വരുമാനം നിലച്ച് ദുരിതത്തിലായ കുടുംബത്തിന് റവന്യു വകുപ്പിന്റെ കൈത്താങ്ങല്‍!
ആലപ്പുഴ മുതുകുളം വടക്ക് സരളാ ഭവനത്തില്‍ ശശിധരന്റെ ഉടമസ്ഥതയിലുള്ള കട മുറിയോട് ചേര്‍ന്നുള്ള രണ്ട് മുറികളില്‍ വാടകയ്ക്ക് താമസിച്ചു വന്ന കാഞ്ഞിരപ്പള്ളി സ്വദേശി സന്തോഷിന് (39) ലോക് ഡൗണിനെ തുടര്‍ന്നു വരുമാനം നിലച്ചു ദുരിതത്തിലായി. ആ കുടുംബത്തിനു റവന്യു വകുപ്പിന്റെ ഇടപെടല്‍ കൈത്താങ്ങായി.
റേഷന്‍ കാര്‍ഡ് ഇല്ലാതിരുന്നതിനാല്‍ , മേസ്തിരിപ്പണി ചെയ്തു വന്ന സന്തോഷിനു ലോക്ഡൗണിനെ തുടര്‍ന്നു വരുമാനം നിലച്ചതോടെ കുടുംബം പട്ടിണിയിലായി. സൗജന്യ റേഷനോ സര്‍ക്കാരിന്റെ മറ്റ് ആനുകൂല്യങ്ങളോ ലഭിച്ചിരുന്നില്ല. ഗര്‍ഭിണിയായ ഭാര്യ ജിന്‍സിയും മക്കളായ അജിത്തും (8), അമലും (രണ്ടര) അടങ്ങുന്നതാണു കുടുംബം.ഒന്നര വര്‍ഷമായി വാടക വീട്ടില്‍ താമസിച്ചു വരികയായിരുന്നു. കുട്ടികളുടെ വിശപ്പടക്കാന്‍ പോലും ഭക്ഷണം നല്‍കാന്‍ കഴിയാതെ വിഷമിക്കുകയായിരുന്നു. ചില സംഘടനകളുടെ ചെറിയ സഹായം ലഭിച്ചതിനാലാണ് ലോക് ഡൗണിന്റെ ആദ്യ നാളുകള്‍ തള്ളിനീക്കാനായത്.
ദുരിതം വര്‍ധിച്ചതോടെ സന്തോഷ് തങ്ങളുടെ ദുഃസ്ഥിതി കലക്ടറേറ്റില്‍ അറിയിക്കുകയായിരുന്നു. അന്വേഷിക്കാനെത്തിയ മുതുകുളം വില്ലേജ് ഓഫിസര്‍ ബേബി മിനിക്ക് കാര്യങ്ങള്‍ ബോധ്യപ്പെട്ടു. കൈവശം ഉണ്ടായിരുന്ന പണംകൊണ്ട് അത്യാവശ്യ സാധനങ്ങള്‍ വാങ്ങി നല്‍കി.
തുടര്‍ന്ന് റവന്യു ഉദ്യോഗസ്ഥര്‍ കാര്‍ത്തികപ്പള്ളി തഹസില്‍ദാര്‍ ഡി.സി.ദിലീപ്കുമാറിന്റെ നേതൃത്വത്തില്‍ ഭക്ഷ്യധാന്യ കിറ്റുകളും കുട്ടികള്‍ക്കുള്ള ഭക്ഷണവും എത്തിച്ചു കൊടുത്തു. കുടുംബത്തിനു റേഷന്‍ കാര്‍ഡ് ലഭ്യമാക്കുന്നതിനുളള നടപടി സ്വീകരിക്കാന്‍ വില്ലേജ് ഓഫിസര്‍ക്ക് നിര്‍ദേശം നല്‍കി.
https://www.facebook.com/Malayalivartha
