ജനിച്ച് വെറും 11 ദിവസങ്ങള്ക്ക് ശേഷം മരണപ്പെട്ട തന്റെ മകന്റെ മരണത്തിന് പിന്നിലെ രഹസ്യം അന്വേഷിച്ച് ഒരമ്മ!
2015 -ലാണ് സിഡ്നി സ്വദേശിയായ ജെസീക്ക ബുക്കനന് കുഞ്ഞ് പിറക്കുന്നത്. സിസേറിയനായിരുന്നു. എല്ലാ ദിവസും രാത്രി നവജാതശിശുക്കള്ക്കായുള്ള പ്രത്യേക നേഴ്സറിയിലേക്ക് അവനെ കൊണ്ടുപോകുകയും ചെയ്യുമായിരുന്നു. തന്റെ ആദ്യത്തെ കുട്ടി എയ്ഡന് ജനിച്ച സമയത്തുള്ള സന്ദര്ശകരുടെ എണ്ണംവെച്ച് നോക്കുമ്പോള് അതിന്റെ മൂന്നില് ഒന്ന് ആളുകള് മാത്രമേ രണ്ടാമത്തെ കുഞ്ഞ് ജാക്കിനെ കാണാന് ആശുപത്രിയില് എത്തിയിരുന്നുള്ളു എന്നും ജെസീക്ക ഓര്ക്കുന്നു. ആറ് രാത്രിയിലെ ആശുപത്രിവാസത്തിന് ശേഷം അവര് തിരികെ വീട്ടിലെത്തി.
എന്നാല്, പ്രസവം കഴിഞ്ഞ് കുഞ്ഞിനെ കൈയ്യില് കിട്ടിയപ്പോള് തന്നെ ജെസീക്കയ്ക്ക് എന്തോ അസ്വാഭാവികത തോന്നിയിരുന്നു. ഭര്ത്താവ് ആംഗസിനോട് എന്തെങ്കിലും അസ്വാഭാവികത തോന്നുന്നുണ്ടോ എന്ന് ചോദിച്ചപ്പോള് ഒന്നും തോന്നുന്നില്ലെന്നായിരുന്നു ഉത്തരം. പിന്നെ കൂടുതലൊന്നും ചിന്തിക്കാതെ അവര് വീട്ടിലേക്ക് പോയി.
തന്റെ ആദ്യ മകന് എയ്ഡന് ജനിച്ച സമയത്ത് നന്നായി പാല് കുടിക്കുമായിരുന്നു. എന്നാല് ജാക്കിന് വിശപ്പില്ലായിരുന്നു. പാല്കുടിപ്പിക്കാന് പലരീതി പരീക്ഷിച്ചുവെങ്കിലും നടന്നില്ല. ഒരു ശനിയാഴ്ച്ച രാത്രിയാണ് ജസീക്കയ്ക്ക് ജാക്കില് പ്രകടമായ മാറ്റം തോന്നിയത്. രാത്രി 12 മണിക്കും വെളുപ്പിന് 4 മണിക്കും പാല് കൊടുത്തിട്ടും ജാക്ക് മലമൂത്ര വിസര്ജനം നടത്തിയിരുന്നില്ല. ഉടന് തന്നെ ജാക്കിനെ അവര് ആശുപത്രിയിലെത്തിച്ചു. എമര്ജന്സി യൂണിറ്റില് പ്രവേശിപ്പിച്ച ജാക്കിനെ അഞ്ചര മണിക്കൂറില് കൂടുതലെടുത്താണ് അവര് സാധാരണ അവസ്ഥയിലേക്ക് തിരിച്ചെത്തിച്ചത്. അവിടെ നിന്നും സിഡ്നി ചില്ഡ്രന്സ് ഹോസ്പിറ്റലിലേക്ക് ജാക്കിനെ കൊണ്ടുപോയി. അവിടെ ഐസിയുവിലാണ് ജാക്കിനെ പ്രവേശിപ്പിച്ചത്. ഒടുവില് ജനിച്ച് വെറും പതിനൊന്ന് ദിവസങ്ങള്ക്ക് ശേഷം 2015 സെപ്തംബര് 21-ന് ജാക്ക് ലോകത്തോട് വിട പറഞ്ഞു.
മകന്റെ ചലനമറ്റ ശരീരം ഏറ്റുവാങ്ങിയത് ജെസീക്ക ഇന്നും നടുക്കത്തോടെയാണ് ഓര്മ്മിക്കുന്നത്. തന്റെ മകന് എന്താണ് സംഭവിച്ചത് എന്നറിയാന് പോസ്റ്റുമാര്ട്ടം ചെയ്യാനുള്ള ഫോമുകള് ദമ്പതികള് ഒപ്പിട്ടുനല്കി. അങ്ങനെയാണ് എച് എസ് വി (ഹെര്പെസ് സിംപ്ലെക്സ് വൈറസ്) വൈറസ് മൂലം രക്തത്തില് വിഷപദാര്ത്ഥങ്ങള് കലര്ന്നതിനാലാണ് (സെപ്സിസ്) ജാക്ക് മരിച്ചതെന്ന് അറിയുന്നത്.
വായ്പ്പുണ്ണ് വരുത്തുന്ന സാധാരണ വൈറസാണ് ഇത്. എന്നാല് തനിക്കോ ഭര്ത്താവിനോ ജാക്കിനെ സന്ദര്ശിക്കാന് വന്ന ആര്ക്കെങ്കിലുമോ ഈ അസുഖമില്ലായിരുന്നു. എന്നിട്ടും ഈ വൈറസ് എങ്ങനെ ജാക്കിന്റെ ശരീരത്തില് പ്രവേശിച്ചു എന്ന ജെസീക്കയുടെ അന്വേഷണം ചില സത്യങ്ങളിലേക്ക് എത്തിച്ചു.
ഈ ലോകത്ത് 90 ശതമാനം പേരുടെ ദേഹത്തും എച് എസ് വി വൈറസുണ്ട്. മാത്രമല്ല ജാക്കിന്റെ രക്തത്തില് ഇരുമ്പിന്റെ അംശം കൂടുതലായിരുന്നു. എന്നാല് പിന്നീട് രക്തപരിശോധനയ്ക്കായി രക്തം ലഭിക്കാത്തത് മുന്നോട്ടുള്ള പരിശോധനയുടെ വഴി മുടക്കി. എച് എസ് വി ട്രിഗര് ചെയ്തത് എന്തെങ്കിലും ജനിതക കാരണമാണോ എന്ന അന്വേഷണത്തിലായി പിന്നെ ജെസീക്ക. പിന്നീട് നിരവധി പരിശോധനകള് നടത്തിയെങ്കിലും ഒന്നും എവിടെയും എത്തിച്ചേര്ന്നില്ല. എച് എസ് വിക്കെതിരായ പ്രതിരോധമില്ല.
ജാക്ക് പോയ വിഷമത്തില് നിന്ന് കരകയറുന്ന സമയത്താണ് താന് മുന്നാമതും ഗര്ഭിണിയാണെന്ന് ജെസീക്ക തിരിച്ചറിയുന്നത്. ഒടുവില് എലോയിസ് മെയ് ബുക്കനന് അവരുടെ ജീവിതത്തിലേക്ക് വന്നു. ജാക്കിന്റെ ഗതി തന്റെ മൂന്നാമത്തെ കുഞ്ഞിനുണ്ടാവാതിരിക്കാന് എല്ലാ വിധ പരിശോധനകളും ജെസീക്ക നടത്തി. തന്റെ രണ്ടാമത്തെ കുഞ്ഞിനെ നഷ്ടപ്പെട്ട അതേയിടത്തേക്ക് പരിശോധനയ്ക്കായി മൂന്നാമത്തെ കുഞ്ഞിനെയുംകൊണ്ട് പോകേണ്ടി വന്നത് ഇന്നും വേദനയോടെയല്ലാതെ ഓര്മ്മിക്കാനാകുന്നില്ല ജെസീക്കയ്ക്ക്. ഒടുവില് ഫലങ്ങളെല്ലാം അനുകൂലമായാണ് വന്നത്.
ഇന്ന് ജാക്ക് മരിച്ച് മൂന്ന് വര്ഷങ്ങള്ക്ക് ശേഷം ഈ അനുഭവം പറയുന്നതെന്തിനെന്നാല്, ഒരാളെങ്കിലും ഒരു നവജാത ശിശുവിനെ സന്ദര്ശിക്കുന്നതിന് മുമ്പ് ഈ അനുഭവം ഓര്ത്തിട്ട് കൈ ഒരു വട്ടം കൂടി കഴുകുന്നത് പോലുള്ള എക്സ്ട്രാ കെയര് എടുക്കാന് തോന്നിയാല് ഒരു ജീവനല്ലേ അവിടെ നഷ്ടപ്പെടാതിരിക്കുന്നതെന്ന് ജെസീക്ക ചോദിക്കുന്നു.
https://www.facebook.com/Malayalivartha