ജനരക്ഷായാത്രയില് നിന്ന് അമിത്ഷാ മുങ്ങിയതെന്തിന്?
കേരളത്തില് വരുന്ന ലോക്സഭാ തെരഞ്ഞെടുപ്പില് ബി.ജെ.പിക്ക് മുന്നേറ്റം നടത്താന് ലക്ഷ്യമിട്ട് കുമ്മനം രാജശേഖന് നടത്തുന്ന ജനരക്ഷാ യാത്രയില് നിന്ന് ദേശീയ അധ്യക്ഷന് അമിത്ഷാ പിന്വാങ്ങിയത് സ്വന്തം കസേര തെറിപ്പിക്കാന് പാര്ട്ടിയിലെ ചിലര് നടത്തുന്ന നീക്കം കണ്ടിട്ടാണെന്ന് ആരോപണം. മുതിര്ന്ന മാധ്യമപ്രവര്ത്തകനായ വെങ്കിടേഷ് രാമകൃഷ്ണനാണ് ഉന്നയിച്ചത്.
അമിത് ഷായുടെ മകന്റെ നഷ്ടത്തിലായിരുന്ന കമ്പനി ബി.ജെ.പി അധികാരത്തിലെത്തിയ ശേഷം 16000 മടങ്ങ് ലാഭമായതിന് പിന്നില് വന് ക്രമക്കേടുണ്ടെന്ന വാര്ത്ത പുറത്ത് വന്നിരുന്നു. വാര്ത്ത ചോര്ത്തി കൊടുത്ത് കേന്ദ്രധനമന്ത്രി അരുണ് ജെയ്റ്റിലാണെന്ന് അമിത്ഷാ ക്യാമ്പിലുള്ള നേതാക്കള് ആക്ഷേപിക്കുന്നുണ്ടെന്നും വെങ്കിടേഷ് രാമകൃഷ്ണന് പറഞ്ഞു.
ഏതാനും ആഴ്ചകളായി അമിത്ഷായ്ക്കെതിരെ പാര്ട്ടിയില് ശക്തമായ വിമര്ശനം ഉയര്ന്നു വരുന്നു. ആര്.എസ്.എസിന്റെ നയപ്രഖ്യാപനമായ വിജയദശമി ദിന പ്രസംഗത്തില് സര് സംഘ് ചാനക് മോഹന് ഭാഗവത്ത് കേന്ദ്രസര്ക്കാരിനെതിരെ രൂക്ഷവിമര്ശനമാണ് നടത്തിയത്. ഇടത്തരം കച്ചവടക്കാര്, കര്ഷകര്, തൊഴില് രഹിതരായ യുവാക്കള് എന്നിവര് ഗ്ളോബലൈസേഷന്റെ ഭാഗമായി കേന്ദ്രസര്ക്കാര് നടത്തുന്ന സാമ്പത്തിക രീതിയില് തൃപ്തരല്ലെന്നും അദ്ദേഹം പ്രസംഗത്തില് വ്യക്തമാക്കിയിരുന്നു. കേന്ദ്രസര്ക്കാരിന്റെ നില പരിതാപകരമാണെന്ന് എന്.ഡി.എയുടെ മുന് ധനമന്ത്രിയായ യശ്വന്സിംഗ് ഇന്ത്യന് എക്സ്പ്രസില് ലേഖനമെഴുതി. കേന്ദ്രസര്ക്കാരിന്റെ പോളിസികള്ക്കെതിരെ സുബ്രഹ്മണ്യം സ്വാമിയും രംഗത്ത് എത്തിയിട്ടുണ്ട്.
കേരള ബി.ജെ.പി അധ്യക്ഷന് കുമ്മനം രാജശേഖരന് നടത്തുന്ന ജനരക്ഷാമാര്ച്ച് മുഖ്യമന്ത്രി പിണറായി വിജയന്റെ നാടായ പിണറായിലൂടെ നയിക്കാന് താനും ഉണ്ടാകുമെന്ന് പ്രഖ്യാപിച്ചാണ് അമിത് ഷാ ഡല്ഹിയില് നിന്ന് പറന്നത്. എന്നാല് പിണറായി എത്തും മുമ്പ് അദ്ദേഹം യാത്രയില് നിന്ന് പിന്മാറി. കേരളത്തിലെ സി.പി.എമ്മിന്റെ അക്രമരാഷ്ട്രീയം ദേശീയതലത്തില് തുറന്നുകാട്ടാനാണ് അമിത് ഷാ എത്തിയത്. എന്നാല് സ്വന്തം നില പരുങ്ങലിലാണെന്ന് അറിഞ്ഞ് രായിക്കുരാമാനം അദ്ദഹേം ഇന്ദ്രപ്രസ്ഥത്തിലേക്ക് തിരിച്ച് പറന്നു.
https://www.facebook.com/Malayalivartha
