കുത്തിക്കുറിച്ചതും നിറം മങ്ങിയതുമായ കറന്‍സി നോട്ടുകള്‍ ബാങ്കുകള്‍ സ്വീകരിക്കണമെന്ന് റിസര്‍വ് ബാങ്കിന്റെ നിര്‍ദേശം. ഇത്തരം നോട്ടുകള്‍ ആര്‍.ബി.ഐയുടെ 'ക്ലീന്‍ നോട്ട്' നയത്തിന് അനുസരിച്ച് സ്വീകരിക്കുകയും പഴകിയ നോട്ടുകളായി പരിഗണിക്കുകയും വേണമെന്ന് ബാങ്കുകള്‍ക്ക് അയച്ച സര്‍ക്കുലറില്‍ ആവശ്യപ്പെട്ടു. ഇത്തരം നോട്ടുകള്‍ ബാങ്കുകള്‍ സ്വീകരിക്കുന്നില്ലെന്ന് വ്യാപകമായി പരാതി ലഭിച്ച പശ്ചാത്തലത്തിലാണ് സര്‍ക്കുലര്‍.

നേരത്തെ; പുതിയ 500, 2000 നോട്ടുകളില്‍ എന്തെങ്കിലും എഴുതിയാല്‍ നോട്ട് അസാധുവാകുമെന്ന് ആര്‍.ബി.ഐ അറിയിച്ചതായി സാമൂഹിക മാധ്യമങ്ങളില്‍ പ്രചാരണമുണ്ടായിരുന്നു. അത് ശരിയല്ലെന്ന് ആര്‍.ബി.ഐ പിന്നീട് വ്യക്തമാക്കി. മാത്രമല്ല, ഇത്തരമൊരു നിര്‍ദേശം നല്‍കിയത് ബാങ്ക് ജീവനക്കാരെ ഉദ്ദേശിച്ചാണെന്നും അവര്‍ നോട്ടില്‍ കുത്തിക്കുറിച്ചുവെക്കുന്നത് ശ്രദ്ധയില്‍പെട്ട സാഹചര്യത്തിലാണെന്നും അറിയിച്ചിരുന്നു.