കശ്മീരിലെ പ്രശ്നങ്ങള് പരിഹരിക്കാന് രാഷ്ട്രീയ പാര്ട്ടികളുമായി ചര്ച്ചയ്ക്ക് തയാറെന്ന് കേന്ദ്ര സര്ക്കാര്, വിഘടനവാദികളുമായി ചര്ച്ചയ്ക്കു തയാറാല്ല; കേസ് വീണ്ടും മേയ് ഒന്പതിന് പരിഗണിക്കും
കശ്മീരിലെ പ്രശ്നങ്ങള് പരിഹരിക്കാന് അവിടെയുള്ള നിയമപരമായി പ്രവര്ത്തിക്കുന്ന രാഷ്ട്രീയ പാര്ട്ടികളുമായി ചര്ച്ചയ്ക്ക് തയാറാണെന്ന് കേന്ദ്ര സര്ക്കാര്. എന്നാല്, ഒരു കാരണവശാലും വിഘടനവാദികളുമായി ചര്ച്ചയ്ക്കു തയാറാല്ലെന്നും കേന്ദ്രസര്ക്കാര് സുപ്രീംകോടതിയില് അറിയിച്ചു. കേന്ദ്രസര്ക്കാരിന് വേണ്ടി ഹാജരായ അറ്റോര്ണി ജനറല് മുകുള് റോഹ്ത്തഗിയാണ് ഇക്കാര്യം കോടതിയെ അറിയിച്ചത്.
പ്രശ്നങ്ങള് പരിഹരിക്കാന് കേന്ദ്ര സര്ക്കാര് ഇടപെടുന്നില്ലെന്ന ജമ്മു കശ്മീര് ഹൈക്കോര്ട്ട് ബാര് അസോസിയേഷന്റെ ആരോപണത്തിലാണ് കേന്ദ്രം സുപ്രീം കോടതിയില് നിലപാട് വ്യക്തമാക്കിയത്. ചീഫ് ജസ്റ്റിസ് ജെ.എസ്.കേഹാര്, ജസ്റ്റിസുമാരായ ഡി.വൈ. ചന്ദ്രചൂഡ്, എസ്.കെ. കൗള് എന്നിവരടങ്ങിയ ബെഞ്ചാണ് വാദം കേട്ടത്.
കാര്യങ്ങള് ചര്ച്ച ചെയ്യാന് ജമ്മു കശ്മീര് മുഖ്യമന്ത്രി മെഹബൂബ മുഫ്തിയും പ്രധാനമന്ത്രി നരേന്ദ്ര മോഡിയും കഴിഞ്ഞ ദിവസം കൂടിക്കാഴ്ച നടത്തിയിരുന്നുവെന്നും എജി കോടതിയെ അറിയിച്ചു. കല്ലേറും അക്രമവും തടയുന്നതിനായി ചെയ്യാവുന്ന കാര്യങ്ങള് എന്തെല്ലാമാണെന്ന് പരിശോധിക്കാന് കോടതി നിര്ദേശം നല്കി. കാര്യങ്ങള് പരിഹരിക്കാന് ബാര് അസോസിയേഷന് വലിയ പങ്ക് വഹിക്കാന് സാധിക്കുമെന്ന് സുപ്രീം കോടതി നിരീക്ഷിച്ചു.
പ്രശ്നങ്ങള് അവസാനിപ്പിക്കുന്നതിന് എല്ലാ രാഷട്രീയ പാര്ട്ടികളും ഇടപെടണമെന്നും കോടതി ആവശ്യപ്പെട്ടു. കേസ് വീണ്ടും മേയ് ഒന്പതിന് പരിഗണിക്കും. ജമ്മു കശ്മീരില് സുരക്ഷാ സേനയും പ്രക്ഷോഭകരും തമ്മിലുള്ള സംഘര്ഷം രൂക്ഷമായി തുടരുകയാണ്.
https://www.facebook.com/Malayalivartha
