നാടിനെ പ്രളയം വിഴുങ്ങിയതറിഞ്ഞ് അവധിയിലെത്തി സന്നദ്ധസേവനം നടത്തി, 'എടോ' വിളികളോടെല്ലാം അനുസരണയോടെ പ്രതികരിച്ച് ചാക്ക് ചുമന്നു, ഒടുവില് ഞെട്ടലോടെ നാട്ടുകാര് തിരിച്ചറിഞ്ഞു, അതൊരു ഐ എ എസ്സുകാരനാണെന്ന്!
കാക്കനാട് കെ.ബി.പി.എസ്. പ്രസിലെത്തിയ ലോറികളില്, പ്രളയബാധിത പ്രദേശങ്ങളില് വിതരണം ചെയ്യാനുള്ള സാധനസാമഗ്രികള് എത്തിക്കൊണ്ടിരിക്കുന്ന സമയം. അവയുടെ ശേഖരണവും വിതരണവും നടക്കുമ്പോള് സാധനങ്ങളിറക്കാനും കയറ്റിവിടാനുമൊക്കെ ചുറുചുറുക്കോടെ മുന്നിലുണ്ടായിരുന്നു ആ ചെറുപ്പക്കാരന്.
ചാക്കുകെട്ടുകള് തോളിലേറ്റാന് തൊഴിലാളികളിലൊരാളായി മൂന്നു ദിവസം ആ ചെറുപ്പക്കാരനുണ്ടായിരുന്നു. ജില്ലയിലെ സംഭരണ കേന്ദ്രങ്ങളുടെ ചുമതലയുള്ളതിനാല് കളക്ടര് മുഹമ്മദ് വൈ. സഫീറുള്ളയും സബ് കളക്ടര് പ്രജ്ഞാല് പാട്ടീലും അവിടെ നടക്കുന്ന പ്രവര്ത്തനങ്ങള് വിലയിരുത്താന് എത്തിയപ്പോഴാണ് തിരിച്ചറിഞ്ഞത്, അതൊരു കളക്ടറായിരുന്നു!
ദാദ്രാനാഗര് ഹവേലിയുടെ കലക്ടര് സ്ഥാനത്തുനിന്ന് അവധി എടുത്തെത്തിയ കണ്ണന് ഗോപിനാഥന്. കോട്ടയം പുതുപ്പള്ളി സ്വദേശി. ഐ.എ.എസ്. 2012 ബാച്ച് ഉദ്യോഗസ്ഥന്.
എറണാകുളത്തു വരുന്നതിനു മുമ്പ് മൂന്നു ദിവസം ആലപ്പുഴയിലായിരുന്നു സേവനം. സ്വന്തം ബാച്ചുകാരനായ കളക്ടര് എസ്. സുഹാസിനെപ്പോലും അത് അറിയിച്ചിരുന്നില്ല. 'എടോ' എന്ന് അതുവരെ വിളിച്ചത് ഒരു കളക്ടറെയാണെന്നു തിരിച്ചറിഞ്ഞതോടെ കെ.ബി.പി.എസിലുണ്ടായിരുന്നവര് ഞെട്ടി.
അവരുടെ അമ്പരപ്പിനെ ഒരു പുഞ്ചിരികൊണ്ട് മായ്ച്ചുകളഞ്ഞു. സെല്ഫി എടുക്കാനായി ചുറ്റും കൂടിയവരെ സ്നേഹപൂര്വം വിലക്കി. സ്വന്തം നാട്ടിലെ ദുരിതമകറ്റാന് ഒരു സന്നദ്ധപ്രവര്ത്തകനായി ജോലി ചെയ്യാനായാണ് എത്തിയതെന്നു പറഞ്ഞ് തിങ്കളാഴ്ച വൈകിട്ട് ജോലിസ്ഥലത്തേക്കു മടങ്ങി.
https://www.facebook.com/Malayalivartha