കൊല്‍ക്കത്ത നഗരത്തിലെ ഏറ്റവും വലിയ ഹോള്‍സെയില്‍ വിപണിയായ ബുറാബസാറില്‍ ഇന്നലെ രാത്രി വന്‍ തീപിടിത്തം. ബുറാബസാറിലെ ഒരു കെട്ടിടത്തിലാണ് തീപിടിത്തമുണ്ടായത്. രാത്രി ഒന്‍പതരയോടെയാണ് സംഭവം. അഗ്‌നിശമന സേനയുടെ 30 വാഹനങ്ങള്‍ തീയണയ്ക്കാന്‍ രംഗത്തുണ്ട്. തീപിടിത്തം നിയന്ത്രണവിധേയമായെങ്കിലും പൂര്‍ണമായി അണയ്ക്കാനായിട്ടില്ല. കെട്ടിടത്തില്‍നിന്ന് ഏഴോളം പേരെ രക്ഷപ്പെടുത്തിയിട്ടുണ്ട്. തീപിടിത്തത്തിന്റെ കാരണം വ്യക്തമായില്ലെങ്കിലും ഗ്യാസ് സിലിണ്ടര്‍ പൊട്ടിത്തെറിയും ഷോര്‍ട്ട് സര്‍ക്യൂട്ട് ഉള്‍പ്പെടെയുള്ളവയും പരിശോധിക്കുന്നുണ്ട്.

സമീപം താമസിക്കുന്നവരെ ഒഴിപ്പിച്ചു. തീപിടിച്ച കെട്ടിടത്തിലേക്ക് എത്തുന്ന വഴി ചെറുതായത് രക്ഷാപ്രവര്‍ത്തകരെ ബുദ്ധിമുട്ടിലാക്കി. സമീപമുള്ള കെട്ടിടങ്ങള്‍ക്കുമുകളില്‍ കയറിയാണ് തീ അണയ്ക്കാന്‍ ശ്രമിക്കുന്നത്. കെട്ടിടത്തിലുണ്ടായിരുന്ന ഗ്യാസ് സിലിണ്ടര്‍ പൊട്ടിത്തെറിച്ച് മറ്റു ചിലര്‍ക്കു പരുക്കേറ്റിട്ടുണ്ട്. ഗോഡൗണുകളും വീടുകളും ഓഫിസുകളും മറ്റു കടകളും ഉള്ള കെട്ടിടത്തില്‍ തീയണയ്ക്കുന്നതിനുള്ള സുരക്ഷാ ഉപകരണങ്ങള്‍ ഒന്നും ഉണ്ടായിരുന്നില്ലെന്ന് കൊല്‍ക്കത്ത മേയല്‍ സോവന്‍ ചാറ്റര്‍ജി അറിയിച്ചു.