മല്‍സ്യത്തൊഴിലാളികളുടെ വലകളും മറ്റും കടിച്ചുകീറുകയും മല്‍സ്യങ്ങളെ കടിച്ചുമുറിക്കുകയും ചെയ്യുന്ന, ഏവ മല്‍സ്യമെന്ന് വിളിപ്പേരുള്ള കടല്‍മാക്രികള്‍ കടലിന്റെ മക്കള്‍ക്ക് വില്ലനായി.

കൊല്ലം വാടി കടല്‍ മുതല്‍ വിഴിഞ്ഞം പുറംകടലില്‍ മുഴുവനായും ഇവ നിറഞ്ഞുകിടക്കുന്നതിനാല്‍ ശല്യവും നഷ്ടവും ഭയന്ന് തൊഴിലാളികള്‍ പലരും ഇന്നലെ കടലില്‍ പോയില്ല. ഭക്ഷ്യയോഗ്യമല്ലാത്ത ഏവമല്‍സ്യങ്ങള്‍ വലയില്‍പെട്ടാല്‍ ഇവ വല കടിച്ചുമുറിക്കുകയും വലയില്‍പെട്ട മറ്റു മല്‍സ്യങ്ങളെ ഭക്ഷണമാക്കുകയും ചെയ്യുമെന്നും തൊഴിലാളികള്‍ പറഞ്ഞു.

എണ്‍പതിനായിരം മുതല്‍ നാലുലക്ഷം രൂപ വരെ വില വരുന്ന വലകള്‍ ഇത്തരത്തില്‍ നശിപ്പിക്കപ്പെടുന്നതിലൂടെ വന്‍നഷ്ടമാണ് തങ്ങള്‍ക്കുണ്ടാവുന്നതെന്ന് തൊഴിലാളികള്‍ പറഞ്ഞു.

കടല്‍മാക്രികളുടെ കൂട്ടത്തോടുള്ള ആക്രമണത്തില്‍ നശിച്ച വലകള്‍ അറ്റകുറ്റപ്പണികള്‍ ചെയ്ത് ഉപയോഗിക്കാന്‍ പറ്റില്ലെന്ന് ഇവര്‍ പറയുന്നു.

തവളയുടെ വലിപ്പമാണെങ്കിലും ഇവയുടെ ശരീരത്തില്‍ തട്ടിയാല്‍ വളര്‍ന്ന് വലുതാകും. മനുഷ്യമുഖത്തോട് സാമ്യമുള്ളതാണ് ഇവയുടെ വളര്‍ന്നരൂപം.

ഏവയോടൊപ്പം വലകള്‍ക്കു ഭീഷണിയായി ചുവന്ന ഞണ്ടുകളും എത്തിയിട്ടുണ്ട്. ഇവ വല മുറിക്കില്ലെങ്കിലും വലയില്‍നിന്നു വേര്‍പെടുത്താന്‍ ബുദ്ധിമുട്ടാണ്.

ഇന്നലെ തീരത്തടുത്ത ഏതാനും വള്ളങ്ങളില്‍ ഏവ പെട്ടതോടെ അതിലെ മറ്റു മല്‍സ്യങ്ങളെ കടിച്ചുമുറിച്ചതിനാല്‍ ഉപയോഗശൂന്യമായി.