ബി.ജെ.പി ദേശീയ അധ്യക്ഷന്‍ അമിത് ഷായുടെ മകന്‍ ജെയ് ഷായുടെ ഉടമസ്ഥതയിലുള്ള ടെംപിള്‍ എന്റര്‍ൈപ്രസസ് പ്രൈവറ്റ് ലിമിറ്റഡ് കമ്പനിയുടെ വരുമാനം ഒരു വര്‍ഷത്തിനിടെ 16,000 മടങ്ങ് വര്‍ദ്ധിച്ചെന്ന വാര്‍ത്ത ദ വയര്‍ എന്ന വെബ് പോര്‍ട്ടല്‍ പുറത്ത് കൊണ്ടുവരുമെന്ന് അറിഞ്ഞ് ജെയ് ഷാ നിയമനടപടിക്ക് ഒരുങ്ങിയെന്ന് എം.ബി രാജേഷ് എം.പി ആരോപിച്ചു. വാര്‍ത്ത പുറത്ത് കൊണ്ടുവന്ന രോഹിണി സിംഗും ജെയ് ഷായും തമ്മിലുള്ള ചാറ്റിന്റെ സ്‌ക്രീന്‍ ഷോട്ട് പ്രമുഖ മാധ്യമപ്രവര്‍ത്തകനും ദ ഹിന്ദുവിന്റെ മുന്‍ എഡിറ്ററുമായ സിദ്ധാര്‍ദ്ധ് വരദരാജന്‍ ട്വിറ്ററില്‍ ഇട്ടിട്ടുണ്ട്.

വാര്‍ത്ത വരുംമുമ്പ് രോഹിണി സിംഗ് ജെയ് ഷായുമായി ചാറ്റില്‍ ബന്ധപ്പെട്ടിരുന്നു. താനിപ്പോള്‍ നാട്ടിലില്ലെന്നും അഹമ്മദാബാദിലെത്തിയാല്‍ ചാര്‍ട്ടേഡ് അക്കൗണ്ടുമായി കണ്‍സള്‍ട്ട് ശേഷം ലാഭ വര്‍ദ്ധനയെക്കുറിച്ച് പ്രതികരിക്കാമെന്ന് അതില്‍ പറയുന്നുണ്ട്. എന്നാല്‍ ചാര്‍ട്ടേഡ് അക്കൗണ്ടിനെ ബന്ധപ്പെടാതെ കേന്ദ്ര സര്‍ക്കാരിന്റെ അഡീഷണല്‍ സോളിസിറ്റര്‍ ജനറലായ, ഗുജറാത്ത് സ്വദേശി തുഷാര്‍ മേത്തയെയാണ് വിളിച്ചതെന്ന് എം.ബി രാജേഷ് ആരോപിക്കുന്നു. ജെയ് ഷായ്ക്ക് വേണ്ടി താന്‍ കോടതിയില്‍ ഹാജരാകുമെന്നും അതിന് നിയമമന്ത്രാലയത്തിന്റെ അനുമതി ലഭിച്ചിട്ടുണ്ടെന്നും തുഷാര്‍ മേത്ത വ്യക്തമാക്കിയിരുന്നു. വാര്‍ത്ത പുറത്ത് വരുന്നതിന് മുമ്പ് നീക്കങ്ങള്‍ നടന്നതിന് തെളിവാണിതെന്നും എം.ബി രാജേഷ് ആരോപിച്ചു.

ഈ മാസം എട്ടിനാണ് വയര്‍ വാര്‍ത്ത പുറത്ത് വിട്ടത്. എന്നാല്‍ ആറാം തീയതി ജെയ് ഷാ ഇക്കാര്യം അറിഞ്ഞിരുന്നു. അത് രോഹിണി സിംഗുമായുള്ള സംഭാഷണത്തില്‍ നിന്നാണെന്ന് കരുതുന്നു. പാരമ്പര്യ ഊര്‍ജ്ജ മേഖലയ്ക്ക് ഫണ്ട് നല്‍കുന്ന ഇറിഡ എന്ന കേന്ദ്രസര്‍ക്കാര്‍ സ്ഥാപനം വേണ്ടത്ര അനുഭവപരിചയമില്ലാത്ത, ടെംപിള്‍ എന്റര്‍ൈപ്രസസ് പ്രൈവറ്റ് ലിമിറ്റഡ് കമ്പനിക്ക് (ജെയ് ഷായുടെ ഉടമസ്ഥതയിലുള്ള) 10 കോടി 35 ലക്ഷം വായ്പ നല്‍കിയതിലും ദുരൂഹതയുണ്ടെന്നും എം.ബി രാജേഷ് ചൂട്ടിക്കാട്ടി. വായ്പയുടെ പരിധിയുടെ ഇരട്ടിയോളമാണ് നല്‍കിയത്.

മാത്രമല്ല റിലയന്‍സില്‍ നിന്നും ജെയ് ഷായുടെ കമ്പനിക്ക് വായ്പ കിട്ടി. ഇതൊക്കെ പരസ്പര സഹായ സഹകരണ സംഘമായി ബി.ജെ.പി സര്‍ക്കാര്‍ പ്രവര്‍ത്തിക്കുന്നു എന്നതിന് തെളിവാണെന്നും എം.ബി രാജേഷ് വ്യക്തമാക്കി.

കോണ്‍ഗ്രസ് അധ്യക്ഷ സോണിയാ ഗാന്ധിയുടെ മകന്‍ റോബര്‍ട്ട് വാദ്ര കോടികളുടെ റിയല്‍ എസ്‌റ്റേറ്റ് തട്ടിപ്പ് ഉള്‍പ്പെടെ നടത്തിയത് തെളിവുകള്‍ സഹിതം പുറത്ത് കൊണ്ടുവന്നത് രോഹിണി സിംഗ് എന്ന മാധ്യമപ്രവര്‍ത്തകയാണ്. അന്ന് ബി.ജെ.ബി അത് രാഷ്ട്രീയ ആയുധമാക്കുകയും രോഹിണി സിംഗിനെ പ്രശംസിക്കുകയും ചെയ്തിരുന്നു.