ഹോങ്കോംഗിലേക്ക് കുടിയേറ്റാന്‍ മറുനാട്ടുകാര്‍ ആ നാട്ടിലെത്തി നാട്ടുകാരികളായ യുവതികളെ തട്ടിപ്പ് വിവാഹത്തിന് ഇരകളാക്കുന്നു. എല്ലാ രീതിയിലും നിയമപരമായി ശരിയായ രേഖകളുള്ള വിവാഹം നടത്തിയ ശേഷം ഭര്‍ത്താക്കന്മാര്‍ മുങ്ങുകയും ചെയ്യും.

പല കല്യാണത്തിലും പെണ്‍കുട്ടികള്‍ക്ക് ആരാണ് തങ്ങളെ വിവാഹം കഴിച്ചതെന്ന് പോലും അറിയാന്‍ കഴിയാത്ത സ്ഥിതിയാണ്. ഇത്തരം വിവാഹം നടത്താന്‍ തട്ടിപ്പ് സ്ഥാപനങ്ങള്‍ ഉണ്ടെന്നും ബ്യൂട്ടീഷ്യന്‍ കോഴ്‌സുകള്‍ പോലെയുള്ള കാര്യങ്ങളിലേക്ക് അപേക്ഷ ക്ഷണിച്ച് കോഴ്‌സിന്റെ ഭാഗം എന്ന നിലയിലാണ് തട്ടിപ്പ് വിവാഹങ്ങള്‍ നടത്തുന്നതെന്നുമാണ് റിപ്പോര്‍ട്ടുകളില്‍ പറയുന്നത്.

ഓരോ വര്‍ഷവും അതിര്‍ത്തി കടക്കാന്‍ ശരാശരി 1000 തട്ടിപ്പു വിവാഹങ്ങള്‍ ഹോങ്കോംഗില്‍ നടക്കുന്നുണ്ടെന്നാണ് ഹോങ്കോംഗ് പോലീസ് പറയുന്നത്. ഹോങ്കോംഗിലെ പങ്കാളികളെ വിവാഹം കഴിച്ച ശേഷം അവരുമായുള്ള വൈവാഹിക ബന്ധത്തിന്റെ രേഖകള്‍ നഗരത്തിലുള്ള സ്ഥിരതാമസത്തിന് ഉപയോഗിക്കുന്നതാണ് രീതി. ഹോങ്കോംഗിലെ ചൈനീസ് പെണ്‍കുട്ടികളാണ് അധികവും ഈ രീതിയില്‍ തട്ടിപ്പിനിരയാകുന്നത്്. പല വിവാഹത്തിലും വിവാഹരേഖകളെല്ലാം നിയമപരം ആണെങ്കിലും വരനും വധുവും തമ്മില്‍ തിരിച്ചറിയുകപോലുമില്ലത്രേ.

മിക്ക വിവാഹങ്ങളും ഹോങ്കോംഗിന് പുറത്താണ് നടക്കാറുള്ളത്. പ്രായപൂര്‍ത്തിയാകുന്ന പല പെണ്‍കുട്ടികളും സാഹചര്യത്തെക്കുറിച്ച് ഒരു വിവരവുമില്ലാതെയാണ് ഈ തട്ടിപ്പിന് ഇരകളാകുന്നത്. വിവാഹിതകള്‍ എന്ന പദവി നേടുന്ന ഇവര്‍ക്ക് പിന്നീട് വിവാഹമോചനത്തിന് അപേക്ഷിക്കാം.വിവാഹിതനായി ഹോങ്കോംഗില്‍ വരന്‍ എത്തുന്നു. ആരാണ് തന്നെ വിവാഹം കഴിച്ചതെന്ന പ്രാഥമിക വിവരം പോലും പെണ്‍കുട്ടികള്‍ക്ക് അറിയാന്‍ കഴിയാറില്ല.

മേക്കപ്പ് ആര്‍ടിസ്റ്റ് അപ്രന്റീസ്ഷിപ്പിന് ഫേസ്ബുക്കിലെ ലിസ്റ്റ് കണ്ടാണ് മെയ്-യില്‍ 21-കാരി അപേക്ഷിച്ചത്. അത് കഴിഞ്ഞപ്പോള്‍, തന്നെ വെഡ്ഡിംഗ് പഌനര്‍ റോളിലേക്കാണ് എടുക്കുന്നതെന്നും സ്ഥാപനം പെണ്‍കുട്ടിയെ വിശ്വസിപ്പിച്ചു. ഹോങ്കോംഗില്‍ ഒരാഴ്ച സൗജന്യ പരിശീലനം നല്‍കിയശേഷം കോഴ്‌സിന്റെ ഭാഗമായി ചൈനയിലെ പ്രവിശ്യയായ ഫുഷുവില്‍ വിവാഹം അഭിനയിക്കണമെന്ന് യുവതിയോട് സ്ഥാപനം ആവശ്യപ്പെട്ടു.

അഭിനയം എന്ന് പറയുന്നതിനാല്‍ തന്നെ ആരുമായാണ് വിവാഹം കഴിക്കുന്നതെന്നൊന്നും ചോദിക്കാന്‍ പെണ്‍കുട്ടികള്‍ മിനക്കെടാറുമില്ല. നിയമാനുസൃതരീതിയില്‍ നടക്കുന്ന ഒരു വിവാഹത്തിന്റെ എല്ലാ രീതികളും ഇതിലുണ്ടായിരിക്കുമെന്നും എന്നാല്‍ ചടങ്ങ് കഴിഞ്ഞ് ഈ വിവാഹം നിയമപരമല്ലാതാകുമെന്നും മുന്‍കൂട്ടി പറയുകയും ചെയ്യാറുണ്ട്. എല്ലാം കഴിഞ്ഞ് ഹോങ്കോംഗില്‍ തിരിച്ചെത്തിയപ്പോള്‍ ഒരു സഹപാഠിയാണ് അതിലൂടെ താന്‍ വിവാഹിതയായി കഴിഞ്ഞെന്ന് അവളോട് പറഞ്ഞത്. വിവാഹമോചനത്തിന് ഇപ്പോള്‍ അപേക്ഷ നല്‍കാമെങ്കിലൂം ആരാണ് തന്നെ വിവാഹം ചെയ്തതെന്ന് പോലും അവള്‍ക്ക് അറിയില്ല.!!

ചൈനയിലെ പ്രവിശ്യയായ ഫുഷുവില്‍ വച്ച് വിവാഹം കഴിഞ്ഞ ശേഷം, മേക്കപ്പ് ആര്‍ടിസ്റ്റ് അപ്രന്റീസ്ഷിപ്പ് പരിശീലനം നേടിയ ഹോങ്കോംഗില്‍ എത്തുമ്പോഴാണ്, ആര്‍ക്കോ ഹോങ്കോംഗില്‍ പ്രവേശിക്കാന്‍ വേണ്ടി തട്ടിപ്പ് വിവാഹത്തിന് ഇരയാകുകയാണെന്ന് ഇവര്‍ അറിയുന്നത്. കാര്യങ്ങള്‍ അറിഞ്ഞ ശേഷം നിയമസഹായം നേടാമെന്ന് വിചാരിച്ചാല്‍ കുറ്റകൃത്യം നടത്തിയതിന്റെ ഒരു തെളിവും ഇല്ലാത്തതിനാല്‍ പോലീസിന് കേസെടുക്കാന്‍ കഴിയാറില്ല. വിവാഹത്തട്ടിപ്പിന്റെ ഏറ്റവും പുതിയ രൂപമാണ് ഇതെന്നാണ് ഹോങ്കോംഗ് ഫെഡറേഷന്‍ ഓഫ് ട്രേഡ് യൂണിയന്‍ പറയുന്നത്.