മക്ക: മക്കയില്‍ ഇന്ത്യന്‍ ഹജ്ജ്​ മിഷന്‍ താല്‍കാലികമായി ഒരുക്കിയ സമ്ബൂര്‍ണ ആശുപത്രി ഹാജിമാരുടെ ആരോഗ്യസേവനത്തില്‍ മികവ്​ പുലര്‍ത്തുന്നു. ഇന്ത്യന്‍ ഹാജിമാര്‍ക്ക്​ ആരോഗ്യസേവനം നല്‍കാന്‍ ഡോക്​ടര്‍മാരുടെയും പാരാമെഡിക്കല്‍ ജീവനക്കാരുടെയും മികച്ച ടീം പ്രവര്‍ത്തിക്കുന്നുണ്ട്​. മലയാളി വളണ്ടിയര്‍മാരുടെ സന്നദ്ധ സേവനവും ഇവിടെ ലഭ്യമാണ്​. അസീസിയയില്‍ പ്രവര്‍ത്തിക്കുന്ന പ്രധാന ആശുപത്രിയില്‍ 40 കിടക്കകളുണ്ട്​. ഹറമിന്​ സമീപം ഖുദൈയില്‍ 50 കിടക്കകളുള്ള ആശുപത്രിയും പ്രവര്‍ത്തിക്കുന്നുണ്ട്​.

15 ബ്രാഞ്ചുകള്‍ കേന്ദ്രീകരിച്ച്‌​ 24 മണിക്കൂറും പ്രവര്‍ത്തിക്കുന്ന ഡിസ്​പെന്‍സറികളുമുണ്ട്​. 170 ഒാളം ഡോക്​ടര്‍മാരും 180 പാരാമെഡിക്കല്‍ ജീവനക്കാരും ഹാജിമാരുടെ ആരോഗ്യസേവനത്തിനായുണ്ട്​. കൂടുതല്‍ ഗൗരവമുള്ള രോഗമോ പരിക്കോ ഉള്ളവരെ സൗദി ആശുപത്രികളിലേക്ക്​ മാറ്റും. മുന്ന്​ കോടി രൂപയുടെ മരുന്നാണ്​ ഹാജിമാരുടെ ചികില്‍സക്കായി ഇന്ത്യയില്‍ നിന്ന്​ ​കൊണ്ടുവന്നത്​. ലബോറട്ടറികളും അനുബന്ധ സൗകര്യങ്ങളും ഇവിടെ സജ്ജമാണ്.