ഇംഗഌണ്ടിലെ കൊവെന്‍ട്രിയില്‍ കാണാതായ മലയാളി യുവാവിനെ മരിച്ചനിലയില്‍ കണ്ടെത്തി. തിരുവനന്തപുരം സ്വദേശി വിഷ്ണു ജയകുമാര്‍ (26) ആണ് മരിച്ചത്. കഴിഞ്ഞ ശനിയാഴ്ച പുലര്‍ച്ചയോടെയായിരുന്നു യുവാവിനെ കാണാതായത്. കൊവെന്‍ട്രിയിലെ സ്വാന്‍ ലേക്കിന് സമീപത്താണ് വിഷ്ണുവിനെ അവസാനമായി കണ്ടതെന്ന് ബന്ധുക്കളും സുഹൃത്തുക്കളും അറിയിച്ചിരുന്നു. മരണകാരണം ഉള്‍പ്പെടെയുള്ള കൂടുതല്‍ വിവരങ്ങള്‍ പുറത്തുവിട്ടിട്ടില്ല. വിഷ്ണുവിന്റെ മൃതദേഹം കണ്ടെത്തിയതായി അധികൃതര്‍ ബന്ധുക്കളെ അറിയിച്ചതായാണ് വിവരം.

ഡേറ്റ സയന്‍സില്‍ ബിരുദാനന്തര ബിരുദത്തിനായി 2022ലാണ് വിഷ്ണു കൊവെന്‍ട്രിയിലെത്തിയത്. കോഴ്‌സ് പാസായതിനുശേഷം പോസ്റ്റ് സ്റ്റഡി വര്‍ക്ക് വിസയില്‍ ലണ്ടനില്‍ തുടരുകയായിരുന്നു. വാരാന്ത്യത്തില്‍ സുഹൃത്തിനൊപ്പം പുറത്തുപോയ വിഷ്ണു മടങ്ങുന്നതിനായി ടാക്‌സി കാത്തുനിന്നതായും പിന്നീട് ഇയാളെക്കുറിച്ച് യാതൊരു വിവരവും ലഭിച്ചിട്ടില്ലെന്നുമായിരുന്നു ബന്ധുക്കള്‍ പറഞ്ഞത്.

ഏറെ നേരം കാത്തിട്ടും തിരികെ എത്താതിരുന്നതോടെ കുടുംബവും സുഹൃത്തുക്കളും അന്വേഷണം നടത്തിയെങ്കിലും ഫലമുണ്ടായില്ല. തുടര്‍ന്ന് ബന്ധുക്കള്‍ പൊലീസില്‍ പരാതി നല്‍കുകായിരുന്നു. പിന്നാലെ അന്വേഷണം പുരോഗമിക്കവേയാണ് മരണവിവരം പുറത്തുവന്നത്.