കാശ്മീര് താഴ്വരയില് അശാന്തി വിതച്ച ജെയ്ഷെ മേധാവി ഖാലിദിനെ ഏറ്റുമുട്ടലില് വധിച്ചു
ഭീകര സംഘടനയായ ജെയ്ഷെ മുഹമ്മദിന്റെ മുതിര്ന്ന നേതാവ് ഖാലിദിനെ സൈന്യം ഏറ്റുമുട്ടലില് വധിച്ചു. തിങ്കളാഴ്ച രാവിലെയാണ് ജമ്മു കശ്മീരിലെ ലദൂരയില് ഏറ്റുമുട്ടല് നടന്നത്. കശ്മീര് താഴ്വരയില് ഭീകരപ്രവര്ത്തനങ്ങള്ക്ക് നേതൃത്വം നല്കിയിരുന്നത് ഖാലിദ് ആയിരുന്നുവെന്ന് സൈന്യം വ്യക്തമാക്കി.
ഏതാനും ദിവസം മുന്പ് ഇന്ത്യയിലേക്ക് 12 ഭീകരരെ നുഴഞ്ഞുകയറാന് സഹായിച്ചത് ഇയാള് ആയിരുന്നു. കഴിഞ്ഞ ദിവസങ്ങളില് ഭീകരരുമായി സൈന്യം ശക്തമായ ഏറ്റുമുട്ടല് നടത്തിയിരുന്നു. ഇന്നു പുലര്ച്ചെ ബദ്ഗാമില് ഒരു സൈനിക ഓഫീസറെ ഭീകരര് വധിച്ചിരുന്നു. ഡ്രംഗില് ജൂനിയര് കമ്മീഷണ്ഡ് ഓഫീസര് ആയ രാജ് കുമാര് ആണ് കൊല്ലപ്പെട്ടത്.
കഴിഞ്ഞയാഴ്ച ശ്രീനഗര് വിമാനത്താവളത്തില് നടന്ന ചാവേര് ആക്രമണത്തിനു പിന്നില് ഖാലിദ് ആണെന്ന് സംശയമുണ്ട്. അന്നത്തെ ആക്രമണത്തില് ഒരു സൈനികന് കൊല്ലപ്പെട്ടിരുന്നു. പാകിസ്താനില് പരിശീലനം ലഭിച്ച ഖാലിദ് 12-ാം ഭീകര സംഘത്തിന്റെ കമാന്ഡര് ആയിരുന്നു. സംഘത്തെ അതിര്ത്തി കടത്തികൊണ്ടുവന്നതും ഖാലിദ് ആണ്. സോപോര് കേന്ദ്രീകരിച്ചായിരുന്നു ഇവരുടെ പ്രവര്ത്തനം.
പുല്വാമയില് കഴിഞ്ഞ മാസം പോലീസ് സ്റ്റേഷനു നേര്ക്കുണ്ടായ ചാവേര് ആക്രമണത്തിനു പിന്നിലും ഇയാളെ സംശയിക്കുന്നു. അന്ന് എട്ട് സുരക്ഷാ ജീവനക്കാരാണ് കൊല്ലപ്പെട്ടത്. രണ്ടു മാസം മുന്പ് ബാരാമുള്ളയില് മൂന്നു സുരക്ഷാ ജീവനക്കാരെ വധിച്ചതിനു പിന്നിലും ഇയാളാണ്. കഴിഞ്ഞ വര്ഷം ബാരമുള്ളയില് നിന്ന് ജെയ്ഷെയുടെ ഉപകരണങ്ങള് ലഭിച്ചതോടെയാണ് ഇയാളിലേക്ക് അന്വേഷണം എത്തിയത്.
https://www.facebook.com/Malayalivartha
