ദുബൈ: പതിനാറു വർഷം മുൻപ്​ കൈവിട്ടുപോയ ഉമ്മയേയും സഹോദരങ്ങളെയും തേടിപ്പിടിച്ച്​ സുഡാനിൽ നിന്നെത്തിയ ഹനിക്ക്​ യു.എ.ഇയിൽ ജോലി ലഭിച്ചു. ഷാർജ വിമാനത്താവളത്തിനടുത്ത ഒരു പ്രമുഖ ടൈപ്പിങ്​ സ്​ഥാപനത്തിലാണ്​ ജോലി. സഹോദരങ്ങളുടെ പുനസമാഗമത്തെക്കുറിച്ച്​ ഗൾഫ്​ മാധ്യമം പ്രസിദ്ധീകരിച്ച വാർത്തക്കു പിന്നാലെ മാധ്യമ ലോകത്തി​​ന്റെ യും സാമൂഹിക മാധ്യങ്ങളുടെയും പ്രിയങ്കരനായി മാറിയ ഹനിക്ക്​ യു.എ.ഇയുടെ പല ഭാഗങ്ങളിൽ നിന്ന്​ ജോലി വാഗ്​ദാനം എത്തിയിരുന്നു

വർഷങ്ങളായി പിരിഞ്ഞിരിക്കേണ്ടി വന്ന സഹോദരിയുടെ സാമീപ്യം ലഭിക്കുമെന്നതിനാലാണ്​ ഷാർജയിലെ ജോലി സ്വീകരിച്ചത്​. ഹനിയുടെ മൂത്ത സഹോദരി ഷമീറ ദുബൈയിലെ കറാമയിലാണ്​ ജോലി ചെയ്യുന്നത്​.

ഉമ്മയേയും നാട്ടിലുള്ള സഹോദരിമാരെയും കാണാൻ കൊതിക്കുന്ന ഹനിക്ക് ഉമ്മയെ ഒരു മാസത്തെ സന്ദർശക വിസയിലെങ്കിലും യു.എ.ഇയിൽ കൊണ്ടുവരാൻ കഴിഞ്ഞെങ്കിൽ എന്ന മോഹമാണ്​ ഇപ്പോഴുള്ളത്​. സുഡാനിൽ നിന്ന് കോഴിക്കോട് പെരുമണ്ണയിലെത്തി വിവാഹം കഴിച്ച പിതാവ് ഉമ്മയിൽ നിന്നും സഹോദരിമാരിൽ നിന്നും അകറ്റി സുഡാനിലേക്ക്​ കൊണ്ടുപോയതാണ്​ ഹനിയെ.

എന്നാൽ വർഷങ്ങൾക്കു ശേഷം ഉമ്മയുടെ ഫോേട്ടായും വിവാഹ സർട്ടിഫിക്കറ്റും മറ്റു വിവരങ്ങളുമെല്ലാം കണ്ടെടുത്ത ഹനി സുഡാൻ സന്ദർശിച്ച മണ്ണാർക്കാട് സ്വദേശി ഫാറൂഖിനോട്​ ഇക്കാര്യങ്ങൾ അറിയിക്കുകയായിരുന്നു. ഫാറൂഖ് നൽകിയ വിവരങ്ങൾ അബൂദബിയിലുള്ള റഹീം പൊയിൽ സാമൂഹിക മാധ്യമങ്ങളിലൂടെ പങ്കുവെച്ചതോടെയാണ്​ സഹോദരങ്ങൾ വിവരമറിഞ്ഞതോടെ പുനസമാഗമം സാധ്യമാകുകയായിരുന്നു.