നിസാമിന് സല്യൂട്ട്; രാജ്യം കാക്കുന്ന സൈനിക ഉദ്യോഗസ്ഥന് പൂരത്തെറിയും കൊടിയ മര്ദ്ദനവും; ലഫ്റ്റനന്റ് കമാന്ഡറിനെ സെല്ലില് ഉടുതുണി പോലുമില്ലാതെ വിലങ്ങണിയിച്ചു നിര്ത്തി
വിവാദ വ്യവസായി മുഹമ്മദ് നിസാമിന് പോലീസുകാര് നല്കുന്ന ആദരവ് കണ്ട് കേരളം പലതവണ അത്ഭുതപ്പെട്ടതാണ്. അതേസമയം രാജ്യം കാക്കുന്ന സൈനിക ഉദ്യോഗസ്ഥന് പുല്ലു വിലയാണ് പോലീസുകാര് നല്കിയത്.
ലഫ്റ്റനന്റ് കമാന്ഡറായ ചോറ്റി ഇളയടത്ത് മഠം കലേഷ് മോഹനനെയാണ് പോലീസുകാര് മര്ദ്ദിച്ച് അവശനാക്കിയത്. കഴിഞ്ഞ 20ന് രാത്രി പത്തരയോടെയാണു സംഭവം. മുണ്ടക്കയം എസ്ഐയും പൊലീസുകാരനും മര്ദിച്ചതായി കലേഷിന്റെ മാതാവ് മുഖ്യമന്ത്രിക്കു പരാതിയും നല്കി.
അവധിക്കു നാട്ടില്വന്ന കലേഷ് തിരികെ ഡല്ഹിയിലെ ജോലി സ്ഥലത്തേക്ക് പോകാന് തയാറെടുപ്പു നടത്തുന്നതിനിടെയാണ് വീട്ടിലെത്തിയ മുണ്ടക്കയം സ്റ്റേഷനിലെ എസ്ഐയും പൊലീസ് ഡ്രൈവറും അകാരണമായി മര്ദിച്ചത്. ലഫ്റ്റനന്റ് കമാന്ഡര് ആണെന്നു പറഞ്ഞിട്ടും മര്ദനം തുടര്ന്നു. കലേഷിനെ മര്ദിക്കുന്നതുകണ്ട് തടയാന് ശ്രമിച്ച അമ്മ ശാന്തമ്മയെ പൊലീസുകാരന് കഴുത്തില് പിടിച്ച് തള്ളിയിട്ടുവെന്നും പരാതിയുണ്ട്. വീഴ്ചയില് കൈമുട്ടിനു പരുക്കേറ്റു. കലേഷിന്റെ കയ്യില് വിലങ്ങിട്ട് വീടിന്റെ ഗേറ്റിലും ജീപ്പിന്റെ കമ്പിയിലും ബന്ധിച്ചശേഷം മര്ദിക്കുകയും വയറിന്റെ ഭാഗത്തു തൊഴിച്ചുവെന്നും പരാതിയില് പറയുന്നു.
ഈസമയം വീട്ടിലുണ്ടായിരുന്ന കലേഷിന്റെ സുഹൃത്ത് പൊലീസിനെ തടഞ്ഞെങ്കിലും പൊലീസ് അസഭ്യം പറയുകയായിരുന്നു. പിന്നീട് കലേഷിനെയും സുഹൃത്തിനെയും പൊലീസ് വാഹനത്തില് കാഞ്ഞിരപ്പള്ളി ആശുപത്രിയില് എത്തിച്ചു. വിവരം അറിഞ്ഞ് ജനപ്രതിനിധികള് ആശുപത്രിയില് എത്തിയതോടെ വിലങ്ങണിയിച്ച് കലേഷിനെ സ്റ്റേഷനിലേക്ക് മാറ്റി. സെല്ലില് ഉടുതുണി പോലുമില്ലാതെ കലേഷിനെ വിലങ്ങണിയിച്ചു നിര്ത്തുകയായിരുന്നുവെന്നും പരാതിയുണ്ട്. കുടിക്കാന് വെള്ളവും ഭക്ഷണവും നല്കിയില്ലെന്നും പറയുന്നു.
പിന്നീട് ഈരാറ്റുപേട്ട മജിസ്ട്രേട്ടിനു മുമ്പില് ഇരുവരെയും ഹാജരാക്കി. ജാമ്യം കിട്ടാത്ത വകുപ്പുകളാണ് ചുമത്തിയിരുന്നതെങ്കിലും മജിസ്ട്രേട്ട് ഇരുവര്ക്കും ജാമ്യം നല്കി. അവശനിലയില് കലേഷിനെ കാഞ്ഞിരപ്പള്ളി ജനറല് ആശുപത്രിയില് പ്രവേശിപ്പിച്ചു. കലേഷിന്റെ മൂക്കിന്റെ അസ്ഥിക്ക് പൊട്ടലും മൂത്രം പോകുന്നതിന് തടസവും കണ്ടെത്തിയതോടെ വിദഗ്ധ ചികിത്സയ്ക്കായി കൊച്ചി നേവല് ആശുപത്രിയിലേക്ക് മാറ്റിയെന്നും ശാന്തമ്മ നല്കിയ പരാതിയില് പറയുന്നു. മനുഷ്യാവകാശ കമ്മിഷന്, വനിതാ കമ്മിഷന്, ആഭ്യന്തരമന്ത്രി, ഡിജിപി, കോട്ടയം എസ്പി എന്നിവര്ക്കും പരാതി നല്കിയിട്ടുണ്ട്.
അപ്പപ്പോഴുള്ള വാര്ത്തയറിയാന് ഞങ്ങളുടെഫേസ് ബുക്ക്Likeചെയ്യുക
https://www.facebook.com/Malayalivartha