വീടിനുസമീപമുള്ള കടയിലേക്കു പോയ മലയാളി പെണ്‍കുട്ടിയെയും കൂട്ടുകാരിയെയും ദുരൂഹസാഹചര്യത്തില്‍ കാണാതായി. ഗ്രേറ്റര്‍ നോയിഡ പൈ സെക്ടര്‍ ഇന്‍ഫോമാറ്റിക് അപാര്‍ട്ട്‌മെന്റ് സി 12-ല്‍ താമസിക്കുന്ന മുന്‍ വ്യോമസേനാ ഉദ്യോഗസ്ഥന്‍ തൃശൂര്‍ കൊരട്ടി സ്വദേശി ബിനുരാജിന്റെ മകള്‍ അഞ്ജലി (15), സുഹൃത്ത് സ്തുതി മിശ്ര (14) എന്നിവരെയാണ് തിങ്കളാഴ്ച വൈകിട്ട് കാണാതായത്. കേന്ദ്രീയ വിദ്യാലയയിലെ പത്താം ക്ലാസ് വിദ്യാര്‍ഥിനിയാണ് അഞ്ജലി; സ്തുതി ഒന്‍പതില്‍ പഠിക്കുന്നു. അപാര്‍ട്‌മെന്റിനു പുറത്തുള്ള കടയിലേക്കു വൈകിട്ട് ഏഴോടെയാണ് ഇരുവരും പോയത്.

മടങ്ങി എത്താത്തതിനെത്തുടര്‍ന്ന് ഏഴരയോടെ അഞ്ജലിയുടെ അമ്മ മഞ്ജുവും സ്തുതിയുടെ അമ്മ സുനിതയും കടയില്‍ അന്വേഷിച്ചുചെന്നു. കടയിലെത്തി അഞ്ചു മിനിറ്റിനുള്ളില്‍ തന്നെ സാധനങ്ങള്‍ വാങ്ങി കടയില്‍നിന്നിറങ്ങിയതായി അവിടെനിന്നു മറുപടി ലഭിച്ചു. വീട്ടിലെത്തിയിരിക്കാമെന്നു കരുതി മഞ്ജു മടങ്ങിയെങ്കിലും ഇരുവരും അവിടെ എത്തിയിരുന്നില്ല. തുടര്‍ന്ന്, കാസിന പൊലീസില്‍ വിവരമറിയിച്ചു. അപാര്‍ട്ട്‌മെന്റിലെ സിസിടിവി ദൃശ്യങ്ങള്‍ പരിശോധിച്ച പൊലീസ്, വൈകിട്ട് 7.06ന് ഇരുവരും പുറത്തേക്കിറങ്ങുന്നതു ദൃശ്യങ്ങളില്‍ കണ്ടെത്തി. അല്‍പസമയം കഴിഞ്ഞ് അപാര്‍ട്ട്‌മെന്റിലേക്കു തിരികെയെത്തിയ ഇവര്‍ വീണ്ടും പുറത്തേക്കിറങ്ങുന്നതും ദൃശ്യങ്ങളിലുണ്ട്.

എന്നാല്‍, അപാര്‍ട്‌മെന്റിനു പുറത്ത്, കടകള്‍ സ്ഥിതിചെയ്യുന്ന ഇടങ്ങളിലെ സിസിടിവികള്‍ പ്രവര്‍ത്തനരഹിതമാണ്. ഇത് അന്വേഷണത്തിനു തിരിച്ചടിയായി. ഇതിനിടയില്‍ ഇന്‍ഫോമാറ്റിക് അപാര്‍ട്‌മെന്റില്‍ പൊലീസ് റെയ്ഡ് നടത്തി. ഇവിടെ താമസിക്കുന്ന ചില വിദ്യാര്‍ഥിനികളും അഞ്ജലിയുടെ പിതാവായ ബിനുരാജും തമ്മില്‍ അടുത്തിടെ തര്‍ക്കമുണ്ടായതായി വിവരം ലഭിച്ചതിന്റെ അടിസ്ഥാനത്തിലായിരുന്നു റെയ്ഡ്.കുട്ടികളെ കണ്ടെത്താന്‍ ഊര്‍ജിത ശ്രമം നടത്തുന്നുണ്ടെന്ന് പൊലീസ് വ്യക്തമാക്കി. പ്രദേശത്തെ മലയാളി കൂട്ടായ്മകളുടെ നേതൃത്വത്തിലും അന്വേഷണം നടക്കുന്നുണ്ട്. സമീപം ഒട്ടേറെ വിദ്യാഭ്യാസ സ്ഥാപനങ്ങളുള്ളതിനാല്‍, വിദ്യാര്‍ഥികളാണ് അപാര്‍ട്ട്‌മെന്റിലെ താമസക്കാരില്‍ ഭൂരിഭാഗവും. ആറോളം മലയാളി കുടുംബങ്ങളാണ് ഇവിടെയുള്ളത്.

കാണാതാകുമ്പോള്‍ കറുത്ത ജീന്‍സും വെള്ള ടീ ഷര്‍ട്ടും ജാക്കറ്റുമായിരുന്നു അഞ്ജലിയുടെ വേഷം. വ്യോമസേനയില്‍നിന്നു വിരമിച്ചശേഷം ഇന്‍ഡിഗോ വിമാന സര്‍വീസില്‍ ജോലി ചെയ്യുകയാണ് ബിനുരാജ്. ഇദ്ദേഹത്തിന്റെ അയല്‍വാസിയായ രാകേഷ് മിശ്രയുടെ മകളാണ് സ്തുതി. ഇവരെക്കുറിച്ച് എന്തെങ്കിലും വിവരം ലഭിക്കുന്നവര്‍ തങ്ങളെ അറിയിക്കണമെന്നു ബന്ധുക്കള്‍ അഭ്യര്‍ഥിച്ചു. (ഫോണ്‍: 9990802801, ഗോപകുമാര്‍). 

മലയാളിയായ അഞ്ജലിയെയും കൂട്ടുകാരിയെയും കണ്ടെത്താന്‍ ശക്തമായ നടപടി സ്വീകരിക്കണമെന്ന് ഗ്രേറ്റര്‍ നോയിഡ കേരള അസോസിയേഷന്‍ പൊലീസിനോടാവശ്യപ്പെട്ടു. കുറ്റവാളികളെ എത്രയും വേഗം പിടികൂടിയില്ലെങ്കില്‍ ശക്തമായ പ്രക്ഷോഭം ആരംഭിക്കുമെന്ന് അസോസിയേഷന്‍ പ്രസിഡന്റ് പി.എന്‍.രവീന്ദ്രന്‍ വ്യക്തമാക്കി.

യുപിയിലെ സുല്‍ത്താന്‍പുരില്‍ നിന്ന് ജോന്‍പുരിലേക്കുള്ള ബസില്‍ ഇന്നലെ വൈകിട്ട് ഇരുവരെയും കണ്ടിരുന്നുവെന്നറിയിച്ച് അജ്ഞാതന്റെ ഫോണ്‍ സന്ദേശം ഇന്നലെ അര്‍ധരാത്രിയോടെ പെണ്‍കുട്ടികളുടെ ബന്ധുക്കള്‍ക്ക് ലഭിച്ചു. വാരാണസിയിലേക്ക് പോകുകയാണെന്നാണ് കുട്ടികള്‍ തന്നോട് പറഞ്ഞതെന്ന് ഫോണ്‍ വിളിച്ചയാള്‍ അറിയിച്ചു. പെണ്‍കുട്ടികളുടെ ചിത്രം വാട്‌സാപ്പിലൂടെ പിന്നീട് ലഭിച്ചപ്പോഴാണ് ഇവരെ കാണാതായതിനെത്തുടര്‍ന്ന് പൊലീസ് അന്വേഷിച്ചുവരികയാണ് എന്നു മനസ്സിലായതെന്നും അതിനാലാണ് വിളിച്ചറിയിക്കുന്നതെന്നും ഇയാള്‍ പറഞ്ഞു. കണ്ടത് ഈ പെണ്‍കുട്ടികളെത്തന്നെയാണെന്ന് ഉറപ്പിച്ചു പറ!ഞ്ഞതോടെ അന്വേഷണം ആ വഴിക്കും നീങ്ങുകയാണ്. അജ്ഞാതന്റെ സന്ദേശം പൂര്‍ണമായി സ്ഥിരീകരിച്ചിട്ടില്ലെന്ന് പൊലീസ് അറിയിച്ചു.