നടി മംമ്ത മോഹന്‍ദാസിനെയും താരത്തിന്റെ വ്യക്തി ജീവിതത്തെയും കുറിച്ച് അറിയാത്തര്‍ ആരും തന്നെ ഉണ്ടാവില്ല. തന്റെ ജീവിതത്തില്‍ തിരിച്ചടികള്‍ നേരിടേണ്ടി വന്നപ്പോള്‍ തകര്‍ന്ന് പോകാതെ പോരാടിയ വ്യക്തിയാണ് മംമ്ത. രണ്ട് തവണ മംമ്ത കാന്‍സറിനെ അഭിമുഖീകരിച്ചു. ഇതിനിടെ വിറ്റിലിഗോ എന്ന ഓട്ടോ ഇമ്മ്യൂണ്‍ കണ്ടീഷനും താരത്തെ ബാധിച്ചു. ഇപ്പോഴിതാ ക്യാന്‍സര്‍ ഡേയുടെ ഭാഗമായുള്ളൊരു പരിപാടിയില്‍ താരം പറഞ്ഞ വാക്കുകളാണ് ശ്രദ്ധ നേടുന്നത്.

'ഞാന്‍ എന്നും പറയുന്നൊരു കാര്യമുണ്ട്. കാന്‍സറിന് അങ്ങനെ പ്രത്യേക ദിവസമൊന്നും ഇല്ല. ആര്‍ക്കും ഏത് നിമിഷവും എന്തും സംഭവിക്കാം. ഇപ്പോള്‍ വളരെ കോമണായി പറയുന്നൊരു കാര്യമുണ്ട്, ലൈഫ് ഈസ് വെരി ഷോര്‍ട്ട്. അല്ലേ നിങ്ങള്‍ വലിയ ആളാണെങ്കിലും ചെറിയ ആളാണെങ്കിലും കാന്‍സറെന്നല്ല ഏത് രോഗവും ആര്‍ക്ക് വേണമെങ്കിലും എപ്പോ വേണമെങ്കിലും സംഭവിക്കാം. ഞാനതിന്റെ ജീവിച്ചിരിക്കുന്ന ഉദാഹരണമാണ്. എന്റെ 24ാമത്തെ വയസിലായിരുന്നു കാന്‍സര്‍ കണ്ടുപിടിക്കുന്നത്. ഹോഡ്ജ്കിന്‍ ലിംഫോമ ആയിരുന്നു എനിക്ക്. അന്നത്തെ കാലത്ത് ഇതെ കുറിച്ചുള്ള ഒരു വിവരവും ഓണ്‍ലൈനില്‍ ലഭ്യമായിരുന്നില്ല. എന്ത് ചെയ്യണമെന്നൊന്നും എനിക്ക് ഒരു ഐഡിയ ഉണ്ടായിരുന്നില്ല. മതാപിതാക്കള്‍ക്കും. എന്റെ കാന്‍സര്‍ ടൈപ്പിന്റെ റിസര്‍ച്ച് സ്റ്റഡി വരുന്നത് 40 വര്‍ഷത്തിന് ശേഷമാണ്. 2014ല്‍ ഒരു ക്ലിനിക്കല്‍ സ്റ്റഡിയുടെ ഭാഗമായിട്ടുണ്ട് ഞാന്‍.

എല്ലാ ട്രീറ്റ്‌മെന്റും ഫെയിലായ സമയത്തായിരുന്നു അത്. അത്ഭുതമായിരുന്നു അത്. ആ ഡ്രഗിന്റെ സ്റ്റഡി നടക്കുന്നത് 1984ല്‍ ആയിരുന്നു ഞാന്‍ ജനിച്ച വര്‍ഷം. എനിക്കൊപ്പം തന്നെ അതിന്റെ പരീക്ഷണവും നടന്നു കൊണ്ടിരുന്നു. ആ ഡ്രഗ് കാരണമാണ് ഞാനിന്നിവിടെ നില്‍ക്കുന്നത്. ആരോഗ്യകരമായ ജീവിതം, പുകവലി പാടില്ല, മദ്യപാനം പാടില്ല, എക്‌സസൈസ് എന്നൊക്കെ പലരും പറഞ്ഞു. ഇതെല്ലാം ഞാനും ചെയ്തതാണ്. വളരെ ആക്ടീവ് ആയിരുന്നു, ദിവസവും എക്‌സസൈസ് ചെയ്യുമായിരുന്നു. പക്ഷേ എനിക്ക് കാന്‍സര്‍ വന്നു. നമ്മുടെ ജീവിതത്തിന് ഒരു ഗ്യാരന്റിയും ഇല്ല. പ്രശ്‌നങ്ങള്‍ വരുമ്പോള്‍ അത് നേരിടാനുള്ള മനക്കരുത്താണ് നമുക്ക് വേണ്ടത്. എനിക്കതിന് സാധിക്കുമെങ്കില്‍ ആര്‍ക്കും അതിന് സാധിക്കും. വിഷമം നമുക്ക് തുണയാകില്ല. ജീവിതത്തോട് ഇനിക്കിപ്പോള്‍ പാഷനാണ്. കഷ്ടപ്പെട്ടിട്ട് തിരിച്ച് കിട്ടിയ ജീവിതമാണ്.

കാന്‍സര്‍ പേഷ്യന്‍സിനെ ഒരിക്കലും സങ്കടത്തോടെ നോക്കല്ലേ, സഹതാപത്തോടെ നോക്കല്ലേന്ന് പലപ്പോഴും പറയാറുണ്ട്. കാരണം അതൊരിക്കലും അവരെ സഹായിക്കില്ല. അവരുടെ ഭാരം കൂട്ടാനല്ലല്ലോ കുറയ്ക്കാനല്ലേ നമ്മള്‍ കാണാന്‍ പോകുന്നത്. ഒരു ചിരി നിങ്ങളുടെ മുഖത്തുണ്ടാകണം. അത് അവരില്‍ വലിയ പോസിറ്റീവ് എനര്‍ജിയാണ് നല്‍കുക. കാന്‍സറിന്റെ വാക്‌സിന്‍ ഭാവിയില്‍ ഉണ്ടാകും. അതിപ്പോഴും റിസര്‍ച്ചിലാണ്' മംമ്ത പറഞ്ഞു.