സ്കൂട്ടർ പാർക്ക് ചെയ്തതിനെ ചൊല്ലി തർക്കം. യുവതിയുടെ കൈ വെട്ടി ബന്ധു. പാർക്കിങ്  തർക്കത്തിനിടെയാണ് കിളിമാനൂരിൽ യുവതിയുടെ കൈ   അമ്മാവൻ വെട്ടിയത്. തിരുവനന്തപുരത്ത് കിളിമാനൂരിന് സമീപം പോങ്ങനാടാണ് സംഭവം. മകളെ ട്യൂഷന് വിട്ട ശേഷം വീട്ടിലേക്ക് വരുന്ന വഴിയിൽ സ്കൂട്ടര്‍ പാർക്ക് ചെയ്തപ്പോൾ അടുത്ത് താമസിച്ചിരുന്ന അമ്മാവൻ യുവതിയുടെ കൈ വെട്ടുകയായിരുന്നു.

രണ്ട് കൈക്കും വെട്ടേറ്റ സിന്ധുവിനെ തിരുവനന്തപുരം മെഡിക്കൽ കോളേജ് ആശുപത്രിയിൽ പ്രവേശിപ്പിച്ചു. പ്രതി മണിക്കുട്ടന് വേണ്ടിയുള്ള അന്വേഷണം ഊർജ്ജിതമാക്കിയെന്ന് കിളിമാനൂർ പൊലീസ് അറിയിച്ചു. ഇവർ തമ്മിൽ സ്ഥിരമായി തർക്കം ഉണ്ടെന്നാണ് സമീപവാസികളും പറയുന്നത്. സ്ഥിരമായി സ്കൂട്ടറിന്‍റെ ടയറിന്‍റ കാറ്റ് ഊരി വിടുന്നതായും ടയർ പഞ്ചറാക്കാറുണ്ടെന്നും പരാതിയുണ്ട്.