ദുബായ് നിരത്തിലൂടെ വാടകയ്‌ക്കെടുത്ത ആഡംബര കാറിൽ മൂന്ന് മണിക്കൂർ പാഞ്ഞ യൂറോപ്യന്‍ സഞ്ചാരിയ്ക്ക് വൻ പിഴ. വാടകയ്‌ക്കെടുത്ത ലംബോര്‍ഗിനി കാറില്‍ സഞ്ചാരി പറന്നത് 240 കിലോ മീറ്റര്‍ വേഗതയിലായിരുന്നു.

ഇയാളുടെ ഗതാഗത നിയമലംഘനം റോഡിന് സമീപം സ്ഥാപിച്ചിരുന്ന റഡാറില്‍ പതിഞ്ഞതോടെ 170,000 ദര്‍ഹമാണ് (ഏകദേശം 31 ലക്ഷം രൂപ) പിഴയായി വിധിച്ചത്. 1.3 ദശലക്ഷം ദര്‍ഹം വിലമതിക്കുന്ന ലംബോര്‍ഗിനി കാറാണ് ഇയാള്‍ ഓടിച്ചിരുന്നത്.

ഷെയ്ഖ് സയ്യിദ് റോഡിലൂടെ വെളുപ്പിനെ 2.30നായിരുന്നു കാറിലുള്ള സഞ്ചാരം. അതേസമയം വാഹനം വാടകയ്ക്ക് നല്‍കിയ കമ്പനി പിഴ തങ്ങള്‍ നല്‍കേണ്ടി വരുമോയെന്ന ആശങ്കയിലാണ്. റഡാറിന് വാഹനത്തിന്റെ വേഗത മാത്രമാണ് അറിയാന്‍ സാധിക്കുക. ആരാണ് ഓടിച്ചതെന്ന് അതില്‍ നിന്നും ലഭിക്കുന്ന വിവരങ്ങളുടെ അടിസ്ഥാനത്തില്‍ തെളിയിക്കാന്‍ സാധിക്കുകയില്ല. അതു കൊണ്ട് പിഴ തങ്ങള്‍ നല്‍കേണ്ടി വരുമോയെന്ന ഭീതി കമ്പനിക്കുണ്ട്.