ജനിച്ചയുടനെ പിരിയേണ്ടിവന്ന ഇരട്ട സഹോദരിമാരുടെ കൂടിക്കാഴ്ചക്ക് 25 വര്ഷത്തിനുശേഷം കളമൊരുങ്ങുന്നു
ഓര്മ്മവെക്കുന്നതിനു മുന്പേ നഷ്ടപ്പെട്ട ഇരട്ട സഹോദരിയെ ഇരുപത്തി അഞ്ചു വര്ഷങ്ങള്ക്കു ശേഷം കണ്ടു മുട്ടുന്നു എന്ന് സങ്കല്പ്പിച്ചു നോക്കൂ. ആ വൈകാരിക നിമിഷത്തെക്കുറിച്ച് പറയാന് വാക്കുകള്പോലും ഉണ്ടാകില്ല. ചിലപ്പോള് ഒരു നീണ്ട ആലിംഗനം അല്ലെങ്കില് ആനന്ദ കണ്ണീര്. അത്തരമൊരു നിമിഷമാണ് അനെയ്സ് ബോര്ഡിയറുടേയും, സാമന്ത ഫട്ടര്മാന്റേയും ജീവിതത്തില് നടക്കാന് പോകുന്നത്. 1987 നവംബര് പത്തൊമ്പതിന് ദക്ഷിണ കൊറിയയിലായിരുന്നു ഇരുവരുടേയും ജനനം. നിമിഷങ്ങള് വ്യത്യാസത്തില് ജനിച്ച സഹോദരിയുണ്ടെന്നറിയാതെ ഇരുവരും 25 വര്ഷം ലോകത്തിന്റെ രണ്ടു കോണുകളില് ജീവിക്കുകയായിരുന്നു. ജനിച്ച് മൂന്നു മാസത്തിനുശേഷം അനെയ്സിനെ ഒരു ഫ്രഞ്ച് കുടുംബം ദത്തെടുക്കുകയും പാരീസിലേക്ക് കൊണ്ടുപേകുകയുമായിരുന്നു. സാമന്തയാകട്ടെ അമേരിക്കയിലെ ലോസ് ഏയ്ഞ്ചസിലെ ഫട്ടര്മാന് കുടുംബത്തില് രണ്ടു സഹോദരന്മാര്ക്കൊപ്പമാണ് വളര്ന്നത്.
പാരിസില് ഫാഷന് ഡിസൈനറായ അനെയ്സി സുഹൃത്ത് പറഞ്ഞതു പ്രകാരമാണ് യൂട്യൂബില് അമേരിക്കന് നടിയായ സാമന്തയുടെ ദൃശ്യങ്ങള് കാണുന്നത്. അത് താന് തന്നെയാണെന്നായിരുന്നു ആദ്യ നോട്ടത്തില് അനെയ്സിന് തോന്നിയത്. തുടര്ന്ന് സാമന്തയുടെ ഫേസ് ബുക്ക് അക്കൗണ്ട് പരിശോധിച്ചപ്പോള് ഒരേ പ്രായക്കാരാണെന്നും ജനനതീയതിയും, ജന്മ സ്ഥലവും ഒന്നു തന്നെയാണെന്ന് മനസിലാക്കുകയായിരുന്നു. ഇതു കൂടാതെ സാമന്തയ്ക്കും തനിക്കും മറ്റു പലസാദൃശ്യങ്ങളും ഉണ്ടെന്നും അനെയ്സിന് കണ്ടെത്തി. പിന്നീട് സാമന്തയുടെ ഫേസ്ബുക്ക് അക്കൗണ്ടില് തന്റെ സംശയങ്ങളെല്ലാം ഉള്പ്പെടുത്തി ഒരു കുറിപ്പും എഴുതുകയായിരുന്നു. ഇതു വായിച്ച സാമന്തയ്ക്കും അനെയ്സിന്റെ സംശയങ്ങള്തന്നെ ഉണ്ടായി. ഇത് തന്റെ ഇരട്ട സഹോദരിയായിരിക്കാം എന്നുതന്നെ സാമന്തയ്ക്ക് തോന്നി. പിന്നീട് ഇരുവരും ഇന്റര് നെറ്റ് വഴി കൂടുതല് ആശയവിനിമയം നടത്തുകയും നേരിട്ട് കാണാന് തീരുമാനിക്കുകയുമായിരുന്നു.
ഇവരുടെ കൂടിക്കാഴ്ചയ്ക്കും, ഡി.എന്.എ പരിശോധനയ്ക്കുമായി വേണ്ട പണം സമാഹരിക്കുന്നതിനുള്ള നടപടികളും ഇന്റര്നെറ്റ് വഴിയാണ് നടന്നത്. രണ്ടാഴ്ച കൊണ്ട് എണ്ണൂറോളം ആളുകളില് നിന്നായി 34,000 ഡോളര് ലഭിച്ചു. അഭിനേതാവായ സാമന്ത തങ്ങളുടെ കൂടിക്കാഴ്ച ക്യാമറയില് പകര്ത്താനും ഏര്പ്പാട് ചെയ്തിട്ടുണ്ട്. ഇനി പത്തുദിവസം കൂടിയേ ആ കൂടിക്കാഴ്ചയ്ക്കായ് ഇരുസഹോദരിമാര്ക്കും കാത്തിരിക്കേണ്ടതുള്ളു.
https://www.facebook.com/Malayalivartha