പുതിയ ഹജ്ജ് നയത്തില്‍ അഭിപ്രായം തേടി സംസ്ഥാന, കേന്ദ്രഭരണപ്രദേശങ്ങളിലെ ഹജ്ജ് കമ്മിറ്റികളുടെ യോഗം തിങ്കളാഴ്ച മുംബൈയില്‍ നടക്കും. കേന്ദ്ര ഹജ്ജ് കമ്മിറ്റി ആസ്ഥാനത്ത് നടക്കുന്ന യോഗത്തില്‍ ഉയരുന്ന അഭിപ്രായങ്ങളും എതിര്‍പ്പുകളും കേന്ദ്ര ന്യൂനപക്ഷ, വിദേശകാര്യ ഉന്നത ഉദ്യോഗസ്ഥരുടെ പുനരവലോകന യോഗത്തില്‍ സമര്‍പ്പിക്കും.

അടുത്ത അഞ്ചിനാണ് പുനരവലോകന യോഗം. ന്യൂനപക്ഷകാര്യ മന്ത്രി മുഖ്താര്‍ അബ്ബാസ് നഖ്‌വി പങ്കെടുത്തേക്കും. തുടര്‍ന്ന് ഹജ്ജ് നയത്തി!ന്റെ അന്തിമരൂപം സുപ്രീംകോടതിയില്‍ സമര്‍പ്പിക്കും. മുന്‍ നയതന്ത്ര ഉദ്യോഗസ്ഥന്‍ അഫ്‌സല്‍ അമാനുല്ലയുടെ നേതൃത്വത്തിലുള്ള സമിതിയാണ് പുതിയ നയത്തിനുള്ള ശിപാര്‍ശകള്‍ കേന്ദ്ര സര്‍ക്കാറിന് സമര്‍പ്പിച്ചത്. സര്‍ക്കാര്‍ ക്വോട്ട 70 ശതമാനമായി കുറച്ച് സ്വകാര്യ ഹജ്ജ് ടൂര്‍ ഓപറേറ്റര്‍മാരുടെത് 30 ശതമാനമായി വര്‍ധിപ്പിക്കുക, എംബാര്‍ക്കേഷന്‍ കേന്ദ്രങ്ങള്‍ 21ല്‍നിന്ന് ഒമ്പതായി കുറക്കുക, 70 വയസ്സ് കഴിഞ്ഞവര്‍ക്കും മുമ്പ് അവസരം ലഭിക്കാതെ നാലാംതവണ അപേക്ഷിക്കുന്നവര്‍ക്കുമുള്ള സംവരണം നിര്‍ത്തലാക്കുക തുടങ്ങിയവയാണ് പ്രധാന ശിപാര്‍ശകള്‍.

എംബാര്‍ക്കേഷന്‍ കേന്ദ്രങ്ങള്‍ വെട്ടിച്ചുരുക്കരുത്, കോഴിക്കോട്ട് തുടര്‍ന്നും എംബാര്‍ക്കേഷന്‍ കേന്ദ്രം അനുവദിക്കണം, 70 വയസ്സ് കഴിഞ്ഞവര്‍ക്കും നാലാം തവണ അപേക്ഷിക്കുന്നവര്‍ക്കുമുള്ള സംവരണം തുടരുക തുടങ്ങിയ ആവശ്യങ്ങള്‍ കേരളം മുന്നോട്ടുവെക്കും.