'ദി ബൈബിള്' പ്രദര്ശിപ്പിച്ചുകൊണ്ട് പ്രവര്ത്തനമാരംഭിച്ച കോട്ടയത്തെ ആനന്ദ് തിയറ്ററിന് 50 വയസ്സ്; ഇന്നത്തെ രണ്ടു കളക്ഷന്റെ പണം ദുരിതാശ്വാസ നിധിയിലേക്കെന്ന് തിയേറ്റര് മാനേജ്മെന്റ്
പ്രേക്ഷകരെ ചിരിപ്പിച്ചും ചിന്തിപ്പിച്ചും കരയിച്ചും കോട്ടയത്തെ ആനന്ദ് തിയറ്റര് അമ്പത് തികച്ചു. ദി ബൈബിള് ആയിരുന്നു 50 വര്ഷം മുമ്പ് ആനന്ദ് തിയറ്റര് ആരംഭിച്ചപ്പോള് പ്രദര്ശിപ്പിച്ച ആദ്യ സിനിമ. പിന്നീടിങ്ങോട്ട് ആയിരക്കണക്കിന് സിനിമകള് ഈ തിയറ്ററില് പ്രദര്ശിപ്പിച്ചു.
ബോളിവുഡ് താരം ദിലീപ് കുമാറാണ് 1968 ഓഗസ്റ്റ് 28-ന് തിയറ്റര് ഉദ്ഘാടനം ചെയ്തത്. അമ്പത് വര്ഷത്തിനിടയില് മലയാളത്തിനു പുറമേ തമിഴ്, ഹിന്ദി, ഇംഗ്ലീഷ് ഭാഷകളിലായി ആയിരക്കണക്കിനു ചിത്രങ്ങളാണ് തിയറ്ററില് പ്രദര്ശിപ്പിച്ചിട്ടുള്ളത്. 2011-ല് തിയറ്റര് നവീകരിച്ച് ലക്ഷ്വറി തിയറ്ററാക്കി മാറ്റി.
സിനിമാ തിയറ്ററുകളുടെ നിലവാരം നിശ്ചയിക്കുന്നതിനായി സര്ക്കാര് നിയോഗിച്ച കമ്മിറ്റിയുടെ പ്ലാറ്റിനം പ്ലസ് റേറ്റിംഗ് നേടുന്ന സംസ്ഥാനത്തെ ഏക തിയറ്ററാണ്. തിയറ്ററില് കൂടുതല് പ്രേക്ഷകര് ആസ്വദിച്ച സിനിമകളിലൊന്നായ ത്രീ ഡി ചിത്രം മൈഡിയര് കുട്ടിച്ചാത്തന്റെ രണ്ട് പ്രദര്ശനങ്ങള് ഇന്നു രാവിലെ 11-നും വൈകുന്നേരം ആറിനും, കൂടെ എന്ന ചിത്രത്തിന്റെ രണ്ട് പ്രദര്ശനങ്ങള് ഉച്ചകഴിഞ്ഞ് രണ്ടിനും രാത്രി 8.45-നും ഉണ്ടായിരിക്കും.
ഈ പ്രദര്ശനങ്ങളില് നിന്നുള്ള വരുമാനം മുഖ്യമന്ത്രിയുടെ ദുരിതാശ്വാസ നിധിയിലേക്ക് നല്കുമെന്ന് തിയറ്റര് മാനേജ്മെന്റ് അറിയിച്ചു.
https://www.facebook.com/Malayalivartha