുതിയ ഓഫര്‍ ജിയോ പ്രഖ്യാപിച്ചത്.