പ്രകാശിന്റെ പൊന്‍കണി ഇന്നലെ വാളയാറില്‍ ബസിറങ്ങി!
കോവിഡ് 19 രോഗം സംഹാര താണ്ഡവമാടിയ ഇറ്റലിയില്‍ കംപ്യൂട്ടര്‍ സയന്‍സില്‍ എംഎസ് ചെയ്യുകയായിരുന്ന പാലക്കാട് നെല്ലിയാമ്പതി ചന്ദ്രമല എസ്റ്റേറ്റിലെ പി.എന്‍.പ്രകാശിന്റെ മകള്‍ ഗായത്രി പി. മേനോത്ത് പുറത്തുപോലും പോകാനാകാതെ മുറിയില്‍ തന്നെ അവിടെ ഭീതിയോടെ ദിവസങ്ങള്‍ കഴിച്ചുകൂട്ടുകയായിരുന്നു.
ഒടുവില്‍ കേന്ദ്രസര്‍ക്കാരിന്റെ ഇടപെടല്‍ മൂലം പ്രത്യേക വിമാനത്തില്‍ 15-ന് ഇവര്‍ ഉള്‍പ്പെടുന്ന 200 അംഗ സംഘം ന്യൂഡല്‍ഹിയിലെത്തി. 30 മലയാളികള്‍ ഈ സംഘത്തില്‍ ഉണ്ടായിരുന്നു. ഇന്‍ഡോ ടിബറ്റന്‍ ബോര്‍ഡര്‍ പൊലീസിന്റെ ന്യൂഡല്‍ഹിയിലെ ക്യാംപിലേക്കാണ് അവരെ എത്തിച്ചത്. കോവിഡ് ഇല്ലെന്നു സ്ഥിരീകരിച്ചെങ്കിലും ലോക് ഡൗണ്‍ മൂലം കേരളത്തിലേക്കുള്ള യാത്ര മുടങ്ങി.
തുടര്‍ന്ന് കേരള ഹൗസിന്റെ സഹായത്തോടെ, ക്വാറന്റീന്‍ കാലാവധി പൂര്‍ത്തിയാക്കിയ ഇവര്‍ പ്രത്യേക ബസില്‍ കേരളത്തിലേക്കു പുറപ്പെടുകയായിരുന്നു. ഇന്നലെ ഉച്ചയോടെ പാലക്കാട് എത്തിയ ഇവരെ ഡിഎംഒ ഡോ.കെ.പി.റീത്ത സ്വീകരിച്ചു. വൈകുന്നേരത്തോടെ ഇവര്‍ നെല്ലിയാമ്പതിയില്‍ എത്തി. ഇറ്റലിയിലെ എന്‍ജിനീയറിങ് വിദ്യാര്‍ഥി വടക്കഞ്ചേരി സ്വദേശി ഓംനാഥ് ചെന്താമരാക്ഷനും സംഘത്തിലുണ്ടായിരുന്നു
മകള്‍ ഗായത്രി ഇന്നലെ വാളയാറില്‍ ബസിറങ്ങുന്ന കാഴ്ച കാണാന്‍ അച്ഛന്‍ പി.എന്‍.പ്രകാശിനോടൊപ്പം ഗായത്രിയുടെ അമ്മ ജയന്തിയും എത്തിയിരുന്നു.
https://www.facebook.com/Malayalivartha
