കുവൈത്തിൽ സർക്കാർ മേൽനോട്ടത്തിലള്ള അൽ ദുർറ റിക്രൂട്ട്​മെൻറ്​ കമ്പനി ഈ മാസം അവസാനം മുതൽ അപേക്ഷ സ്വീകരിച്ചുതുടങ്ങുമെന്ന് ഡയറക്​ടർ ജനറൽ സാലിഹ്​ അൽ വുഹൈബ്​ വാർത്താസമ്മേളനത്തിൽ അറിയിച്ചു.

ആദ്യമായി റിക്രൂട്ട് ചെയ്യുക ​ ഇന്ത്യയില്‍ നിന്നുള്ള പുരുഷ തൊഴിലാളികളെ ആണ്. ശർഖിലെ ദാർ അൽ അവദി ബിൽഡിങ്ങിലാണ്​ കമ്പനിയുടെ ആസ്ഥാനം. ആറ്​ ഗവർണറേറ്റുകളിൽ ശാഖാ ഓഫിസുകളുമുണ്ടാവും. ഇഷ്​ബിലിയ, റൗദ, ഫഹാഹീൽ, ജഹ്​റ, അദാൻ, അൽ ഖുസൂർ എന്നിവിടങ്ങളിലെ സഹകരണ സംഘങ്ങളിലാവും ശാഖാ ഓഫിസുകൾ. ശാഖാ ഓഫിസുകളിലും ഓൺലൈൻ വഴിയും അപേക്ഷ സമർപ്പിക്കാം.

അപേക്ഷ സമർപ്പിച്ച്​ 30 ദിവസം മുതൽ 45 ദിവസത്തിനുള്ളിൽ തൊഴിലാളികളെ എത്തിക്കും. തുടക്കത്തിൽ പുരുഷന്മാരെ മാത്രമാണ്​ റിക്രൂട്ട്​ ചെയ്യുക. രണ്ട്​ മാസത്തിന്​ ശേഷം സ്​ത്രീ തൊഴിലാളികളെ കൂടി ലഭ്യമാക്കും. ഡ്രൈവർമാർ, പാചകക്കാർ തുടങ്ങിയവരെയാണ്​ ആദ്യഘട്ടത്തിൽ എത്തിക്കുന്നത്​. രണ്ടാംഘട്ടത്തിൽ ശ്രീലങ്ക, ഫിലിപ്പീൻസ്​ എന്നിവിടങ്ങളിൽനിന്ന്​ കൂടി തൊഴിലാളികളെ എത്തിക്കും.

280 ദീനാറാണ്​ ഇന്ത്യയിൽനിന്ന്​ ഗാർഹികത്തൊഴിലാളികളെ കൊണ്ടുവരാൻ സ്വദേശികൾക്ക്​ ചെലവ്​ വരുക. മറ്റു രാജ്യങ്ങളിൽനിന്ന്​ കൊണ്ടുവരുന്നതി​​ന്റെ ചെലവ്​ വ്യത്യസ്​തമായിരിക്കും. റിക്രൂട്ട്​മെൻറ്​ ചെലവ്​ എപ്പോഴും ഒരേ തുകയായിരിക്കില്ലെന്നും​ കമ്പനി അറിയിച്ചു.