ചില കാര്യങ്ങളില്‍ ഇനിയും മൗനം പാലിക്കുന്നത് ശരിയല്ലെന്ന് നടിയും ഡബ്ബിങ് ആര്‍ട്ടിസ്റ്റുമായ രവീണ രവി. കഴിഞ്ഞ നാല് വര്‍ഷമായി ചെന്നൈ സ്വദേശികളായ ഇരട്ട സഹോദരങ്ങളില്‍ നിന്നും തനിക്കും കുടുംബത്തിനും നേരിടേണ്ടിവരുന്ന വ്യക്തിഹത്യകള്‍ക്കെതിരെ തുറന്ന് പറയുകയാണ് രവീണ. നടിയും ഡബ്ബിങ് ആര്‍ട്ടിസ്റ്റുമായ ശ്രീജ രവിയുടെ മകളാണ് രവീണ.

ശബരീഷ് എന്ന വ്യക്തിയും അയാളുടെ ഇരട്ട സഹോദരനും തന്നെയും പ്രിയപ്പെട്ടവരെയും നിരന്തരം വേട്ടയാടുകയാണെന്ന് രവീണ വെളിപ്പെടുത്തി. ഇവര്‍ അയയ്ക്കുന്ന അശ്ലീല സന്ദേശങ്ങളുടെയും കമന്റുകളുടെയും സ്‌ക്രീന്‍ഷോട്ടുകളും താരം പങ്കുവച്ചിട്ടുണ്ട്. പൊലീസ് പരാതി നല്‍കിയിട്ടും നിയമപരമായ മുന്നറിയിപ്പുകള്‍ നല്‍കിയിട്ടും ഈ പീഡനം തുടരുകയാണ്. നിരവധി വ്യാജ സോഷ്യല്‍ മീഡിയ അക്കൗണ്ടുകള്‍ വഴിയാണ് ഇവര്‍ സൈബര്‍ ആക്രമണം നടത്തുന്നത്.

തന്നെ കൂടാതെ മറ്റ് പല വനിതാ അഭിനേതാക്കളെയും ഇവര്‍ ഇത്തരത്തില്‍ പിന്തുടരുന്നതായി രവീണ പറയുന്നു. താനുമായി നേരത്തെ പരിചയമുണ്ടെന്നോ അല്ലെങ്കില്‍ വിവാഹം ഉറപ്പിച്ചെന്നോ ഉള്ള വ്യാജ കഥകള്‍ പ്രചരിപ്പിച്ചാണ് ഇവര്‍ പൊതുജനങ്ങളെ തെറ്റിദ്ധരിപ്പിക്കുന്നത്.

അന്തരിച്ച പിതാവിന്റെ ജന്മദിനത്തില്‍ പങ്കുവച്ച വൈകാരികമായ പോസ്റ്റുകളില്‍ പോലും ഇവര്‍ അങ്ങേയറ്റം മോശമായ രീതിയില്‍ കമന്റുകള്‍ ഇട്ടു. തനിക്ക് ആ കമന്റുകള്‍ റിപ്പോര്‍ട്ട് ചെയ്യാനും ഡിലീറ്റ് ചെയ്യാനും കഴിഞ്ഞുവെന്നും എന്നാല്‍ ഇനിയും മൗനം പാലിക്കുന്നത് ശരിയല്ലെന്ന് തിരിച്ചറിയുന്നുവെന്നും രവീണ തുറന്നു പറഞ്ഞു.