കാട്ടുപറമ്പില്‍ ആന്റണിയുടെ വീട്ടില്‍, കേരളത്തെ മുക്കിയ പ്രളയത്തില്‍ കഴുത്തൊപ്പം വെള്ളം കയറിയെങ്കിലും ഒരു തുണ്ടു പേപ്പര്‍പോലും  നഷ്ടപ്പെട്ടില്ല. മത്സ്യത്തൊഴിലാളിയായ കെ.എസ്. ആന്റണിക്ക് തുണയായത് അനുഭവങ്ങളില്‍നിന്ന് ആര്‍ജിച്ചെടുത്ത അറിവാണ്. മത്സ്യത്തൊഴിലാളികളുടെ ഭാഷയില്‍ 'തക്കക്കേട്' എന്നുപറയുന്ന പ്രതിഭാസത്തെ തിരിച്ചറിഞ്ഞതിനാലാണ് വരാനിരിക്കുന്ന ദുരന്തത്തിന്റെ തീവ്രതയെക്കുറിച്ച് ആന്റണിക്ക് മുന്‍കൂട്ടി മനസ്സിലാക്കാനായത്.

കര്‍ക്കിടകവാവ് കഴിഞ്ഞ് പഞ്ചമി മുതല്‍ വേലിയേറ്റത്തിന് ശക്തി കൂടുന്നതിനാണ് തക്കക്കേട് എന്നു പറയുന്നത്. ഈ സമയത്ത് ഒഴുകിയെത്തുന്ന വെള്ളം കടല്‍ സ്വീകരിക്കില്ല. മഴവെള്ളവും ഡാമുകളില്‍നിന്ന് ഒഴുകിയെത്തുന്ന വെള്ളവും കടല്‍ സ്വീകരിക്കാതെ വരും. ഷഷ്ഠി, സപ്തമി, അഷ്ടമി വരെയുള്ള തുടര്‍ദിവസങ്ങളിലും അധികമായി വരുന്ന വെള്ളം കടല്‍ തള്ളും. ഇക്കുറി പഞ്ചമി ഓഗസ്റ്റ് 15-ന് ആയിരുന്നു. അന്നാണ് ആര്‍ത്തലച്ച മഴയും ഉരുള്‍പൊട്ടലുകളും തുടര്‍ച്ചയായി സംഭവിച്ച് കേരളത്തെ ദുരിതക്കയത്തിലാക്കിയത്.

ഡാമുകളില്‍ നിന്ന് നിയന്ത്രണാതീതമായി വന്ന വെള്ളം തക്കക്കേട് കാരണം കടലെടുക്കാതെ വന്നതോടെ കരപ്രദേശങ്ങളില്‍ പത്തടിയോളം വെള്ളം ഉയര്‍ന്നു. പ്രളയം രൂക്ഷമായി ബാധിച്ച സ്ഥലങ്ങളിലൊന്നാണ് പറവൂരിലെ പുത്തന്‍വേലിക്കര. ഇവിടെ ഭൂരിപക്ഷം വീടുകളിലും വെള്ളം കയറി. വെള്ളോട്ടുംപുറം എന്ന താഴ്ന്ന പ്രദേശത്താണ് ആന്റണിയുടെ വീട്.

മഴ നിര്‍ത്താതെ പെയ്യുകയും സംസ്ഥാനത്തുടനീളമുള്ള ഡാമുകള്‍ തുറന്നതിനെക്കുറിച്ചും മാധ്യങ്ങളില്‍ വാര്‍ത്തകള്‍ നിറയുകയും ചെയ്തതോടെ ആന്റണി അപകടം മണത്തു. കടലിന്റെ സ്വഭാവം അറിയാവുന്ന അയല്‍ക്കാര്‍ക്കും ബന്ധുക്കള്‍ക്കും പഞ്ചായത്ത് അംഗങ്ങള്‍ക്കുമൊക്കെ മുന്നറിയിപ്പു നല്‍കി. എന്നാല്‍ അതാരും കാര്യമാക്കിയില്ല. ആന്റണി പക്ഷേ കുടുംബത്തെ വീട്ടില്‍നിന്നു മാറ്റി. കട്ടിലിനു മുകളില്‍ ഒരു മേശയിട്ട് അതില്‍ ഫ്രിഡ്ജ്, വാഷിങ് മെഷീന്‍ എന്നിവ വച്ച് എല്ലാം കൂടി മേല്‍ക്കൂരയോടു ചേര്‍ത്തുകെട്ടി. രേഖകളും സര്‍ട്ടിഫിക്കറ്റുകളുമെല്ലാം വീട്ടില്‍നിന്നു മാറ്റി.

പ്രളയത്തില്‍ ആന്റണിയുടെ വീട്ടില്‍ ആറരയടിയോളം വെള്ളം ഉയര്‍ന്നിരുന്നു. മൂന്നു മുറിയുള്ള ചെറിയ വീടിനു കേടുപാടുണ്ടായെങ്കിലും സാധനങ്ങള്‍ സുരക്ഷിതമായിരുന്നു. പുതിയ തലമുറയില്‍ പലര്‍ക്കും ഇത്തരം കാര്യങ്ങളില്‍ അറിവില്ല. അതുകൊണ്ട് സര്‍ക്കാര്‍ സ്ഥാപനങ്ങള്‍ ഇത്തരം പരമ്പരാഗതമായ അറിവുകള്‍ കാലാവസ്ഥാ പ്രവചനവുമായി ചേര്‍ത്തുവച്ച് ഉപയോഗപ്പെടുത്തണമെന്നാണ് ആന്റണിയുടെ പക്ഷം.