തുര്‍ക്കിയിലെ ഇസ്താംബുളിലെ ബേരാംപാസ സ്വദേശിയായ അമ്പത്തിയഞ്ചുകാരന് അഞ്ചു വര്‍ഷത്തെ തടവ് ശിക്ഷ ലഭിച്ചു. ചെയ്ത കുറ്റം എന്തെന്നോ? തന്റെ ഏകാന്തത അകറ്റാന്‍ ഒരു വര്‍ഷം പോലീസ് സ്‌റ്റേഷനിലേക്ക് 45,210 പ്രാവശ്യം ഫോണ്‍ ചെയ്തു!

2017 മെയ് പതിനഞ്ചിനും 2018 മെയ് പതിനഞ്ചിനും ഇടയ്ക്ക് അദ്ദേഹം പോലീസ് സ്‌റ്റേഷനിലേക്ക് ഫോണ്‍ ചെയ്തത് ദിവസേന നൂറു പ്രാവശ്യമാണ്. ഒരു പരാതി നല്‍കുകയോ പോലീസിന്റെ സേവനം ആവശ്യപ്പെടുകയോ ചെയ്യാതിരുന്ന ഇദ്ദേഹം പോലീസ് സ്‌റ്റേഷനില്‍ ഫോണ്‍ എടുക്കുന്നവരോട് കുശലം പറയുകയായിരുന്നു പതിവ്.

ആദ്യം ഈ ഫോണ്‍ വിളി പോലീസുകാര്‍ കാര്യമാക്കിയിരുന്നില്ലെങ്കിലും പിന്നീട് അത് അവര്‍ക്ക് ഒരു ശല്യമായി മാറുകയായിരുന്നു. നാളുകള്‍ പിന്നിടുമ്പോഴും ഈ ഫോണ്‍വിളി തുടര്‍ന്നതിനാല്‍ ഇസ്താംബുള്‍ പോലീസിന്റെ കമ്യൂണിക്കേഷന്‍ ആന്‍ഡ് ഇലക്ടോണിക് വിഭാഗം ഇദ്ദേഹത്തിനെതിരെ നടപടി സ്വീകരിക്കുകയായിരുന്നു.

ഒരു വര്‍ഷം കൊണ്ട് 45,210 പ്രാവശ്യമാണ് അദ്ദേഹം പോലീസിന്റെ എമര്‍ജന്‍സി നമ്പരായ 115-ലേക്ക് ഫോണ്‍ വിളിച്ചത്. പൊതുമേഖല സ്ഥാപനത്തിന്റെ സേവനങ്ങളെ ദുരുപയോഗം ചെയ്തുവെന്ന കുറ്റമാണ് ഇദ്ദേഹത്തിനെതിരെ ചുമത്തിയിരിക്കുന്നത്. അഞ്ച് വര്‍ഷത്തെ തടവ് ശിക്ഷയാണ് കോടതി ഇദ്ദേഹത്തിന് വിധിച്ചിരിക്കുന്നത്.

ഭാര്യയുമായി അകന്നു കഴിയുന്ന താന്‍ മദ്യത്തിന് അടിമയാണെന്നും ഈ സമയം തോന്നുന്ന ഏകാന്തത അകറ്റാനാണ് ഫോണ്‍ ചെയ്തതെന്ന് ശിക്ഷ വിധിച്ച ജഡ്ജിയോട് അദ്ദേഹം പറഞ്ഞുവെങ്കിലും ഫലമൊന്നുമുണ്ടായില്ല.