ലോക്ക് ഡൗണില്‍ ബസ് ടെര്‍മിനലില്‍ കടുങ്ങി അഗസ്ത്യനും സാഗറും!
കോഴിക്കോട് മാവൂര്‍ റോഡിലെ കെഎസ്ആര്‍ടിസി ടെര്‍മിനലില്‍ ഹോണടികളും ഡബിള്‍ ബെല്ലുകളുമില്ല. ആളുകളുടെ സംസാരവും ചിരിയുമില്ല. പക്ഷേ രണ്ടു മനുഷ്യര്‍ ഒരു മാസത്തിലധികമായി ടേര്‍മിനലില്‍ തന്നെയുണ്ട്. ടെര്‍മിനലിലെ ശുചിമുറി ജീവനക്കാരനായ മീനങ്ങാടി ആനത്താനത്ത് അഗസ്ത്യനും സഹായി ബാലുശ്ശേരിക്കാരന്‍ സാഗറും ടെര്‍മിനലിനകത്ത് തന്നെയാണ് ഒരു മാസമായി താമസം.
അവശ്യ സര്‍വീസായി വരുന്ന ചില ബസുകളില്‍ ആരോഗ്യപ്രവര്‍ത്തകരും ജീവനക്കാരുമുണ്ടാകും എന്നതിനാല്‍ ലോക്ഡൗണ്‍ തുടങ്ങിയതു മുതല്‍ ഇരുവരും വീട്ടില്‍ പോയിട്ടില്ല. എല്ലാ ദിവസവും ശുചിമുറി വൃത്തിയാക്കണം. അതിനൊപ്പം സ്റ്റാന്‍ഡിനകവും ശുചിയാക്കുന്നുണ്ട്. ഫീനോയിലും സാനിറ്റൈസറും മണക്കുന്ന കൈകളുമായാണ് ഇരുവരുടേയും ജീവിതം.
തിരുവനന്തപുരത്തുകാരാണ് ശുചിമുറിയുടെ കരാര്‍ എടുത്തത്. അവര്‍ വരികയോ പകരം ജീവനക്കാരെ എത്തിക്കുകയോ ചെയ്യാതെ ഇരുവര്‍ക്കും സ്വന്തം വീട്ടില്‍ പോവാന്‍ കഴിയില്ലെന്നും അഗസ്ത്യന്‍ പറഞ്ഞു.
കൈയ്യിലുണ്ടായിരുന്ന മൊബൈല്‍ ഫോണ്‍ ബക്കറ്റിലെ വെള്ളത്തില്‍ വീണതോടെ വീട്ടിലേക്കുള്ള ഫോണ്‍വിളിയും കുറഞ്ഞു. ഓഫിസിലെ ലാന്‍ഡ് ഫോണില്‍നിന്നാണ് വല്ലപ്പോഴും വീട്ടിലേക്ക് വിളിക്കുന്നത്. ഇതുവരെ ഇരുവര്‍ക്കും സമൂഹ അടുക്കളയില്‍നിന്ന് ഭക്ഷണം എത്തിച്ചിരുന്നു. ഇതു ലഭിക്കാത്ത സമയങ്ങളില്‍ അടുത്തുള്ള സ്വകാര്യ ആശുപത്രിയുടെ കന്റീനില്‍നിന്നും ഭക്ഷണം കഴിക്കും.
https://www.facebook.com/Malayalivartha
