പയ്യന്നൂര് സുബ്രഹ്മണ്യസ്വാമിക്ഷേത്രത്തിന് പഞ്ചാരക്കലം സമര്പ്പിച്ചത് മുസ്ലിം തറവാട്ടിലെ കാരണവര്, നൂറ്റാണ്ടുകള്ക്ക് മുന്പേയുള്ള ആചാരം സാമുദായികഐക്യം വിളിച്ചറിയിച്ച് ഇപ്പോഴും നടക്കുന്നു!
മുസ്ലിം തറവാട്ടിലെ കാരണവരും മരുമക്കളും, നിറദീപം സാക്ഷിയാക്കി സുബ്രഹ്മണ്യസ്വാമിക്ക് പഞ്ചാരക്കലം സമര്പ്പിച്ചു. ചിരപുരാതന മുസ്ലിം തറവാടായ കേളോത്ത് തറവാട്ടിലെ കാരണവര് മൂസ ഹാജിയും മരുമക്കളായ ഷുക്കൂര്, സലാം, റഷീദ്, ഷാഹി, ഹനീഫ എന്നിവരും ചേര്ന്നാണ് സുബ്രഹ്മണ്യസ്വാമി ക്ഷേത്രത്തില് പുത്തരിക്കുള്ള പഞ്ചസാര സമര്പ്പിച്ചത്. നൂറ്റാണ്ടുകള്ക്ക് മുന്പേ നടന്നുവരുന്നൊരു ആചാരം തനിമ ചോരാതെ പുതുതലമുറയും സാമുദായികഐക്യം വിളിച്ചറിയിച്ച് ഇപ്പോഴും നടത്തിവരുന്നു.
ജുമാ മസ്ജിദിലെ സുബഹ് നമസ്കാരത്തിനു ശേഷമാണ് കാരണവരും മരുമക്കളും തറവാട്ടില് ചെന്ന് മണ്കുടത്തില് നിറച്ച പഞ്ചസാരയുമായി ക്ഷേത്രനടയിലെത്തിയത്. ജീവനക്കാരും ട്രസ്റ്റി ബോര്ഡ് അംഗങ്ങളും കാരണവരെയും മരുമക്കളെയും ക്ഷേത്ര മതില്ക്കകത്തേക്ക് സ്വീകരിച്ചാനയിച്ചു. ബലിക്കല്ലിനു മുന്നിലെ നിറദീപവുമായി നില്ക്കുന്ന തട്ടുവിളക്കിനു മുന്നില് കാരണവര് ചൂണ്ടിക്കാട്ടിക്കൊടുത്ത സ്ഥലത്ത് മരുമകന് പഞ്ചാരക്കലം സമര്പ്പിച്ചു.
പെരുമാള്ക്ക് പുത്തരിക്കുള്ള അഗ്രാണത്തിലും പാല്പായസത്തിലും ചേര്ക്കാനുള്ള പഞ്ചസാരയാണിത്. കലവറക്കാരന് പഞ്ചാരക്കലമെടുത്ത് മണ്ഡപത്തില് സമര്പ്പിച്ചു. മുഹൂര്ത്തമറിയിച്ചു നേമക്കാരന് പൊങ്ങിലാട്ട് മാരാര് ശംഖുവിളിച്ചതോടെ 10 വീട്ടില് പൊതുവാള്മാരുടെ വീടുകളില് നിന്ന് സ്ത്രീകള് ചാണകം മെഴുകിയ കൂട്ടയില് തലച്ചുമടായി, പുതിയ അരി ക്ഷേത്ര മതില്ക്കകത്തു കൊണ്ടുവന്ന് ശ്രീകോവിലിനു സമീപം സമര്പ്പിച്ചു.
നിശ്ചിത അരി പെരുമാള്ക്കു നിവേദ്യവും പാല്പായസവും തയാറാക്കാന് കീഴ്ശാന്തി തിടപ്പള്ളിയിലേക്കു കൊണ്ടുപോകുമ്പോള് ഒപ്പം പഞ്ചാരക്കലവും തിടപ്പള്ളിയിലേക്കു കൊണ്ടുപോയി. പെരുമാള്ക്കും ക്ഷേത്രത്തില് പുത്തരിയുണ്ണാന് എത്തിയ ജനങ്ങള്ക്കും നല്കിയ അഗ്രാണത്തില് മുസ്ലിം തറവാട്ടില് നിന്നു കൊണ്ടുവന്ന പഞ്ചസാരയാണ് ഉപയോഗിച്ചത്. ഈ ആചാരത്തിനു നൂറ്റാണ്ടുകളുടെ പഴക്കമുണ്ടെന്നാണ് പഴമക്കാര് പറയുന്നത്. ക്ഷേത്രത്തില് പുത്തരി കല്പിച്ചാല് ഈ വിവരം ജീവനക്കാര് കേളോത്ത് തറവാട്ടില് ചെന്ന് അറിയിക്കാറുണ്ട്. പഞ്ചാരക്കലം സമര്പ്പിച്ച കാരണവര്ക്കും മരുമക്കള്ക്കും ക്ഷേത്രം അരിയും തേങ്ങയും പഴവും മറ്റും സമ്മാനമായി നല്കുന്ന ചടങ്ങുമുണ്ട്.
https://www.facebook.com/Malayalivartha