കുട്ടിക്കാലത്ത് പരിചരിച്ച നഴ്‌സുമാരെയും ഡോക്ടര്‍മാരെയുമൊക്കെ ഓര്‍ത്തുവെക്കുന്നവര്‍ വളരെ കുറച്ചായിരിക്കും. ഇരുപത്തിയെട്ടു വര്‍ഷം മുമ്പ് താന്‍ പരിചരിച്ച കുഞ്ഞ് ഡോക്ടറായി അതേ ആശുപത്രിയില്‍ എത്തിയ കഥ പങ്കുവെക്കുകയാണ് വില്‍മ വോങ്ങ് എന്ന നഴ്‌സ്.

പൂര്‍ണവളര്‍ച്ചയെത്താത്ത കുഞ്ഞുങ്ങളെ പരിചരിക്കുന്ന വിഭാഗത്തിലെ നഴ്‌സായ വില്‍മയും ഇരുപത്തിയെട്ടുവര്‍ഷം മുമ്പ് അവര്‍ പരിപരിചരിച്ച ബ്രാന്‍ഡന്‍ സെമിനാറ്റോറും സമൂഹമാധ്യമത്തിലെ താരങ്ങളാവുകയാണ്.

കാലിഫോര്‍ണിയയിലെ ലൂസില്‍ പാക്കാര്‍ഡ് ചില്‍ഡ്രന്‍സ് ആശുപത്രിയിലെ നഴ്‌സാണ് വില്‍മ. മുപ്പതു വര്‍ഷങ്ങള്‍ക്കു മുമ്പ് പൂര്‍ണ വളര്‍ച്ചയെത്താതെ താന്‍ പരിചരിച്ചിരുന്ന കുഞ്ഞാണ് വളര്‍ന്നു വലുതായി അതേ ആശുപത്രിയിലെ ഡോക്ടറായതെന്ന് തിരിച്ചറിഞ്ഞ അത്ഭുതത്തിലാണ് വില്‍മ. ഇരുപത്തിയെട്ടു വര്‍ഷങ്ങള്‍ക്കിപ്പുറം ബ്രാന്‍ഡന്‍ ഡോക്ടറായി എത്തിയപ്പോള്‍ സിനിമയെ വെല്ലുന്ന നിമിഷമാണ് അരങ്ങേറിയത്. ഇരുപത്തിയൊമ്പത് ആഴ്ച്ചയായിരുന്നു വില്‍മയുടെ കയ്യില്‍ ബ്രാന്‍ഡനിനെ ലഭിക്കുമ്പോള്‍ പ്രായം.

ബ്രാന്‍ഡന്റെ പേരിന്റെ അവസാനം കേട്ടപ്പോഴാണ് എവിടെയോ കേട്ടതുപോലെയുണ്ടല്ലോ എന്ന് വില്‍മയ്ക്കു തോന്നിയത്. അങ്ങനെ ബ്രാന്‍ഡനോട് അദ്ദേഹം എവിടെ നിന്നാണെന്നും വീട്ടുകാരെക്കുറിച്ചുമൊക്കെ വില്‍മ ചോദിച്ചു. സംശയം തീര്‍ക്കാനായി ബ്രാന്‍ഡന്റെ അച്ഛന്‍ പോലീസ് ഓഫീസറാണോ എന്നു ചോദിച്ചു. അപ്പോഴേക്കും ബ്രാന്‍ഡനും ഏറെ കേട്ടിരുന്ന വില്‍മയെ തിരിച്ചറിഞ്ഞിരുന്നു. അങ്ങനെയാണ് താന്‍ പരിചരിച്ചിരുന്ന ബ്രാന്‍ഡനാണ് ഇപ്പോള്‍ മുന്നില്‍ വന്നു നില്‍ക്കുന്നതെന്ന് വില്‍മയ്ക്കു മനസ്സിലായത്.

ബ്രാന്‍ഡന്‍ ആശുപത്രിയില്‍ എത്തുന്നതിനു മുമ്പുതന്നെ വില്‍മ എന്ന നഴ്‌സിനെക്കുറിച്ച് അന്വേഷിക്കണമെന്ന് അമ്മ പറഞ്ഞിരുന്നുവെങ്കിലും അവര്‍ റിട്ടയര്‍ ചെയ്തിട്ടുണ്ടാകുമെന്നാണ് കരുതിയിരുന്നത്. എന്തായാലും ഇപ്പോഴത്തെ കൂടിക്കാഴ്ച്ചയുടെ ആഹ്ലാദത്തിലാണ് ഇരുവരും.

വില്‍മയുടേയും ബ്രാന്‍ഡന്റേയും മുപ്പതുവര്‍ഷം മുമ്പുള്ള ചിത്രവും ഇപ്പോഴത്തേതും ആശുപത്രി അധികൃതര്‍ തന്നെ പുറത്തുവിട്ടതോടെ വാര്‍ത്ത വൈറലായി. ആദ്യത്തെ ചിത്രം വില്‍മയുടെ മടിയിലിരിക്കുന്ന നാല്‍പതു ദിവസം പ്രായമുള്ള ബ്രാന്‍ഡന്റേതും അടുത്തത് വര്‍ഷങ്ങള്‍ക്കിപ്പുറവുമുള്ള ചിത്രവുമാണ്.