ഉത്തര്‍പ്രദേശിലും മണിപ്പൂരിലും അവസാനഘട്ട വോട്ടെടുപ്പ് ആരംഭിച്ചു .  ഉത്തര്‍പ്രദേശിലെ ഏഴാം ഘട്ടവും മണിപ്പൂരിലെ രണ്ടാം ഘട്ടവും വോട്ടെടുപ്പാണ് ഇന്നു നടക്കുന്നത്. ഇതോടെ, കഴിഞ്ഞ മാസം നാലിന് ആരംഭിച്ച് എട്ടു ദിവസങ്ങളിലായി നടന്ന വോട്ടെടുപ്പു പൂര്‍ത്തിയാകും. പഞ്ചാബ്, ഉത്തരാഖണ്ഡ്, ഗോവ എന്നിവയാണ് നേരത്തേ വോട്ടെടുപ്പു പൂര്‍ത്തിയായ സംസ്ഥാനങ്ങള്‍. യുപിയിലും ഉത്തരാഖണ്ഡിലുമായി രണ്ടു മണ്ഡലങ്ങളില്‍ കൂടി വോട്ടെടുപ്പ് നടക്കാനുള്ളതിനാല്‍ നാളെ വൈകിട്ടു മാത്രമേ എക്‌സിറ്റ് പോള്‍ ഫലങ്ങള്‍ പുറത്തുവരികയുള്ളൂ. അടുത്ത ശനിയാഴ്ചയാണു വോട്ടെണ്ണല്‍.

എന്നാല്‍, കൈക്കൂലി പരാമര്‍ശം നടത്തി തിരഞ്ഞെടുപ്പു പെരുമാറ്റച്ചട്ടം ലംഘിച്ചതിന്റെ പേരില്‍ യുപി മുഖ്യമന്ത്രി അഖിലേഷ് യാദവിനും തിരഞ്ഞെടുപ്പു കമ്മിഷന്‍ നോട്ടിസ് നല്‍കി. കൈക്കൂലി ആരു തന്നാലും വാങ്ങി, വോട്ട് തന്റെ ചിഹ്നമായ സൈക്കിളിനു നല്‍കണമെന്നാണ് അഖിലേഷ് പറഞ്ഞത്.
നേരത്തേ ഇതേ പരാമര്‍ശം നടത്തിയ ഡല്‍ഹി മുഖ്യമന്ത്രി അരവിന്ദ് കേജ്രിവാളിനും ബിജെപി നേതാവ് മനോഹര്‍ പരീക്കര്‍ക്കും കമ്മിഷന്‍ നോട്ടിസ് നല്‍കിയിരുന്നു.