ഛത്തിസ് ഗഡില്‍ സിആര്‍പിഎഫ് ജവാന്‍മാര്‍ക്കുനേരെയുണ്ടായ ആക്രമണത്തില്‍ 10 മാവോയിസ്റ്റുകള്‍ കൊല്ലപ്പെട്ടെന്ന് റിപ്പോര്‍ട്ട്. അഞ്ചുപേര്‍ക്കു പരുക്കേല്‍ക്കുകയും ചെയ്തു. സുഖ്മ ജില്ലയിലെ ചിന്താഗുഫയ്ക്കു സമീപം കലാ പാന്തറില്‍ ഉച്ചയ്ക്കു പന്ത്രണ്ടരയോടെയായിരുന്നു ആക്രമണം. ഇതില്‍ 25 സിആര്‍പിഎഫ് ജവാന്‍മാര്‍ കൊല്ലപ്പെട്ടിരുന്നു.

പ്രദേശത്ത് റോഡുനിര്‍മാണത്തില്‍ ഏര്‍പ്പെട്ടിരുന്ന 74 ബറ്റാലിയനിലെ ജവാന്‍മാരാണു കൊല്ലപ്പെട്ടത്. ജവാന്‍മാര്‍ ഉച്ചഭക്ഷണം കഴിക്കുന്ന സമയത്താണ് ആക്രമണം ഉണ്ടായത്. അതേസമയം, ഛത്തിസ്ഗഡില്‍ മാവോയിസ്റ്റ് വേട്ടയ്ക്കിറങ്ങുന്ന സുരക്ഷാ സേനയ്ക്കായി ബുള്ളറ്റ് - മൈന്‍ പ്രതിരോധ സംവിധാനമുള്ള 250 വാഹനങ്ങള്‍ വാങ്ങുമെന്ന് കേന്ദ്രസര്‍ക്കാര്‍ അറിയിച്ചു. ഛത്തിസ്ഗഡില്‍ ഏറ്റവും അധികം നക്‌സല്‍ ആക്രമണങ്ങള്‍ നടക്കുന്ന ബസ്തര്‍ മേഖലയില്‍ അര്‍ധസൈനിക വിഭാഗത്തിലെ 45,000 ജവാന്‍മാരെയും സംസ്ഥാന പൊലീസില്‍നിന്ന് 20,000 ഉദ്യോഗസ്ഥരെയുമാണു നിയോഗിച്ചിരിക്കുന്നത്.

ജവാന്‍മാരുടെ ജീവന്‍ നഷ്ടപ്പെടാന്‍ കാരണം സാമ്പത്തികമായ ബുദ്ധിമുട്ടുകള്‍ അല്ലെന്ന് ആഭ്യന്തരമന്ത്രാലയം വ്യക്തമാക്കി. സുരക്ഷാ കാര്യങ്ങള്‍ക്കായി 2011 മുതല്‍ 2014 വരെ ഓരോ വര്‍ഷവും 575 കോടി ചെലവിട്ടെങ്കില്‍ 2014 മുതല്‍ ഈ വര്‍ഷം വരെ അത് 675 കോടിയായി ഉയര്‍ത്തിയിട്ടുണ്ട്. അര്‍ധസൈനിക വിഭാഗങ്ങള്‍ക്കു നിലവില്‍ ഛത്തിസ്ഗഡില്‍ 58 മൈന്‍ പ്രതിരോധ വാഹനങ്ങളുണ്ട്. 30 എണ്ണം കൂടി വാങ്ങാനുള്ള നടപടിക്രമങ്ങള്‍ ആയിട്ടുണ്ട്. 42 ബുള്ളറ്റ് പ്രൂഫ് വാഹനങ്ങള്‍ ഇവിടെയുണ്ട്. 210 എണ്ണം വാങ്ങാനുള്ള നടപടിയുമായി.

നേരത്തേ വര്‍ഷത്തില്‍ ശരാശരി 30 നക്‌സലുകളെ വധിച്ചിരുന്നു. 2016ല്‍ വധിച്ച മാവോയിസ്റ്റുകളുടെ എണ്ണം 135 ആണ്. 2017ല്‍ ഇതുവരെ 32 നക്‌സലുകളാണു കൊല്ലപ്പെട്ടത്. 2017ല്‍ ഇതുവരെ 38 സിആര്‍പിഎഫ് ജവാന്‍മാര്‍ ഛത്തിസ്ഗഡില്‍ കൊല്ലപ്പെട്ടിട്ടുണ്ടെന്നും ആഭ്യന്തരമന്ത്രാലയം അറിയിച്ചു.