എരുമേലിക്കടുത്ത് ഏഞ്ചല്‍വാലി എന്ന ഗ്രാമത്തെ മഹാപ്രളയം വിഴുങ്ങുമ്പോള്‍ മുട്ടുമണ്ണില്‍ റെജി-റോസമ്മ ദമ്പതികളുടെ മകള്‍ രജനിയെ വേദന വിഴുങ്ങുകയായിരുന്നു, വെറും വേദനയല്ല പ്രസവവേദന! ഭര്‍ത്താവ് അനീഷിന്റെ നാടായ റാന്നിയിലെ താലൂക്ക് ആശുപത്രിയിലായിരുന്നു രജനിയുടെ ഗര്‍ഭകാല ചികില്‍സ.

പ്രസവത്തിനുള്ള തിയതി ഓഗസ്റ്റ് 29 ആയിരുന്നു . 20-ന് ആശുപത്രിയില്‍ പോകാം എന്നു കരുതിയിരിക്കയായിരുന്നു രജനി. എന്നാല്‍ ഓഗസ്റ്റ് 15-ന് വെള്ളം നിറഞ്ഞ് ഏഞ്ചല്‍വാലി ഒറ്റപെട്ടു. അപ്പോള്‍ ശ്വാസതടസവും പുറംവേദനയും സഹിക്കാന്‍ പറ്റാത്ത അവസ്ഥയിലായി രജനി. വീടുകളോളം പൊക്കത്തില്‍ നിറഞ്ഞൊഴുകുന്ന പെരുവെള്ളത്തില്‍ ഒന്നും ചെയ്യാനാവാതെ വീട്ടുകാരും നാട്ടുകാരും ഒരു പോലെ വിഷമിച്ചു. വൈദ്യുതിയില്ല, നടന്നുപോകാന്‍ മറ്റ് വഴികളില്ല, മൊബൈല്‍ ഫോണുകള്‍ നിശ്ചലമായി.

ഗ്രാമം ഒറ്റപ്പെട്ട വിവരം റവന്യു വിഭാഗം റിപ്പോര്‍ട്ട് ചെയ്തതോടെ നേവിയുടെ ഹെലികോപ്റ്റര്‍ എത്താമെന്ന ഉറപ്പ് ലഭിച്ചു. ഏഞ്ചല്‍വാലി സെന്റ് മേരീസ് സ്‌കൂളിന്റെ മൈതാനത്ത് ഹെലികോപ്റ്റര്‍ ഇറക്കാന്‍ തീരുമാനിച്ചു. എന്നാല്‍ മൈതാനത്തിനു സമീപത്തെ മരക്കൊമ്പുകള്‍ മുറിച്ചു മാറ്റണമെന്ന് നേവി നിര്‍ദേശിച്ചു.നാട്ടുകാര്‍ രാത്രി തന്നെ അതും നടപ്പാക്കി. 16-ന് പ്രളയമേഖലകളില്‍ സാധന സാമഗ്രികളുമായി എത്തിയ ഹെലികോപ്റ്റര്‍ രജനിയുമായി പറക്കാന്‍ തയ്യാറായി എത്തി.

വയറ്റിലെ കുരുന്നിനെ താങ്ങിപ്പിടിച്ച് ഹെലികോപ്റ്ററില്‍ കയറാന്‍ എത്തിയ രജനി പെട്ടെന്ന് കുഴഞ്ഞു വീണു. തലയുടെ പിന്‍വശം അടിച്ചുവീണ രജനിയുടെ ബോധം നഷ്ടമായി. അനക്കമില്ലാതെ കിടക്കുന്ന രജനിയെ കോരിയെടുത്ത് ഹെലികോപ്റ്റര്‍ കുതിക്കുമ്പോള്‍ അതിനുള്ളില്‍ ശുശ്രൂഷയ്ക്കായി ഡോക്ടറും പൊട്ടിക്കരഞ്ഞ്‌കൊണ്ട് അമ്മയും ഒപ്പമുണ്ടായിരുന്നു. ആദ്യമായി നാട്ടിലിറങ്ങുന്ന ഹെലികോപ്റ്റര്‍ കാണാനെത്തിയിട്ട് ഒടുവില്‍ രജനിയുടെ വീഴ്ചകണ്ട് തരിച്ചുനിന്ന നൂറുകണക്കിനാളുകളുടെ പ്രാര്‍ഥന താഴെ ഉണ്ടായിരുന്നു. കാഞ്ഞിരപ്പള്ളി അമല്‍ജ്യോതി കോളജ് മൈതാനത്ത് ഇറക്കിയ രജനിയെ പിന്നീട് കാഞ്ഞിരപ്പള്ളി താലൂക്ക് ആശുപത്രിയിലേക്ക് മാറ്റി.

രജനിയുടെ ഭര്‍ത്താവ് അനീഷിന്റെ വീട് റാന്നിയിലാണ്. രജനിയെ ഹെലികോപ്റ്ററില്‍ കയറ്റുമ്പോള്‍ അനീഷ് റാന്നിയിലെ വീട്ടില്‍ പ്രളയത്തിനു നടുവിലായിരുന്നു. ഫോണ്‍ വഴി പോലും വിവരങ്ങള്‍ അറിയാന്‍ സാധിക്കാതിരുന്ന അനീഷിന് രജനിയ്ക്കടുത്ത് എത്താനായത് മുന്നു ദിവസം കൂടിക്കഴിഞ്ഞ് 19-നാണ്, വെള്ളം ഇറങ്ങിക്കഴിഞ്ഞ്!

23 വരെ കാഞ്ഞിരപ്പള്ളി താലൂക്ക് ആശുപത്രിയില്‍ ചികില്‍സയിലായിരുന്ന രജനിയെ ഓണത്തിരക്കുമൂലം കോട്ടയം മെഡിക്കല്‍ കോളജ് ആശുപത്രിയിലേയ്ക്ക് മാറ്റി, 24-ന് സുഖപ്രസവം, നനുനനുത്ത ചിരിയുമായി പ്രളയത്തെ അതിജിവിച്ച് ആണ്‍കുഞ്ഞ് എത്തി, പിറക്കുന്ന കുഞ്ഞ് ആണാണെങ്കില്‍ വിളിക്കാന്‍ മനസിലുറപ്പിച്ച പേര് അവര്‍ വിളിച്ചു, അഭിന്‍.

സംസ്ഥാനത്ത് പ്രളയത്തില്‍ നിന്നും ആകാശമാര്‍ഗത്തില്‍ രക്ഷപെട്ട് കുഞ്ഞിന് ജന്മം നല്‍കിയ രജനിക്ക് പക്ഷേ ആ യാത്രയെപറ്റി ഓര്‍യില്ല!! ഓര്‍മിക്കാന്‍ ഇഷ്ടമില്ലാത്ത ആ പ്രളയം പോലെ, ആ പ്രളയം തരപ്പെടുത്തിത്തന്ന യാത്രയും രജനിയുടെ ഓര്‍മയില്‍ ഇല്ല!