മുന്‍ മുഖ്യമന്ത്രി വി.എസ്.അച്യുതാനന്ദന് മരണാനന്തര ബഹുമതിയായി പ്രഖ്യാപിച്ച പത്മവിഭൂഷണ്‍ പുരസ്‌കാരം സ്വീകരിക്കേണ്ടതില്ലെന്ന് സിപിഎമ്മും വിഎസിന്റെ കുടുംബവും ഏകദേശധാരണയിലെത്തി. പാര്‍ട്ടിയുടെ നിലപാട് അനുസരിച്ച് തീരുമാനമെടുക്കുമെന്നു വിഎസിന്റെ മകന്‍ വി.എ.അരുണ്‍കുമാര്‍ കഴിഞ്ഞ ദിവസം പറഞ്ഞിരുന്നു. ഇതിനു പിന്നാലെ സിപിഎം ജനറല്‍ സെക്രട്ടറി പാര്‍ട്ടി നിലപാട് ഇന്നു വ്യക്തമാക്കുകയും ചെയ്തു.

ഇഎംഎസ്, സുര്‍ജിത് സിങ്, ജ്യോതിബസു, ബുദ്ധദേവ് ഭട്ടാചാര്യ എന്നിവര്‍ക്കു പത്മ പുരസ്‌കാരം ലഭിച്ചപ്പോള്‍ വിനയപൂര്‍വം അവര്‍ അതു നിരസിക്കുകയാണ് ചെയ്തതെന്ന് എം.എ.ബേബി പറഞ്ഞു. വി.എസ് ജീവിച്ചിരുന്നെങ്കില്‍ അതില്‍നിന്നു വിഭിന്നമായ ഒരു നിലപാട് എടുക്കുമായിരുന്നില്ല. മുന്‍പ് നേതാക്കള്‍ എടുത്ത സമീപനമാണ് പാര്‍ട്ടിയുടെ ഇതു സംബന്ധിച്ചുള്ള തീരുമാനം. അതു മനസിലാക്കി വി.എസിന്റെ കുടുംബം ഇക്കാര്യത്തില്‍ അഭിപ്രായം രൂപീകരിക്കുമെന്നാണു കരുതുന്നതെന്നും എം.എ.ബേബി പറഞ്ഞു.

പത്മവിഭൂഷണ്‍ പുരസ്‌കാരം വിഎസിനു നല്‍കാന്‍ തീരുമാനിച്ച വിവരം അറിയിച്ച് കേന്ദ്ര ആഭ്യന്തര മന്ത്രാലയം അയച്ച കത്ത് ഇന്നലെയാണ് ലഭിച്ചതെന്നും അതു പങ്കുവച്ച് ഇന്നലെ തന്നെ നിലപാട് അറിയിച്ചിരുന്നുവെന്നും വി.എസിന്റെ മകന്‍ അരുണ്‍കുമാര്‍ പറഞ്ഞു. കുടുംബം ആവശ്യപ്പെട്ട പ്രകാരമല്ല പുരസ്‌കാരം പ്രഖ്യാപിച്ചത്. വാങ്ങുന്നോ ഇല്ലയോ എന്നതു സംബന്ധിച്ചു മറുപടി നല്‍കുകയെന്ന നടപടിക്രമമൊന്നും ഇക്കാര്യത്തില്‍ ഇല്ലെന്നും അരുണ്‍കുമാര്‍ പറഞ്ഞു. പുരസ്‌കാരം വിഎസിന്റെ പൊതുജീവിതത്തോടുള്ള ആദരമായി കാണുന്നുവെന്നും വിഎസിന് ജനഹൃദയങ്ങളില്‍ ലഭിച്ച സ്ഥാനമാണ് ഏതു പുരസ്‌കാരത്തെക്കാളും വലുതെന്നു വിശ്വസിക്കുന്നുവെന്നും അരുണ്‍കുമാര്‍ കഴിഞ്ഞ ദിവസം സമൂഹമാധ്യമത്തില്‍ കുറിച്ചിരുന്നു.

ഇത്തരം ഔദ്യോഗിക പുരസ്‌കാരങ്ങള്‍ സ്വീകരിക്കുന്നതുമായി ബന്ധപ്പെട്ട് അദ്ദേഹം പ്രതിനിധാനം ചെയ്ത പ്രസ്ഥാനത്തിനു വ്യക്തമായ രാഷ്ട്രീയ നിലപാടുകളുണ്ട്. ആ മൂല്യങ്ങളെയും പാര്‍ട്ടിയുടെ തീരുമാനങ്ങളെയും ഒരു കമ്യൂണിസ്റ്റ് എന്ന നിലയില്‍ അദ്ദേഹം മുറുകെ പിടിച്ചിരുന്നു. പിതാവിന്റെ ആദര്‍ശങ്ങള്‍ക്കും പാര്‍ട്ടി നിലപാടുകള്‍ക്കും ഒപ്പമായിരിക്കും ഇക്കാര്യത്തില്‍ കുടുംബം എന്നും അരുണ്‍കുമാര്‍ വ്യക്തമാക്കിയിരുന്നു. ഇന്ന് പാര്‍ട്ടി ജനറല്‍ സെക്രട്ടറി ഇക്കാര്യത്തില്‍ വ്യക്തത വരുത്തിയതോടെ മറിച്ചൊരു നിലപാട് വി.എസിന്റെ കുടുംബം എടുക്കില്ലെന്ന നിലയിലേക്കാണു കാര്യങ്ങള്‍ എത്തിയിരിക്കുന്നത്.